قصة اماراتيه كاامله وتجنن اسمها: نسيم الشمال..

ـــــ في دبي..
مهره فها الوقت كانت ادق لمريم بس كله تلقى التيلفون مغلق .. سمعت طرق ع الباب ودخل اخوها..
محمد: عادي ادخل
مهره: تراك دخلت بعد شوه..
محمد: منو كنتي ترمسين..
مهره: محد ادق لربيعتي بس جنها قافلتنه
محمد: هيه .. ومنو ربيعتج.. بنت الشمال..
مهره: بعد حافظ ..
محمد: تراه ماعندج سيره غيرها..
مهره: حمود ودني عندها..
محمد: يصير خير .. نزلي تحت تراه مصبح ياي ..
مهره: هاا...
محمد: اعتقد سمعتي..
مهره: هيه انزين انزين..
وطلع محمد من حجرتها وهو يبتسم .. وفباله مخططات وافكار ناوي يقترحها على مهره.....
من بعد ماقضن البنات يومهن ويا بعض دقن فليل على الساعه تسع لعلي عشان اييهن .. ويوم وصلهن تمن واقفات بعدهن فالسكه يسولفن وعاده يوم الخريطه تنفتح منو بيسكتهن مريوم تخبرها عن الجامعه والبنات والسوالف والربشه وفطوم عن المدرسه والضرايب ويا الابلات وايام المراجعه والامتحانات.. وعلى الساعه 11 ردوا الشباب من العزبه وعلي من شاف البنات يالسات حرج عليهن ..
علي: شو ميلسنكن برع ها الكثر .. سرت ورديت وبعدكن برع..
مريم: انزين ويعني.. ضارين انتم برع..
عبيد: ودي اعرف شو من السوالف عندكن ها الكثر .. ليل نهار مجابلات بعض..
فاطمه: ربك بعد.. بلاكم حاسدينا على يلستنا من الله ما نتلاقا الا في الاجازات..
علي: انزين يلسه ها الكثر . شو بيقولون الناس..
مريم: مايحتاي الناس.. يقولون اللي يقولونه الحمدلله نحن يالسين جدام بيوتنا وهنه مايخطفن سيايير الا اللي نعرفهم .. واصلن من انشوف ليت سياره نتشارد..
فاطمه: وبعدين البيوت كلها مشرعه بيبانها ..ورانا بيتنا وبيت قوم عمي وجدامنا بيت يدي ماعلينا شر..
مريم: والحريم سايرات رادات بعد شوه..
عبيد: هبي هباكن الله.. مزهبات الرد انتن..
علي: اخبرك انا بسير ارقد ورانا ركض..
عبيد: قلنا رابع المصاروه ونسى البوش ..
مريم: مستحيييل .. علي ينسى كل شي الا بوشه ..
علي: بس بس انزين .. انجلعن داخل .. نحن طالعين من الميلس وعمي ناصر طلع ورانا .. الحينه بيوصل وبيهزبكن تحيدنه تراكن مايداني مياولكن فالفريج..
فاطمه: يووهو علينا..
علي: كيفكن انا قلتلكن .. تحملن حشرة عمي ..
وروح علي بيتهم وعبيد رد بيت يده .. وتفرقن البنات وكل وحده ردت بيتهم .. مريوم على طول طلعت حجرتها.. دشت الحمام وخذتلها دش وعقب تمت موقفه جدام التسريحه تسحي شعرها تمت تفكر فها اليوم تفكر فنوره ووليدها وسوالفها وضربتها غبنه زخت تيلفونها عشان ادقلها وهيه يايه بتفتحه لقت يميع المسجات واصلتنها اغلبيتهن من مهره ..
اول مسج " مريوم ليش غالقه التيلفون ابا ارمسج.." ثاني مسج" سالفه خطيره مريوم دقي " ثالث مسج " مريووم مصبح توه كان عندنا .. ابا اقولج شي.."
مريم وهيه تقرى مسجات مهره عقت بعمرها ع الشبريه وهيه تضحك .. مول ماتروم تيود شي فقلبها هاي المهره بتموت اذ ماخبرت حد عن شي استوالها ..
مريم فخاطرها" يليتني مثلج يامهروه .. مفتكه من الهموم .. ليتني بس اقدر اطلع اللي فقلبي لحد .. لو بقول لنوره كل شي بس مب دومها هيه عندي وبعده فخاطري اشيا ودي اقوللها اياها .. ضريت اخبر نوره وبس والحينه لا نوره ولا غيرها ..انا حالتي غريبه يبالي دكتور نفساني يشخص حالتيه.."
ويايه بدق لنوره بس غيرت رايها ودقت لمهره اللي خاست من كثر ماتتريا اتصالها..
سولفت وياها شويه وعقب بندت عنها لانها بترقد ...اما مهره فياها اخوها وهيه توها كانت مسكره عن مريم..
يلس شويه وياها كانت هيه يالسه ع النت ومب عاطتنه سالفه وهو يحاول يسحب منا رمسه او أي شي ..
محمد: مهروه انا ياي ايلس وياج وانتي مجابله النت
مهره: انزين شو .. ماترمس انته ..
محمد: شو تسوين انتي ..
مهره: ماشي اسولف ويا ربعي ..
محمد: هيه ربعج .. (ووقف وراها..) منو هن..
مهره: بنات
محمد: انزين منو
مهره: عوذبالله .. بنات فالجامعه شو تباهن..
محمد: هيه .. وبنت الشمال بعد اترمسينها الحينه
مهره: قبل ما تي انته كنت امبنده عنها .. ليش يعني
محمد: لا ماشي..هيه اللي كانت تطريها امايه هذاك اليوم يوم يبناج من الجامعه
مهره: هيه مريوم .. تراها كانت يايه ويايه وسلمت على امايه ..
محمد: هيه ..

مهره: ليش ها الاسئله
محمد: لا ماشي قبل اشويه كنت ارمس علي .. وجيه يعني
مهره: حمود انا لاهيه الحينه بسولف وياك عقب ..
محمد: وياويهج ماعليه انزين ..
مهره: صبر .. وحده من ربعي زعلانه مادري بلاها بشوفها شو فيها
محمد: بس عليج .. انا طالع
مهره : على ويين
محمد: بسير احوط .. تمي جابلي ربعج وراضي هاي وزعلي هاي .. واخوج خليه يولي.. ( وطلع من حجرتها وهو مسوي عمره معصب ..)
مهره: اوهو بلاه بعد ها .. يلا بترد وبتنسى .. خلني اشوف هاي العله بلاها..

ــــ بالباجر العصر فبيت بو علي ..
كانت يايه ام سعيد ووياها بنتها شيخه ويالسات الحريم يسولفن وشيخه يالسه حذال فطوم وتقولها ادق لحصوه عشان اتي .. وحصوه من درت انه شيخوه موجوده على طول سارت بيت عمها من غير حتى ماتقول لمريم .. عقب بروحها مريم طلعت من البيت وصلت لين الدروازه اطالع صوب بيت عمها وبيت يدها محتاره وين بسير .. وتوكلت وسارت بيت عمها .. يوم دخلت الصاله شافت ام علي وام سعيد يالسات تلومت اول شي وعقب سارت اتسلم ..
ام سعيد: شحالج امايه ..
مريم: الحمدلله بخير ..
ام سعيد: وشحالج امج وخوانج يعلهم بخير..
مريم: الحمدلله كلهم بخير..
ام علي: الحريم ماظهرن خاري
مريم: مادري وانا طالعه محد كان خاري..البنات وين..
ام علي: مادلهن وين سارن .. يمكن فوق..
مريم: هيه عيل بسيرلهن ..
وطلعت عنهن مريم ....
ام سعيد: ماشالله الحينه هاي الريم .. حرمة استوت
ام علي: هاهاهاها مابتم ياهل عيل هيه
ام سعيد: ردت تشبه امها .. غزال ماشالله ..الا محد خطبها ..
ام علي: ماظنتي ماسمعت ..
ام سعيد: ومحد يباها من عيال عمتها ..
ام علي: مادري.. الكبير يبى بنتي .. واللي عقبه اصغر عنها..
ام سعيد: هيه..
ام علي: جان ما الحريم طلعن خاري .. خلينا انسير..
وطلعن الحريم .. اما البنات فكانن فالصاله الفوقانيه.. مريم اطالع التيلفزيون واتجلب فالقنوات حصه وشيخوه وفطوم يسولفن..
فاطمه: حووه .. مريوم.. عطينا ويه ..
مريم: شو تبين..
حصه: بلاج .. مب من عوايدج اتمين ساكته..
شيخه: انا الصراحه ما جد سمعت سوالفها مريوم .. من ايي اتجابل التيلفزيون هيه..
فاطمه: مايكون مستحيه من شيخوه بس..
مريم: هيهيهيهي لاوالله..
شيخه: عيل جيه ماتشاركينا..
مريم: سوالفكن كلها عن المدرسه شو تبني اقول يعني..
حصه: خلاص ارمسن عن اللي خطب واللي طلق .. تعيبج ها السوالف
مريم: بايخه حصوه
شيخه: انزين انا بقول .. اكيد محد يعرف ها الخبر .. سلامه بنت عموه انخطبت..
حصه: مال الذيد ..
شيخه: هيه .. وابويه امس اسمعه يبى يخطب بنت عمي لسعود ..
فاطمه امبققه عيونها على الاخر: احلفي..
شيخه: والله امس يقول..
مريم فذاك الوقت كأنها فداخل ضو .. ويها تغير لونه حست بنفضه وقلبها قامت تسارع دقاته .. ودها حد يصفعها عشان توعى من ها الحلم المزعج .. عشان ماتثير الشكوك تمت يالسه فمكانها وعيونها على التيلفزيون ولا بينت اهتمامها ولا سألت .. اكتفت ببكائها الصامت .. فطوم اطالعها وترد تسأل شيخوه .. وشيخه اصلن متعمده ترمس عشان اطالع ردة فعل مريم يمكن تقدر اتحدد موقف اخوها وتخليه يقوللها اللي فباله واللي من زمان وهيه تحايله يقوللها اياه.. بس الظاهر مريم مب مهتمه وكل اللي فبالها كان غلط وماعليها الا انها تفهم اخوها ..
حصه: يعني خلاااص
شيخه: مادري الا رمسه.. بس سعيد ماعنده خبر...
فاطمه: يعني اذ درى عادي مايطيع ... (ومريم على اعصابها.)
شيخه: ماعرف والله.. اذ هو مب محطي فباله حد اكيد ما بيرفض بنت عمه.. (واطالع مريوم...)
حصه: حراام مخططاتنا بتفشل انا وانتي..
شيخه: هيه والله خساره..
حصه: بغيناه لمريوم اختيه عشان نقدر انا وانتي نبات ويا بعض..
شيخه: مشكله بعد ولا انا احسبهم لايقين لبعض..
حصه: هييه والله (واطالع مريوم وتضحك..)
مريم اطالعتهن بنظره وقامت من عندهن ونزلت..ماقدرت تتحمل اكثر .. كان الخبر قوي ماتتحمل تسمعه .. نزلت بسرعه مب قادره تتحكم بعمرها ماتبى حد يشوفها على ها الحال..اما البنات فتمن يالسات .. فطوم تغصصت وحصوه مب عارفه شو اللي صار..
حصه: جيه حرجت
شيخه: بسم الله انزين شو قلنا..
فاطمه: صدق انكن متفيجات.. (ولحقت مريوم..)
شيخه تمت تفكر فموقف مريم معقوله هم يحبون بعض وهيه ماتدري .. هيه تحس انه شي مغير اخوها وياما شكت فحبه لمريم بس ماكان يقوللها أي شي .. كانت تلمح فالرمسه ويا حصه بس حصه بعد ماتعرف أي شي .. حصه بنفسها مب محطيه ها الشي فبالها بس انه شيخه تقوللها وهيه عاده يوم لسانها يزل ترمس جدام مريم على شكل سوالف .. ومريم حالها من حال سعيد ماطلعت اللي فقلبها لاي حد اللهم قالت لنوره وبشكل غير مباشر انها حبته!!
حصه: شو بلاج شيخوه.. وين طرتي..
شيخه: ها .. لا ماشي.. بس خلينا نلحقهن..
حصه: يلا..
وفالصوب الثاني مريوم تمشي بسرعه تبى توصل بيتهم تبى تعق بعمرها على شبريتها واطلع اللي فيوفها من غصه وضيجه .. فطوم تمشي وراها تباها توقف ومريم طابتنها ..
حصه: ها فطوم ..
فاطمه: ماطاعت توقف ..
شيخه: هيه حرجت علينا ولا شوه.؟
فاطمه: مادري .. يمكن تغصصت يوم قلتن تبنها لسعيد..
شيخه: انزين وبلاه سعيد اخويه ..
فاطمه: ما بلاه .. بس مريم ماتحب حد يرمس عنها جيه.. بسير اييب وقايتيه وبسيرلها..
مريم من وصلت حجرتها قفلت الباب وطاحت ع الشبريه اتصيح .. ضاع حلمها وراح حبها تمت تندب حظها اللي طيحها فحب و ماتعرف شعور الطرف الثاني تجاه ها الحب ..
دقت فطوم عليها الباب بس ماطاعت تفتحلها ..
فاطمه: انزين فجي مريوم..
مريم: فطوم بليز خليني بروحي..
فاطمه: مريوم صدقيني سعيد بيرفض .. اصلا هو مايبا بنت عمه من زمان ..
مريم: مايهمني انزين ..
فاطمه: مريم عاد .. شو مايهمج وصياحج شال البيت..يودي فقلبج انتي ولا تقولين لحد .. مريوم تحبينه مادري.. مريوم تراه موجود مابا اشوفه.. خلج الحينه ..
مريم: فطوم طبي حلجج وروحي..
فاطمه: وياويهج مب عليج..
وروحت فطوم وهيه معنطزه ووصلت الصاله بس ماهانت عليها اتخليها جيه وردت اتحايل فيها لين خلتها تبطل الباب.. مريوم كانت موخيه ومن رفعت راسها وشافت فطوم صاحت اكثر فطوم غمظتها مريم و لوت عليها وتهدي فيها..
فاطمه: ها كله الحب لسعيد ..ياعيني واونهم مايخبرون حد.. كنا نعايرهم ويقولون مال سوالف .. اشوفه طلع جد ..
مريم: ...........
فاطمه: انزين لا ترمسين.. بس ماعليج بجس النبض وبتخبر عن السالفه .. شيخوه مشخله اكيد فهمت السالفه غلط.. واذ سعيد يباج صدقيني بيرفض طلب ابوه .. واذ هو وافق ترا مايستاهل انج تفكرين فيه اصلا..
مريم: فطوووم..
فاطمه: ها قولي..قولي احبه..
مريم: جب ..
فاطمه: خلاص انزين جب جب .. (وتسحبها من ايدها وتيلسن ع الغنفه..) تعرفين..موقفج توه اكدلي حبج له ولو ماقلتي.. مب معقوله هو مايفكر فيج.. نظراتكم لبعض كلها شوق ماتخيل انكم مب لبعض..
مريم: بس عاد جولييت زمانها رمست..
فاطمه: اااه فديتني والله .. قبل حليتي قضيتيه وخليتيني اسعد انسانه فها الكون.. واليوم لازم ارد الدين..
مريم: فطووم خلج بعيد عن ها السالفه,,
فاطمه: يا سلاام..
مريم: قلتلج مالج شغل .. مابا اعق عمري ع الريال ..
فاطمه: شو قصدج .. يعني انا كنت عاقه عمري ع احمد..
مريم: فطوم انا ماقلت جيه .. كم مره بقولج انتي واحمد غير عن الكل.. انا موقفيه حساس .. مابا سعيد يعرف شي عني لين ماهو ايي بنفسه ويقول ابا مريم .. فهمتي عليه ..
فاطمه: وجنه الزمن يعيد نفسه ..
مريم: كيف..
فاطمه: قبل سنتين بس كنت فها الحجره واصيح لمجرد فكرة انه احمد ما يفكر فيني .. وكنت اعاند احساسي ويوم تقوليلي تحبينه اتهرب .. مع انه اللي فقلبي اكبر من الحب بس..لين ماقلتلج كل شي فخاطريه ..
مريم تمت ساكته..
فاطمه: اذكرج قلتيلي كتومه وانج انتي مايتم شي عندج اكثر من شهر .. اشوفه تم سنتين عيل..

مريم: هه ها مجرد مشاعر ..
فاطمه: وانا اللي كتمتها كانت مجرد مشاعر.. يعني حالج من حالي .. انتي تحبين سعيد ومب رايمه تقولين تخافين من النتائج ...
مريم: فطوم مابا اتوهم .. مابا مصير حبي يكون مثل شما.. شما حبت بكل صدق بس اللي حبته ولا درى عنها .. شو الفايده اعذب عمري .. زين يوم عرفت انه لبنت عمه عشان الزم حدودي و..
فاطمه: وتنسين حبه ..
مريم: ماعرف..
فاطمه: لا تربطين سالفتج بشما.. شما من قبل كانت تدري بانه علي ما بيكون الها.. اسلوب علي غير عن سعيد .. علي كان يعامل شما مثلي تماما .. يهازبنا ويضاربنا .. يعني ماكان محطنها فباله وانا دوم كنت اقوللها .. اما سعيد غير.. احس نظرته لج غير يوم اسولف وياه واييب طاريج ملامحه تتغير يتم مستانس..
مريم: فطوم خلاص ..
فاطمه: مريوم صدقيني يحبج..
مريم: فطوم انا ماخذت وعطيت وياه عشان اعرف اذ يحبني .. لا تبين من عندج لا تقولين شي انتي مب متأكده منه..
فاطمه: مب من عندي.. انتي عميا فتحي عيونج.. تبين تعرفين اذ يحبج لا تتحاشين شوفته..
مريم: فطوم سكري ع الموضوع ..
فاطمه: برد وبقولج تراني احسبه يحبج واكيد سعيد مابياخذ بنت عمه ...
مريم: فطوم..
فاطمه: انزييين انزين.. خلاص انتي هدي عمرج ..
مريم: خلاص مايهمج .. سيري عند البنات.. ابا اتم اروحي شويه..
فاطمه: خلاص عنوني.. لا تخلصين مستودع دموعج عاده..
مريم: سكري الباب وراج..
وتمت مريم تفكر فرمسة فطوم معقوله سعيد يحبها هيه تقر بحبها له لكنها بعدها متردده .. ما تبى تتفشل .. ماتبى تبني امال واهمه.. ماتدري بانه سعيد من اول ماشافها وهو هايم بها..
حست بخنقه وبضيجه ودها تشوفه وتقوله سعيد انا احبك .. بس بعد عاداتها ما تسمح لها الحل.. زخت تيلفون البيت واتصلت على المسج الصوتي لتيلفون سعيد..كانت كل يوم تقريبا ادق تسمع صوته وهو يشل .. كل مره يغير وكل شله تسمعها اطير مريم فعالمها وتتخيل بس انه سعيد يوم هو يسجل ها الشله كان يفكر فيها وتستانس لمجرد ها الفكره ..
تمت يالسه وهيه تجلب ففكرها مواقفها اللي مرن ويا سعيد .. كل ما تنحط فموقف وياه ماكانت تقدر اتشوف فيه ويها عشان اتعرف ملامحه هاي اللي ترمس عنها فطوم.. ما كانت تاخذ وتعطي وياه عشان تعرف مشاعره شو ..طاحت ع شبريتها وغمظت عينها وهيه تتخيل اليوم اللي بيقول فيه سعيد انه يباها..
..... فها اليوم فليل.. يا سعيد بيت عمته عشان يشل اهله .. طلعله شيخه وحصه ووياهن فطوم.. سعيد يتلفت ويطالع صوب باب الفله الفقير شاف فطوم موجوده وقال فخاطره يمكن تتطلع هيه بعد..
سعيد: جيه امايه وين..
شيخه: الحينه بتي..
فاطمه: جيه ياي من وقت انته..
سعيد: تعبان ابا ارد ارقد من امس مارقدت..
فاطمه: هيه حليلك ..
سعيد وهو يطالع حصه: حصوه .. شحالج..
حصه: الحمدلله بخير..
سعيد: ها شو المعنويات يقولون ثنويه السنه اليايه
حصه: يلا نأقلم عمارنا..
شيخه: ياسلام وليش ماتسألني انا عيل..
سعيد: انتي كسلانه عادي عندج .. الشطاره بس فها الفريج ..
فاطمه: عاش والله .. بس ها الفريج هيه
شيخه: بس عيل .. يبتي 97 وانتفختي ..
فاطمه: مب الا انا .. بنت عمي كانت علمي ويابت 95 .. وحصوه داشه علمي وها السنه ماشالله نسبتها فالتسعين .. بعد قولي بعد
سعيد: هاهاهاها مايحقن بنات النعيمي..
حصه: عشون عيل..
شيخه: برايه انزين مب مخلفه عليه الشطاره .. جدامي اخو كان يصفهن صف الدويحات..
سعيد: غربالله ها الراس.. ركبي ركبي انتي بدال ها الفضايح..
انفج باب الفله وسعيد مصوب عيونه على اللي بيظهر وهو مبتسم وفرحان طلعن الحريم وهو يطالع لوراهن بس للاسف ماكانت موجوده..
نزل سلم على عمته وعقب روحوا..

ـــــ عقب كمن يوم .. في بيت قوم سعيد..
كانت شيخه يالسه ويا امها وابوها وتسمعهن وهم يسولفون...
بو سعيد: عيالج وبناتج ما بين ها الاسبوع
ام سعيد: مادري والله احيدهن بيين البنات ها الخميس .. سلطان هاذوه حذالنا فاي وقت ايي .. الا جان راشد من سكن فبوظبي مانسمعله خبر لا عنه ولا عن حرمته وعياله..
بو سعيد: لاهي بشغله تلقينه.. ومن اسبوعين تراهم يايين .. بعد درب عليهم ..
ام سعيد: اييها .. نسى امه ماقام يدقلي كل يوم .. الخوف من سعيد بعد الحينه يعرس وينساني..
بو سعيد: يا حرمه خليهم فدنياهم .. مب مقصرين هم الحمدلله ..
شيخه: جيه امايه منو بتيوزونه سعيد
ام سعيد: منو بنيوزه بعد.. اللي يباها ما بنقوله لا..
بو سعيد: ومنو يبى ثره غير بنت عمه .. لا تفتحيله مجال انتي..
ام سعيد: لا عاد انا مابوقف فويه وليدي جان مايباها بعد مب زين تغصبه.. هو ريال وفاهم..
شيخه: هيه ابويه .. سعيد شكله مايبا بنت عمي ..
بوسعيد: وشعنه مايباها.. هكوه سلطان اخوه خذ بنت عمه وماقال لا والله مهننهم الحمدلله..بعد شو ها المكر اللي طايحين فيه عيال اليوم ..
ام سعيد: كيفك ابوي .. بس ولدك مره قايل انه مايباها لا ترمس فيها انته وجان ياها نصيبها لا ترده ..
بو سعيد: ماعليج انتي بيكون لي وياه رمسه ..
شيخه تغصصت من اصرار ابوها وشلت بعمرها وروحت حجرتها..دقت لحصوه وتمت اتسولف وياها وتخبرتها عن مريوم عقب ذاك اليوم وقالتلها حصه انه كل شي عادي ومريوم اصلن كانت فهذاك اليوم تعبانه .. وعقب ما بندت شيخه تمت تفكر ويلست ترمس روحها.." الحينه هيه سمعت الخبر وتقول حصه عادي عندها.. اكيد يعني هيه ماتحبه وماتفكر فيه.. انزين وسعيد .. افف وياراسك يا سعيد شعنه ماتقولي وتريحني من ها الفضول.. مادري ليش شاغله عمري انا .. كيفه خله بروحه يشل همه ليش انا اهتم وياه .. "
وردت تيلس ويا امها وابوها....

ـــــــ في العين..
في بيت بو عبدالله .. كانو يالسين كلهم فالصاله .. يسولفون ويخططون للصيف..
وعزم بو عبدالله على انهم يسيرون المانيا ويا بيت اخوه..
وفي جناح سالم..
كانو سالم ونوره يالسين يرمسون ويتناقشون..
نوره: مافينا ع السفر سالم.. اخاف على زايد ..
سالم: ماعليه شر.. كلهم تراهم بيسيرون ..
نوره: لا لا سالم .. الجو بيتغير عليه وبيتعب .. خلنا هنه احسن..
سالم: اللي يريحج حبيبتي.. بس انا ادري ليش ما تبين اتسيرين.. عشان قوم عمي ويانا..
نوره: لاوالله..
سالم: مايكون قالتلج شي بعدها..
نوره: لا ..
سالم: مادري ها الانسانه شو فيها.. يعني هيه كارهتني شله تحقد عليج..
نوره: عشاني خذتك منها..
سالم: فديت روحج غناتي.. لاتحطين فبالج رمستها.. هيه من استوت حقوده .. عمري مافكرت فيها .. اول انسانه قلبي يتعلقبها انتي.. صدقيني يا نوره ..
نوره: مصدقتنك حبيبي.. لاتحاتي انته انا ماغلطت عليها وعمري ما بغلط لانها بتظل بنت عمك من لحمك ودمك..
سالم: محلاج يا نوره.. دومج كبيره ..
نوره ابتسمت ووخت براسها .. ضمها سالم وحبها ع راسها .. وسحبت عمرها منه وسارت الحجره لانها سمعت زايد يصيح وشلته وردت فالصاله..
سالم: وعى بو الشباب..
نوره: شو تشوف..
سالم: عطيني اياه.. (وطيحاه على ريوله وتم الا يمسح ع راسه ورد يرمس نوره..) نوير بتكملين جامعه ولا..
نوره: هيه عيل.. برد السنه اليايه وقفت الا كورس..
سالم: بعدج فاول المشوار .. جان ماترومين تمي فالبيت..
نوره: لا سالم انته واعدني اتخليني اكمل.. بكمل وبتخرج انشالله .. وبعدين انا داشه الا علوم بخلص بسرعه ..
سالم: زين عيل .. اخبرج انا ابغي اكمل الماجستير ..
نوره: حلوو.
سالم: تعرفين ترا انا مخلص ها السنه واحمد بعد فقلنا نبى نكمل ..
نوره: انزين كملوا ..
سالم: انزين نبى نكمل برع..
نوره: شو..
سالم: هدي هدي ..
نوره: والجامعات هنه بلاهن ..
سالم: مادري هيه سنه الا..
نوره: وانا .. انشالله تباني اتم اروحي..
سالم: بسيرين ويايه..
نوره: سالم سنه تبانا انتم برع.. انزين ودراستيه.. فكر فجامعه اهنه لازم يعني برع..
سالم: ماعرف نوره الفكره في قيد الانشاء ..
نوره: هونوا عن السفر.. درسوا هنه..
سالم: ماعرف والله بنطالع هو مبدئيا بعدنا.. لانه احمد ملتزم بعد ..
نوره تمت تطالعه بنظرات توسل.. هيه ماتبى تبعد عن ديارها سنه كامله .. دارت فبالها مريوم .. وهيه عنها فالعين اتحاتيها كيف يوم بسافر .. نوره ما استصاغت الفكره وسالم كذلك مب متقبلنها يلين بس قال بيخبر نوره و بيشوف ردها .. والظاهر بيرد يرمس احمد عساس يغيرون اتجاههم ويدرسون ع الاقل فالدوله..

ــــــــ وفي الشمال ..
فها الوقت كانت مريم يالسه على الدريات جدام الفله وفايدها دفتر وقلم وترسم ..
رسماتها كلها ويوه كئيبه حزينه .. ها الاسبوع مول ماكان الها خاطر لاي شي .. عايفه كل شي وعايفه عمرها .. وطت الدفتر عنها وتمت تتأمل السما والغيوم .. كان الجو هادي ومنسم بهوا لطيف غير عن عادة ايام الصيف الحاره واللي ريحها كلها غبره ..
رن تيلفونها وكانت نوره اللي داقه ... وردت عليها..
نوره: السلام عليكم..
مريم : وعليكم السلام.. هلا ام زايد ..
نوره: بالمهلي .. وشحالج
مريم: الحمدلله.. انتي ..
نوره: بخير الحمدلله.. شو تسوين
مريم: ماشي يالسه..
نوره: هيه..
مريم: شحاله زيودي..
نوره: الحمدلله..
مريم: فديته تولهت عليه ..مابتون باجر...
نوره: ماظنتي.. الاسبوع اللي طاف يايين..
مريم: يحيكم.
نوره: ولا يهمج .. الكل بيسافر هنه وبنتم بس انا وسالم وبقوله اني راس الخيمه انتم..
مريم: والله
نوره: هييه..
مريم: حلووو ... بعد نحن ماظنتي انسافر..
نوره: زين زين .. مادريتي ريلي وولد عمتج يبون يكملون الماجستير اونهم برع
مريم: لاوالله
نوره: هيه قبل شويه سالم يقولي..
مريم: مادريت عن احمد.. مادري اذ قال لفطوم..بس ماعتقد لانه يبى يملج على فطوم..
نوره: مادري .. هم يشاورون جنهم .. بس الاحتمال الاكبر انهم يكملون هنه..
مريم: هيه زين عيل..
نوره: وشو علومج بعد ..
مريم: ع حطة ايدك ..
نوره: يحيج..
ودامت فترة سكوت بسيطه..
نوره: بلاج
مريم: ها..ماشي..
نوره: مريوم من كمن يوم انتي جيه .. تعبانه انتي.
مريم: لا لا
نوره: عيل بلاج غناتي..
مريم وتحس بالغصه من الغبنه : ماشي نوره..
نوره: الا فيه شي.. قوليلي مريوم ..
مريم: .......
نوره حست بانها اتصيح حاولت وياها بغتها ترمس بس مريم ماقدرت سكرت عنها نوره وهيه تحاتيها .. مريم تبى تقوللها شي فقلبها وايد اشيا تبى تخبر نوره عنها.. حست نوره بانها مقصره وياها بس هيه شو بايدها عندها الحينه مسؤوليات مرتبطه بها.. تمت نوره ضايجه لانها مب قادره توصل لمريم وتهديها وتخليها تفضفض كل اللي فقلبها .. هيه مب عارفه شو فيها .. مب قادره تفهم الضيج اللي فمريم .. مريم من تشوفها تذكرها بايامهن قبل كلهن حنن لايامهن بس مريم شو اللي مأثر فيها هاجيه.. يمكن سعيد بس نوره تعرف كل شي فخاطر مريم صوبه معقول شي استوى امبينهم .. اكيد سعيد هو سبب ضيجتها هاي.. ردت تتصل الها بس مريم ماترد.. لانها من عقب ماسكرت عن نوره عقت بدفترها وتيلفونها وركضت فوق فحجرتها وقفلت عليها الباب .. تمت اتصيح تبى اطلع كل اللي فقلبها من حزن ودها تفرغ كل همومها ما تبى فكرها ينشغل اكثر من جيه .. ما تبى موضوع سعيد يأثر فحياتها .. بعدها المشوار جدامها .. لازم تفكر فدراستها وبس ..
كانت فطوم ها الوقت يايه بيت عمها انتبهت لدفتر مريوم وخذته وتمت تتصفحه .. يميع الرسومات فيه .. ويميع الاشعار والخواطر.. ابتسمت فطوم وفخاطرها" وحليلج يا الريم .. اشووف علوم هنه .. ( وطاحت عينها على وحده من الخواطر قرتها وابتسمت..) حبيبي هل سأحضى بك! والله فن انتي يا الريم.. انشالله بتحضين به.. ) وهيه بتصعد الدري تلاقفت ويا حصه وتيلسن شويه ع الدري يرمسن قبل ما تسير عند مريم..
وعقب فتره سارت فوق دقت على مريم الباب .. مريم كانت فالبلكونه يالسه تقرى كتاب و سمعت الدق وسارت تفتح الباب..
فاطمه: هلوو
مريم: هلا
فاطمه: شو كنتي تسوين هاا
مريم : ماشي..
فاطمه وهيه تسحب الكتاب من ايد مريم: ثقافه والله.. شو تقرين.. اشعار هاي ..
مريم: اشعار المتنبي..
فاطمه: ياعيني.. زاد اشوف يميع الاشعار فها الدفتر اندوج ها..
مريم: وين لقيتيه
فاطمه: تحت جدام باب الفله
مريم: اوه .. نسيته.. والتيلفون مفرور هناك اظني..
فاطمه: مادري اظني ..
مريم: خلينا نيلس فالبلكونه .. حلو الجو..
فاطمه: اوكيي..
وعقب مايلسن فطوم تنقل نظرها من مكان لمكان .. مريم سرحانه فالسما .. تمن ساكتات لين رمست فطوم..
فاطمه:اقول مريوم ويهج متورم كنتي تصيحين
مريم: لا .
فاطمه: صدق .. حطي عينج بعيني
مريم: صدق فطوم .. خلاص طبي سالفتيه..
فاطمه : كيفج..(وجلبت بويها وهيه متغصصه اسبوع وهيه تحاول تعرف شو اللي يدور فخاطر مريم .. بس مريم كلها غموض ماتعبر عن اللي فخاطرها . ماتقول شي..)
مريم: سمعت امايه اليوم ترمس عنج
فاطمه: شو تقول ..
مريم: اللي تقوله.. ها شو كان موقفج وامج ترمسج
فاطمه تبتسم: ماعرف اتلومت.. قلتلهم اللي تشوفونه..
مريم: واسمعهم يقولون الملجه اول السنه ..
فاطمه: هيه .. شهر واحد
مريم: زين يبوج
فاطمه: ماحس بتكمل فرحتيه
مريم: لا انشالله.. الله بيعطيكم على قد نياتكم انشالله وما بيبخل عليكم بالفرحه
فاطمه: انشالله.. مريوم انا افكر فيج
مريم: ماعليج مني..
فاطمه: من هاك اليوم ماسمعنا شي عن سعيد.. خوفاتي اللي قالته شيخوه صح
مريم: فطوم بليز .. قلتلج لا ترمسين فها السالفه.. انا احاول انسى لاتذكريني
فاطمه: قلبج يحبه كيف بتنسين .. فيوم وليله بتنسين .. هاكيه شموه لين اليوم وعلي فبالها حتى لو عاندت وقالت نسته .. يمكن الحب قل بس كل يوم لازم تتذكر السالفه واكيد قلبها يعورها .. بس يكفي وحده فينا لا تزيدين انتي..
مريم: وانا شو المطلوب مني.. اسيرله واقوله تراني احبك بادلني الشعور دخيلك..
فاطمه: مب جيه.. بس انتي الامل عندج بعده..
مريم: انا وشما عاثرات حظنا نفس الشي..
فاطمه: بس شما.
قاطعتها مريم: خلاص فطوم .. اللي رايده ربي بيصير ..
فاطمه: خلاص كيفج.. كنت يايه اقولج عن علي اخويه
مريم: بلاه
فاطمه: اليوم فتن عليه ابويه.. جان يخبره علي انه يبى يرد يدرس هنيه ..
مريم: هيه
فاطمه: جيه تدرين
مريم: ليش يعني
فاطمه: ردت فعلج بارده
مريم: هه ترا هو قايللي الاسبوع اللي طاف..
فاطمه: هييه.. انزين وشو قلتيله
مريم: شو بقوله يعني .. وافقت ولا رفضت تراه خلاص راكب راسه وعزم انه يرد
فاطمه: ابويه تم متغصص . تحيدنه تراج.. قاله ها السنتين اللي ضيعتهن برع شو خانتهن .. و و و الى اخره
مريم: وفالاخير
فاطمه: ماشي اقنعهم علي .. قال بيكمل دراسته هنه ..
مريم: انزين.. وخلاص يعني
فاطمه: هيه..وناسه لاه .. زين والله بيرد اصلن علوه شكله ما بيفلح بعيد عنا..
مريم: حليله.. خلاص عيل الحينه ما شي رقاد فبيتكم ..
فاطمه: من كثر ماترقدين عندنا عاد انتي..
مريم: شو نسوي عاده..الا انتي وين نويتي تدرسين الحينه لاتقولين التقنيه بتنذبحين..
فاطمه: ماعرف .. مريوم انا ماسجلت فالجامعه واذ طلعلي تقنيه مستحيل يحولوني للجامعه
مريم: برايه انزين الواسطه تمشي.. تعالي عندي..
فاطمه: ماعرف والله.. مريوم انا ادبي وابا تخصص فشي فيه كمبيوتر وفالجامعه مابحصل.. امبوني محطيه فبالي التقنيه لاني بقدر ادرس كمبيوتر..
مريم: مادلج والله.. وشميم
فاطمه: حتى شموه ..
مريم: هيه.. زين بالتوفيق..
وفترة سكوت......
فاطمه: مريوم ماداني ها البرود والخمول اللي فيج..
مريم: شو اسوي انزين..
فاطمه: قومي خلينا نحوط برع.. مليت من اليلسه داخل..
مريم: مالي خاطر..
فاطمه: من اسبوع مالج خاطر ماصارت..قومي عاد..
مريم: انزين انزين..انسير بدال حنتج هاي..

ــــــــ في دبي..
كانت مهره طالعه ويا محمد اخوها وبيسيرون واحد من السناتر.. استغل محمد الفرصه وبدى يسولف لمهره عن اللي فباله..
محمد: اقول مهره..
مهره: هاه..
محمد: مب قايلتلي بتخطبيلي يوم بخلص درااسه..
مهره: هيهيهيهي اسولف وياك كنت.. خل امك تخطبلك..
محمد: لا ابا على اختيارج..
مهره: ييه ..
محمد: بلاج..
مهره: انزين شرايك فبنت ييرانا..
محمد: لا لا..
مهره: وحده من بنات عموه..
محمد: لااا..
مهره: امم انزين بنت خالي ..
محمد: ساد انتي بتاخذين ولدهم ..
مهره: انزين ويعني عادي ..
محمد: لا مابا ..
مهره: عيل منو تبى خلصن البنات..
محمد: امبلا فيه وحده.. قلتيلي عنها مره..
مهره: قلتلك!! منو تقصد
محمد: هاذيج.. ربيعتج..
مهره: مايكون مريوم..
محمد: مادري عاده انا .. بنت الشمال هيه..
مهره: ييه.. صدق حمود تباها..؟؟
محمد: مادريبج.. شو تشوفينها..
مهره: ماعليها زوود بنت خليفه .. جمال واخلاق ودلال بعد شو نبى اكثر..
محمد: خلاص عيل.. انتي رمسيها اول..
مهره: غريبه حمود قبل سويتلي طاف ..
محمد: هاهاهاها لاوالله.. بس من كثر ما تتمدحينها قلت ها البنت تصلحلي..
مهره: مادريبك.. خلاص ولا يهمك.. انا برمسها وبشوفها.. وجان لقيت الايجاب منها خبر ابوك وامك عشان يسيرون يخطبونها.. والله ابا افرحبك .. اخويه الوحيد ودي اشوفه معرس .. عفن من العزوبيه..
محمد: هاهاهاها ويا ويهج بعدني حليلي ماكملت 25 وتقولين عفنت عيل اللي عمارهم ثلاثين وماعرسوا شو تقولين عنهم..
مهره: ماعلينا.. المهم اخويه بيعرس واخيرا.. لا وبياخذ الغاليه.. شو ابى اكثر من جيه .. وين بلقى حرمة اخو مثلها..
محمد ابتسم: كيف شكلها..
مهره: يوم بتخطبها براويك صورتها..
محمد: يعني عندج صورتها..
مهره: مالك دخل ..
محمد : راويني احينه
مهره: يلا مناك.. ها اللي ناقص..
محمد تم مبتسم وفخاطره " هه حليلج شفتها على الهوا مايحتاي الصوره "

ـــــــ في عزبة بو علي..
كان علي واقف مجابل حضيرة البوش ومتيمعات النوق كلهن وين هو واقف وهو الا يمسح ويوهن ورقابهن.. سعيد يالس تحت الغافه ويطالع علي ..
علي: حي حي .. ياراالله ها الهايه .. سعود تعرف عيون البراقه شرى عيونك خخخخخ
سعيد: وياويهك.. مستخف دمك تراك..
علي: صدق تعال تأملها...
سعيد: متفيج علوه .. تعال تفيزر هنيه برمسك..
علي: شو تبى..
سعيد: تعال انته..
علي: صبر انزين بحط الهن الجت.. (ودش داخل وحط الجت ..) يلا كلن بالهني ..
(وسار عقب صوب سعيد.. اللي كان يضحك عليه..)
سعيد: والله انك .. تسولف وترمس النوقات .. اتخبلت انته
علي: برايني .. يلا قول شو من العلوم عندك..
سعيد: هيه
علي: ها بلاك..
سعيد: والله ياخوك .. انته تدري يعني سنه وبخلص كليه ..
علي: هيه انزين
سعيد: الصراحه ابا اخطب..
علي: لاوالله
سعيد: هيه زد عني انته
علي: هاهاهاها انزين .. ومنو فبالك..
سعيد: شوف علي.. انا ماعندي غيرك ارمسه .. وانته حسبة اخوها تراك .. واباك ترمسها وتقوللها اني اباها..
علي: حسبة اخوها.. منو هيه
سعيد: ها.. انا اقصد.. مريم بنت عمك
علي انفج من الضحك وقام يضرب بايده على التراب ومب رايم يسكت : حلف انته سعيد: جيه بلاك..
علي: الله يطفسك تراها اخر وحده تفكر فيها ولا نسيت
سعيد: بس عاد علوه هاك ايام اول..
علي: هاهاهاها لاحوول ..
سعيد: علوه اصطلب ورمسني رمسة رياييل..
علي: هااا.. شو رياييل جيه شو تشوفني
سعيد: اشوفك لقينه .. ارمس زين
علي: ويا ويهك.. انزين شو تبى مني.. سير رمس عمي..
سعيد: لالا .. مابا السالفه تكبر .. اول ابا اعرف رايهاا ...
علي: وتباني انا ارمسها..
سعيد: ماعندها اخو غيرك..
علي: هيه احم احم.. ماشالله خواتي قامن ينخطبن وحده ورا الثانيه..
سعيد: انزين ماعلينا.. المهم انا الحينه.. اباك ترمسها وتردلي خبر..
علي: يالله اتلوم سعيد..
سعيد: غيرك الله .. ماحيدك ..
علي: انزين .. ماعليه بشوف..
سعيد: علي خلال ها اليومين.. والله احس مؤامرات مستويه فبيتنا .. ابا اعرف رايها عشان ارمس ابويه قبل مايحط فباله بنت اخوه..
علي وهو يفكر فرمسة سعيد: انته رايدنها بنت عمي ولا حد قالك عنها ولا شوه
سعيد: شوف علي.. نفس انته ماتحق عليها ترا انا نفس الشي .. هيه حسبة بنت عمتي واللي يمسها ايمسني .. والصراحه انا اباها .. ما جد قلت حق أي حد ها الرمسه .. كنت اتريا لين اتخرج عشان امايه تخطبها ليه بس الحينه خفت أي حد يخطبها واطير مني.. فبيغتك ترمسها ..
علي: والله مادري.. وانا اقول ها الود اللي نزل عليك فجأه ثره مب من شي..
سعيد: بس بس عاد..
علي: والله حاله.. ناس فحب وناس فطب..
سعيد وهو يقوم: اخبرك قم قم .. مب ويه حد يعتمد عليه انته..
علي ايوده من ايده: افا عليك بس انته .. خلاص بن عمتي من اشوفها بقوللها ..
سعيد: هيه جيه الناس.. يلا قم انزين
وروحوا الشباب من العزبه وكل واحد شاقله حلجه من الضحك .. علي كان مستانس لانه خلاص بيرد يدرس هنه وابوه رضى خلاص .. وسعيد مستانس لانه تقدم خطوه فدربه الطويل .. وما غير كمن يوم ويعرف شو مصير عشقه..
عقب ماروحوا سعيد وعلي من العزبه تموا يحاوطون وعقب وصل سعيد علي بيتهم ..
سعيد: علوه هب تنسى اللي قلتلك اياه
علي : شو قلت ثرك..
سعيد: والله يا علوه يا ارشك بها العصا..
علي: هاهاهاها افا عليك بس انته.. خلاص و لا يهمك ..
سعيد: يلا عيل سكر الباب وفارج..
دش علي بيتهم وهو عينه ع بيت عمه .. يا الزمن الحينه ربيعه ورفيق عمره يبى مريم بنت عمه .. ها الحب اللي نزل عليه بسبت مريوم !!.. ياه مثل الخاطر اللي خلاه يشكك بهم ولكنه تعوذ من بليس وعق من باله أي فكره غلط .. لانه ثقته فسعيد وفمريم ماتسمحله انه يصدق شكوكه..
اما سعيد فمن وطى علي وهو ذهنه شارد .. يفكر فرد مريم وشو بتقول.. يفكر هل هيه تحبه او اتكنله أي مشاعر .. هو ما جد احتك وياها .. ما جد سولف وياها كلمتين على بعض .. نفس حالتها .. وده يقولها كل اللي فقلبه من غير قيود .. بس كان يطمن باله ويقول هانت راح الكثير ومابقى الا القليل..
رد البيت على الساعه وحده وهو يصعد حجرته انتبه انه حد فالصاله ودش ..
سعيد: شيخوه .. شو تسوين
شيخه: شو تشوف .. اطالع التيلفزيون
سعيد: وياويهج يالسه بروحج مادرتبج امايه ..
شيخه: غافلتها .. ترييتها ترقد ونزلت ..
سعيد: والتيلفزيون فوق شو بلاه
شيخه: حد قالكم ماتسحبون واير الشوتايم فوق .. مخلينه عربسات قحط..
سعيد: حمدي ربج انتي.. امايه ناويه تخوزه ها الشوتايم ..
شيخه: ياسلاام ونحن شو نطالع
سعيد: مب لازم اطالعين .. شو مسفيده من ورا ها التيلفزيون
شيخه: لاحوول.. على الاقل اقضي وقتي.. هيه شعليك انته هياته طول الوقت .. وانافالبيت متفيزره
سعيد: حرام عليج وين هياته .. جني فالدوام طول الاسبوع ..
شيخه: انزين .. وين كنت انته
سعيد: ليش..
شيخه: بس سؤال..
سعيد: كنت فالعزبه ...
شيخه: هيه .. ومتى بتطلع اجازتك..
سعيد: ماعرف.. انا بسير ارقد يلا قومي جدامي..
شيخه: يوم بيخلص الفلم..
سعيد: قومي احسلج عن تخليني اخذ الواير واحرمج التيلفزيون
شيخه: افف مب حاله هاي..
سعيد: يلا ..
شيخه: انزين انزين..
وسار كل واحد حجرته .. سعيد تم طايح ع الشبريه يجلب ومب ياينه نوم .. شيخه بعد مب رايمه ترقد بعدها فاول السهره اطالع الكمبيوتر ويايه بتشغله عساس ادش النت بس لاعت جبدها ماداني شي اسمه كمبيوتر شو تبابه .. طلعت من حجرتها ودقت الباب على اخوها..
شيخه: حووه رقدت
سعيد: شو تبين
شيخه: ماياني رقاد
سعيد: وشو اسويلج
شيخه: بسولف وياك..
سعيد: تعالي انزين..
شيخه: شو كنت تسوي
سعيد: احاول ارقد ودقيتي الباب وطيرتي الرقاد .. بس شو بسوي..
شيخه: بلاك انزين انته.. داش علينا تحارب ..
سعيد: شو احارب بعد..
شيخه: شي مغصصبك
سعيد: لا

شيخه: مايكون ابويه قالك
سعيد: شو قالي
شيخه: عن سالفة بنت العم
سعيد: لا ماقال.. جيه بلاها
شيخه : هاا.. يعني ماتدري
سعيد وهو ييلس ويطالع شيخوه: جيه شو مستوي
شيخه: مادري مادري
سعيد: قولي شيخوه ..
شيخه: ابويه اظني رمس عمي عنك وعن عايشه
سعيد: شوووه
شيخه: مادري يمكن ماعرف..
سعيد: وشله يرمس من غير مايقولي .. جيه مب ريال ياخذ رايي ولا هيه سبهلله
شيخه: ايه سعود بلاك حرجت..
سعيد: انتي وامايه تعرفن رايي من زمان .. شله ماقلتوله اني ماباها
شيخه: امايه قالت وانا قلت .. بس ابوك خلاص محطي فباله
سعيد: لاوالله وانا سمنديقا هنه ..
شيخه: انزين لا تزاعج عليه .. انا شو يخصني..
سعيد وهو يقوم من الشبريه: يووهوو .. الحينه لو قلتله مابا بيقول قلت لعمك وعطيته كلمه .. يا ربيه
شيخه: انزين انته بلاك .. اذ انته ماتباها رمس عمي .. عمي بيتفهم ..
سعيد: لا والله ابوج نفس ماقال هو يطلعني .. وين تبيني اسير لعمي واقوله اسمحلي مابا بنتك .. شو بيقول عني
شيخه: انزين وانته ثرك منو تبى .. بلاها بنت عمك زينه ..
سعيد: جب شيخوه .. مالج خص فمنو ابا ومنو مابا .. وبنت عمي على عيني وراسي بس انا ماباها ..
شيخه: كيفكم انا غاسله ايدي من سالفتك .. لا بقول ولا برمس مالي شغل ..
اذكرني قبل قلتلك سعيد منو فبالك قلبك حاب حد طنشتي وماسويتلي سالفه .. واظني حددتلك البنت وبعد طنشتني .. كيفك تحمل عاده انته ..
سعيد: شو تقصدين
شيخه: قصدي واضح يا مجنون مريم
سعيد: عنبو ذا الراس ..
شيخه: هاهاهاهاها قول بعد ماتحبها..
سعيد: هيه ماحبها .. اللي فبالي وحده غير .. ارتحتي
شيخه وهيه اطالعه باستنكار: احلف
سعيد: مب مجبور..
شيخه: يعني تحب صدق ..
سعيد: هيه احب واهوى بعد
شيخه: ومنو هيه..
سعيد: يوم بي وقته بقولج منو هيه..
شيخه وخت براسها وهيه تفكر .. الحينه ها المده كلها و هيه تتحراه يحب مريم وفالاخير يطلع يحب وحده ثانيه.. انزين منو هيه ..
سعيد: شيخوه بلاج
شيخه: ها .. ماشي..
سعيد: والحل الحينه شو اقول لابويه
شيخه: مادريبك.. انته ابويه رمسه بالهداوه والطيب.. وبيتفهمك .. بس قولي من بنته هيه
سعيد: قلتلج يوم بيي وقته بتعرفين..
شيخه وهيه تقوم : زين عيل .. بنتريا وبنشوف.. (وهيه يايه بتطلع) ابند الليت
سعيد: وين مروحه..
شيخه: بسير حجرتيه .. يلا تصبح على خير..
سعيد: عقب ماغصصتيبي تبين تروحين .. وانا شو اسوي..
شيخه: سعود لاتم تفكر .. انخمد ..
سعيد: يلا انزين خاري .. مامنج فايده..
وطلعت شيخه من حجرته وصكت الباب بقو .. وروحت وهيه تفكر فسعيد ومريم .. معقوله شكوكها كلها غلط.. اول شي اكتشفت بانه مريم عادي عندها ولا يهمها سعيد واليوم تكتشف انه سعيد يحب وحده غير عن مريم .. " يووهو شله عاقه عمري فها الدوامه.. لازم يعني غصب يحبون بعض شو ها العقل اللي عندي افف .."شيخه وهيه تحرطم على عمرها...
وسعيد مجافنه النوم وخصه من عقب ما سمع رمسة شيخه.. الحينه شو بيسوي بها المشكله .. هو رمس علي وابوه رمس عمه .. شو بيكون موقفه اذ درى علي .. شو بيقوله .. والاسوء لو درت مريم .. عزم انه يرمس ابوه وعمه بس ماعنده الشجاعه الكافيه.. مايعرف كيف يقوللهم.. مايبا يخسر مريم وهو بعده ماضمن انه يفوز ابها..

ــــــ بالباجر فبيت بو علي..
فطوم يالسه ويا امها الضهر ويتناقشن سالفة دراستها .. طب عليهن علي ويلس وياهن..وشاركهن المناقشه..
علي: خسج الله .. تبين التقنيه ها..
فاطمه: هيه ابا التقنيه ..
علي: ها النسبه وتقنيه صدق ماعندج سالفه..
فاطمه: شو اسوي يعني ادش شي انا ماباه مابروم افلح فيه..
علي: كيفج ابوي.. بس تبين نصيحتيه الجامعه احسن واضمن..
ام علي: انزين قلنالها ماطاعت .. اذ ماتبا العين جامعة عيمان..
علي: هيه ولا الشارجه فنانه..
فاطمه: مابا ..
علي: نسره والله انج..
ام علي: خلها يبوك يوم هيه وشموه معزمات ع شي محد بيردهن..
علي: هلا والله .. شموه بعد .. وانا اتحراها اعقل عنج وتفكر فمستقبلها زين .. صدق انكن .. النطيحه والمترديه ..
ام علي: هاهاهاها حسبي الله على بليسك .. وحليلهن خواتك ..
فاطمه: ها اللي رمتي عليه امايه .. يسبنا وتضحكين .. مشكوره امايه
علي وهو يقوم : ما سبيتكن .. اقول الصدق .. عنبوه نسبكن شحلاتها وفالاخير تقنيه..
فاطمه: علي نقطنا بسكوتك بليز..
علي وهو يروح عنهم وقف ورا الغنفه اللي عليها فطوم وضربها على راسها..
فاطمه: والقووم .. تعرفهم ..
علي: هاهاهاها لا ماعرفهم .. اقول فطوم بتيلسن برع فليل انتي ومريوم
فاطمه: ليش يعني
علي: ابا اسولف ويا مريوم شويه حرام..
فاطمه: ماظنتي اليوم.. ربيعتها مال دبي بتيها..
علي : يحيهم .. اكيد بوجسوم بيي عيل.. زين عيل (وجلب بويهه )
ام علي: وين بسير ابويه..
علي: بسير حجرتيه ..
فاطمه: امايه بسير بيت عمي انا..تبين شي..
ام علي: عز القايله .. صبري لين العصر..
فاطمه: لا لا بسير افازع مريوم .. ربيعتها بتي العصر..
ام علي: هيه .. انزين طالعي على فهد قبل ما سيرين ..انا بسير ارقد..
فاطمه: فهد سار بيت عمي
ام علي: غربلله بليسه متى سار .. توه يقولي بيلعب سوني..
فاطمه: هيهيهيهي يخرط .. تلقينه يعلب ويا علايه..
ام علي: لاحول ولا قوه شو بسويبه ها الفريخ انا .. زخيه امايه جان لقيتيه فالسكه خليه يرد .. بدقهم الشمس..
فاطمه: انشالله ..
وسارت فطوم وكالعاده لقت اليهال يلعبون برع وزختلهم العصا وحوشتهم داخل البيت وعقب ردت بيت عمها ..ويوم وصلت لقت حصوه مطيحه جدام التيلفزيون ..
فاطمه: هبي حصوه ماباقي الا ادشين فالتيلفزيون ..
حصه وهيه اطلع فطوم: اوه كبشة القايله يت .. موعدها الضهر..
فاطمه: لاوالله ..
حصه: هاهاها هيه ومريوم عنز القايله ..
فاطمه: قمتي تنكتين حصوه..
حصه: هاهاها يلسي يلسي شله واقفه..
فاطمه: لا بسير عند مريوم وينها؟
حصه: هيه عاد نستنا الحينه ..
فاطمه: لاوالله .. بس بعد هاي مريوم..
حصه: انزين انزين.. بتلقينها فالمطبخ..
فاطمه: يحيها بنت عمي من الحينه .. بعدها البنت بتي العصر..
حصه: مايحتاي عاده الحينه هيه اللي اطبخ..
فاطمه: عيل شو تسوي..
حصه: تشرف الا ..
فاطمه: هيه.. زين عيل بسيرلها..
وسارتلها المطبخ..
فاطمه: والحزن شو ها كله .. ها كله بتاكله مهروه يعني
مريم: هيهيهيهي شفتي عاد . لا وكله من عمل ايدي..
فاطمه: لاوالله.. قصي ع بتاني هب فطامي..
مريم: هاهاهاها حلللوه .. ع الوزن والله
فاطمه: ييه بعد كيك هوت بريد .. جيه ماسويتي بروحج
مريم: ماروم .. (وترمس البشكاره) جين العصير يوم بييبه الدريول حطيه فالثلاجه اوكي.. وسوي ثلج هب تنسين..
فاطمه: متعبله جنها اول مره اتيج..
مريم: ماعلينا.. خلينا نسير.. عايفه عمري تراني ابا ادش اسبح ..
فاطمه: واوني يايه افازعج..
مريم: خلاص خلصنا كل شي .. قلتلهن شو يسون على العشى وبنرد عليهن العصر..
فاطمه: متى بتيج هيه
مريم: مادلها قبل المغرب يمكن.. ع حسب اخوها ..
فاطمه: يعني بتي مخصوص لج ..
مريم: هيه عيل.. من يومين وهيه حاشرتني تبى تخبرني سالفه مادري شو عندها..
فاطمه: يحيها.. متى بتملج هيه
مريم: يمكن نهاية الصيف .. خطيبها متخبل شرات بعض الناس عندنا..
فاطمه: جب مريوم..
مريم: هاهاهاها انا قلت شي..
فاطمه: زين يبوج يوم فرديتها وضحكتي.. من اسبوع وانتي ماده البوز
مريم: ردينا فطوم.. قلنالج بس لاترمسين
فاطمه: لاحول ولاقوه محد بيخبلبي غيرج..
مريم: اخبرج..سيري يلسي ويا حصوه بسير اسبح
فاطمه: اوكيك..لا تتأخرين عاده..
وسارت فطوم عند حصه ولقتها على طيحتها..
حصه: جيه وين مريوم عيل
فاطمه: سارت تسبح.. شو ها حصوه ارحمي عمرج من ها التلفزيون..
حصه: شو بسوي يعني.. ماشي شغله..
فاطمه: الله يعينا عليج .. جنج الا دوم بتمين مطيحه جدام التلفزيون.. انزين فازعي اختج فالمطبخ..
حصه: بالله عليج فها الصيف حد له بارض يسوي أي شي..
فاطمه: مالت عليج الا.. عنبوج ماتحركين ساكن .. شو خانتها البنت جيه ..
حصه: ييها علينا.. برايني انزين..
فاطمه: علي مايداني اللي جيه.. يباله وحده حركيه..
حصه: فطوم بقوملج قومه الحينه اروم ماروم.. شو مشتغلتلنا شغل العيايز انتي اليوم..
فاطمه: هاهاهاها ويا ويهج.. من متى ماييتي بيتنا ليش
حصه: بس جذه
فاطمه: علينا..
حصه: هيه عليج..
فاطمه: وتقول استوى عادي..
حصه: جب انزين.. الا رمسه .. جيه تتحريني شراتج
فاطمه: جيه وانا بلايه
حصه: هيهيهي ما بلاج..
فاطمه: بنات عمي عفت تنغيزكن تراني..
حصه: وياويهج الا نسولف لاتاخذينها جد.. ( ويلست عدل وجابلت فطوم..)
فاطمه: يلا ماعلينا.. بنملج قريب وانتي واختج مابتيسرن تقولن شي..
حصه: اييه انتي صدق تبين تملجين
فاطمه: ليش لا.. احمد مستعيل..
حصه: يحيكم.. وحليله احمد وايد يحبج.. لاتفرطين به مول..
فاطمه ابتسمت: احمد وافرطبه .. احمد فعيوني وقلبي ولو فيوم قدر الله انه يباعدنا عادي يكون اخر يوم فحياتي..
حصه: ياسلام ها الكثر تحبينه
فاطمه: ماعرف حصوه .. بس احمد هو محور حياتي.. قلبي متعلقنه من انا ياهل ..
حصه: فطوم كيف عرفتي انج حبيتيه.؟ كيف تحبينه.؟ امم كيف الحب
فاطمه: هيهيهيهي شو ياج حصوه
حصه: ابا اعرف شو الحب..
فاطمه: ليش يعني .. افهم انج ماتعرفين اذ انتي تحبين علي ولالا
حصه : يعني مادري.. انا عادي عندي احس.. صح علي احبه واستحي منه بس عادي.. يعني امبوني احبه .. عاادي
فاطمه: يعني.. ماتحسين بقلبج يدق يوم تشوفينه
حصه: ماعرف فطوم.. بس اني اتلوم منه
فاطمه: حصوه .. يوم مابترومين لعواطفج ويوم تتمنين تشوفين حبيبج ولو للمحه ويوم تحسين انج ماتقدرين تعيشين بدونه ولا لحظه عرفي انج تحبينه..
حصه وخت براسها وكأنها تفكر بشي وتمت ساكته..
فاطمه: وييوي بلاج
حصه: يعني انا ماحب علي!
فاطمه: كيف يعني
حصه: مادري
فاطمه: فيه غيره فقلبج
حصه: ماعرف .. بس انا مب عاطفيه جيه مثلج ..
فاطمه: هيهيهيهي انزين انا غير عنج.. يمكن عواطفج بتتحرك يوم بتكبرين شويه.. بعدج ..
حصه: فطوم انا اصغر منج بسنه الا .. يعني عادي السنه اليايه اسمعهم يقولون يبون يملجون
فاطمه: هاهاهاها لا لا ماعليج.. علي بعده صغير تريي خمس سنين جدام..
حصه: احسن بعد..
فاطمه: شكلج مب مرتاحه للسالفه؟
حصه: يمكن...
فاطمه: جيه يعني شو بلاه علي
حصه: والله مابلاه شي... انتي اكثر وحده تعرفين انه على عندي فوق الكل .. بس بعد يعني .. هو مب من نفسه قال ابا حصه .. وانا ماكنت متوقعه ها الشي يعني مول مادار على بالي انه ممكن اكون لعلي.. فهمتي
فاطمه: ماعرف و الله.. انتي استخيري لربج .. وحزة هذاك الوقت محد بيقولج شي لو قلتي مابا..
حصه: ابوج مابيزعل؟؟ وعلي مابيحط فخاطره.؟
فاطمه: ابويه اكيد ما بيزعل بس علي مادله..
حصه: افف خلاص غيري الموضوع.. عفت السالفه مابا افكر..
فاطمه: انتي اهتمي للثانويه الحينه وطبي الرمسه ..
حصه: يصير خير.. اممم باجر بيي خطيبج
فاطمه: هيهيهي حلوه هاي خطيبي..
حصه: انزين بيي؟
فاطمه: هيه
حصه: انتي شدراج..
فاطمه: مساعه لقيت احمد ع المسن وقالي..
حصه: ياحيه .. وعموه وعيالها .؟
فاطمه: مادري اكيد بيون
حصه تبتسم : زيين والله..
وكل وحده صكت حلجها وتمن يطالعن التلفزيون
مريم وهيه يايه بتنزل دقتلها نوره .. يلست ع الدري تسولف وياها ..
مريم: جيه مب راقده الحينه
نوره: قبل شويه قلت بوطي راسي وعى زايد ..
مريم: فديته انا .. ملعوزنج..
نوره: شو نسوي ..
مريم: متى بتون عااد..
نوره: مادري والله يمكن نص الاسبوع الياي .. الكل بيسافر واكيد بنيي..
مريم: والله ..
نوره: هييه ..
مريم: فديييتج انا ..
نوره: الريم..
مريم: عيوونها..
نوره: مابتقوليلي شو فيج
مريم: شو فيني .
نوره: من كم يوم مب عايبتني تراج..
مريم تمت ساكته...
نوره: قولي مريوم..
مريم: ماشي نوره ..
نوره: اكيد سعيد ..
مريم: ممم هيه
نوره: بلاه..
مريم: ماشي.. سعيد خطبوله
نوره: منوو
مريم: بنت عمه ..
نوره: وانتي
مريم: بلاني..
نوره: ها اللي مضايجبج كان..
مريم: .......
نوره: فديتج .. انزين هو من نفسه يبى بنت عمه.؟
مريم: ماعرف .. فطوم تقولي لا.. بس مادري قلبي مب مرتاح..
نوره: شدراني يا الريم .. مابايدي شي اسويه..
مريم: لاتشلين هم فديتج.. خلاص اللي الله رايده بيصير..
نوره: مريوم اذ هو يفكر فيج ماظنتي يتراجع ..
مريم: الله يسمع منج..
وتمت نوره تعطي مريم من النصايح وتشجع همتها .. من عقب ماسكرت عنها مريم حست ببعض الراحه .. نوره فاهمتنها وفاهمه قلبها .. كلمه من نوره تخلي مريم مستانسه .. من بعد رمستها ويا نوره حست بشي من الطمأنينه .. وتفاءلت بالخير.. وعقب نزلت عند البنات.. وعلى شوية رمسه لين اذن العصر وعقب سارن يصلن وكل وحده سارت تتعدل وعلى الساعه ست يتهن مهره..
تمن سوالف وياها وتنكيت حتى انه مريم حاولت قد ماتقدر انه مشاعر الحزن ما تسيطر عليها عشان مهره ماتلاحظها..وبعد فتره طلعن حصه وفاطمه من عندهن .وتمن هن برواحهن يسولفن عن الجامعه ومهره تحاول ادش بالسالفه بس مب عارفه كيف .. وفالاخير توكلت ورمست..
مهره: مريوم..
مريم: هلا
مهره ابا ارمسج بسالفه
مريم: من اول ماييتي واقولج قولي اللي فخاطرج..
مهره: ماتنقال جدام البنات.. بيني بينج هيه
مريم: يلا انزين شو ها السالفه اللي حاشرتنا بها..
مهره: احم احم.. مريوم شرايج فاخويه
مريم: منو اخوج
مهره: بعد كم اخو عندي
مريم: المصري
مهره: غربالله ها الراس..
مريم: هاهاهاها انزين سوري.. محمد اخوج؟
مهره: هيه
مريم: وليش يعني رايي .. لا اعرفه ولا شي كيف بقول رايي
مهره: انزين من سوالفيه عنه .. من شخصيته..من شكله
مريم: خيبه.. ليش يعني..
مهره: انزين انتي قولي
مريم: مادري مهروه.. بس من رمستج عنه.. ماشالله يعني ريال يعرف ربه وطموح وراعي سوالف وعن شكله تراه هاندسم
مهره: اوووووكي وصلنا عيل.. شرايج به كزوج
مريم: فنان جان بيتم جيه بيكون زوج مثالي.. بس جيه بيعرس هو؟
مهره: هيه يبى
مريم: يحيه وانا شخصني اقيم شخصيته .. خلي خطيبته تقول رايها فيه
مهره: انزين وقالت
مريم: متى
مهره: توها وهيه ماتدري
مريم معقده الحيات: مهروه رمسي عدل..
مهره: هاهاهاهاها انزيين.. يا ست الحسن والجمال تراه وقع الاختيار عليج انج تكونين زوجته المستقبليه
مريم: نعم
مهره: هيه.. وبعد مب انا اللي قلتله هو بنفسه قال ..
مريم: وشعرفه فيني
مهره: مريم بلاج عوذ بالله .. يعرف اهلج ويعرف انج ربيعتيه ..
مريم تمت ساكته بعدها مب مستوعبه الرمسه..
مهره: بلاج سكتي..
مريم: ها .. لا ماشي..
مهره: مريوم نحن نباج ومحمد يباج .. لاترفضيين
مريم: مهره .. مب مسألة ارفض ولا لا..
مهره: انزين لا تعطيني رايج من الحينه .. فكري زين .. وعقب رديلي خبر..
مريم: مهره..
مهره: جب ولا كلمه .. خلاص انا قلتلج اللي فخاطريه .. ومحمد مب مستعيل بس يبى يعرف رايج بالاول قبل مايستوي كل شي رسمي..
مريم: بس انا .. هذا.. شسمه ..
مهره: اووهو يتها الحاله .. ضارين على رمستج المنقعه يوم ترتبكين .. هاذن البنات ين.. لاتقولين لحد السالفه
مريم: انزين..
وتيلست فطوم حذاهن وفجت ها اللغب ومن سالفه لسالفه ومهره هلكانه من الضحك على سوالف فطوم ومريم جسم بلا روح وياهن .. بالها مشغول وفكرها مشوش .. شو ها البلشه هيه سعيد ومب لاقيه حل لنفسها وياه بعد واحد ثاني.. قامت تفكر شو بتقول لمهره كيف بتقوللها اسمحيلي مابا اخوج انا احب! بتتفهمها ولا بتزعل منها لانها بترد اخوها .. تمت مريم محتاره ماعطت لنفسها انها تفكر على طول قلبها قالها لاا.. محد يدور محل سعيد فالقلب..
فاطمه: وييوي بنت عمي ياللي ماتستحين تسرحين وانا هنيه ..
مهره: اللي ماخذ عقلها يتهنابه ..
مريم: شو؟
فاطمه: ييه وين كنتي
مريم: هنيه..
فاطمه: هيه باين .. مهروه لا تواخذينها وحليلها منشغله فالجانب العاطفي شكلها ..
مهره: بل .. ماوحيلها.. (وضحكت..)
مريم: ايه عن السخافه الزايده انتي وهيه ..خلينا الجانب العاطفي حق اللي بيملجون قريب..
مهره: هيهيهيهي الكلام لج يا جاره..
مريم: ولج انتي بعد يا حلوه ..
فاطمه: هيهيهيهيهي واحد – صفر
مهره: احترق تراه ويهي ..
وتمن يضاحكن ودخلت عليهن حصوه وياها حمودي اخوها .. قابض بايدها ومتلوم اونه من مهره ..
مهره: فديييته حماااده .. تعال حبيبي..
وفج محمد ايده من حصوه وطلوق فأحضان مريم..
مهره: انا اللي زقرتك .. شو تباها هاي النسره
مريم: محد غيرج.. فديته اخويه يحبني ويباني..
فاطمه: حموود قوم راو اهل دبي يولتك .. قوم يلا..
مريم: يلا حمودي يابس..
وقامت حصه تغنيله وتصفق عشان يشجع حمود وايول .. ونفخ بعمره عاد حمودي وهو يشوف الكل يتفداه ويقوله يلا يابس وقام الا يهز الراس ويرفع ايده ويسوي حركات اونه ايول ..
فاطمه: حموودي سعييد شو يسوي.. راوهم يلا..
محمد: ثعود بو كثه ..
حصه: هههههه هيه بو كشه ..
مريم اطالعهن بعين وهن ولا عليهن وطاباتنها ..
وعيبته حمود السالفه ويلس وقام يرفع الراس وينزله والشعر يطاير ..
مهره: وااافديته انا .. شو ها التييبيس محد يرومله ..
فاطمه: محد غير ولد خالي والنهم هو وفهود ويعلمهم اليوله ..
مهره: اون .. جيه واخوج وين سار عنهم ..
حصه: لا بس سعيد محد يرومله ..
مريم وهيه تحيس البوز: مادري منو كان يعايني قبل احمد رزفته احلى ولا علي يوم بيرزف بيسكتهم .. مالت عليكن..
فاطمه: ههههههههه طاعوا هاي.. زين يوم تنطقتي انتي يبوج..
مريم: جب انزين..
حصه: ول بلاها استوتلنا ثور اسباني..
مهره: هاهاهاهاهاا حللوه .. ثور اوا..
مريم: أي راااسي .. يا ويلي كم بتحمل من السخافه بعدني .. اخبرج مهروه انا بسير احطلج العشى ..
مهره: والخيبه جنها تبى الفكه .. يا ميه مشكوره مابا عشاج بدق لاخويه وبروح بكرامتيه قبل ما انراغ..
حصه: افاا مايطيع زينج .. مريوم يلسي انتي ويا ربيعتج ثقلنا عليكن انا وفطوم.. نحن بنحط العشى..
مريم: ماشالله على خويتيه مادري من وين يابت ها الذرابه..
فاطمه: اكيد مني..
مريم: بس بس فجت اللغب هاي..
فاطمه: فقت ها الراس.. قومي حصوه ..
وعقب بشويه دشن البنات والبشاكير وحطن العشى ...وعقب العشى بنص ساعه تقريبا دق محمد لمهره وتخبرها اول شي شو قالت مريم.. طبعا مهره مارامت اترد عليه لانه مريم حذالها.. وقالها انه بيي بعد شويه يشلها..
مريم: اخوج!
مهره: هيه اخويه عقب شويه بيي .. اسمعه يقولي انه ويا علي ولد عمج الحينه..
مريم: اهااا.. اقول بتروحون على طول دبي
مهره: هيه عيل.. نحن يايين خصوصا حقج ما لفينا لا منيه ولا مناك..
مريم: هيه معلووم.
مهره: مريوم ماشفت علايه وينها..
حصه: علايه عاد.. سلمي عليها علايه.. خذت اطباع الحبيبه من بيت لبيت مول ماتنشاف..
فاطمه: هيه وفهود اخويه .. والله يومياتهم فنتكه .. من يصبحون يتركبون ويا ابويه ويسرون الضواحي .. والضهر فالسكه يلعبون.. والعصر يسيرون العزبه ويلفون على الزروب ويا عمي.. وعاده فليل يردون خلب وينطبرون..
مهره: هاهاهاها ماشالله عليهم ..
حصه: لا وحمودي اخويه بعد قام يسير وياهم العصر..
مريم: عوذ بالله منكن .. خلنهم يستانسون..
فاطمه: والله يذكروني بعمارنا يوم كنا صغار.. تذكرين مريوم.. عاده نحن شله شكبرها.. انا ومريوم ونوره وشموه وعلي اخويه ومرات ولد خالي ..
مهره: يحيكم .. والله هنيه حياتكم فن هب نحن .. اذكرني يوم كنت صغيره احن حن على قوم امايه عشان يخلوني ابات بيت خوالي..طعم الها الحياه هنه
مريم: محلات الشمال والله.. مايروم الواحد يصبر عن الجو هنه..
مهره اطالعه وهيه رافعه الحايب: هاا.. لا ماعليج بيروم انشالله ..
مريم قفطت وتمت ساكته..
ويوم يا محمد طلعن البنات كلهن فالحوي يوصلن مهره لين الدروازه..ويوم روحت ردن البنات داخل وفطوم شلت بعمرها وردت بيتهم ...

طلعت مريم حجرتها .. ماقدرت تيلس ويا امها وابوها .. لبست بيجامتها وطاحت ع شبريتها وادثرت .. تمت مغمضه عيونها بالقو عشان ترقد وتفتك من التفكير اللي مسببلها الارق..ادور فبالها رمسة مهره وتغمض عينها بقو عساس ما تفكر ويرد سعيد فبالها .. تمت متغصصه مب رايمه ترقد الا تجلب .. قامت وتمت الا سايره راده فالحجره .. طلعت من الحجره وسارت عند حصوه اختها لقتها اطالع التيلفزيون فالصاله الفوقانيه وطاحت ع الغنفه الثانيه وتمت اطالع وياها .. ومن غير ماتدري غافلها الرقاد ..
حصوه يوم انتبهتلها انها راقده تعايزت توعيها ويوم خلصت سهرتها وعتها ووصلتها لين حجرتها ولحفتها وظهرت من عندها وسارت هيه تنطبر..
ـــــ بالباجر في بيت بو حمدان ..
شما كانت يالسه فالصاله تتريا حمدان اخوها ايي من فوق ..
شما: يزويه يلسي لاتخربين شعرج ماروم اسحيج ..
اليازي: بتوديني عالم فتون
شما: بوديج بس تمي مؤدبه .. اوهو وها بلاه تأخر .. حمدااانوه يلا انقفض..
وزخت تيلفون البيت ودقتله ع الموبايل بس سكرت يوم شافته داش الصاله ..
حمدان: يلا قومي حشرتينا..
شما: مابغيت.. يلا يزويه قومي..
حمدان: بسرعه ركبن عن ايون خوانج ويلصقون فينا..
شما: وين ساير بعدك..
حمدان: انتي سيري .. الحينه بيي..
وطلعت شما برع وخلت الدريول يشغل السياره .. وتركبت هيه واختها.. ويا حمدان
حمدان: حوه وين راكب انته يلا انزل..
الدريول: شو نزل ..
حمدان: يلا انا بسوق ..
شما: تهبي الا انته حمدانوه
حمدان: لاوالله ..
الدريول: يلا ركب .. انته واجد مشكل انا فيه خبر بابا..
حمدان: وييه مامااه .. تراني زغت..
شما: يا الهرم انته.. اركب وخلصنا..
حمدان وهو يطالع الدريول بنص عين .. وسكر الباب بقو ورد الصوب الثاني وركب..
ويوم وصلوا المنار مول نزلوا تموا يتحوطون شويه وحمدان يتأفف يباها تقفض اشغالها وشما مب عايبنها شي .. تبى تاخذ هديه لفطوم لنجاحها ومب عارفه شو تاخذ ..
حمدان: اخبرج خذيلها عطر..
شما: لاوالله .. البوكس شكبره بحط فيه بس عطر حلوه هاي..
حمدان : دشي دشي هنه يبيعون عطورات فن هاذيلا.
شمااطالع اخوها بنظرة سخريه: الله يعينك يا خويه .. ولا محل تعرف اسمه .. شو تعرف انته..
حمدان: اخبرج دشي انتي خذي اللي تبينه .. لاتطلعين لين ايي ..
شما: وين بسير حظرتك..
حمدان: هنه ها الحين ياي..
شما: فتضح عنبوك .. المول يزاوع من الشباب وانته تبى تخليني بروحي..
حمدان: الحينه بيي انزين ..
ودشت شما باريس غاليري .. تمت تطمش واطالع مب عارفه شو بتاخذ لفطوم ..عيبتها ساعه ورفعت الغشاه شويه عساس تطالعها .. فها اللحظه دش كائن بشري المحل وعيونه مصوبات على شما .. شما حست ببياض كندوره وبدون ماترفع راسها نزلت غشاتها بسرعه ووطت الساعه وقبضت اختها وشخطت برع المحل .. قامت تتلفت يمين شمال مب عارفه وين اخوها .. ودها لو تلقاه تسطره بكمن كف .. وانتبهت انه فالكوفي اللي مجابل باريس غاليري تمت موقفه مب ياسره تسير هناك .. اجدمت شويه يمكن يشوفها وايي .. ومالقت غير انها اطرش يزويه تزقره .. وهيه سايره صوبه كان هو راد وشل اخته ورد عند شموه ..
شما: انزين انته دواك فالبيت..
حمدان: يلا انزين مشي..
شما: وين كنت ساير..
حمدان: لقيت ربعي وسرت اسلم عليهم..
شما: ماعليه انزين .. خلاف خلنا انرد نشتري الساعه..
حمدان: بعدنا .. ردي الحينه..
شما: جب المحل انترس شباب ..
ومشوا فسيدهم ودشوا نكست .. تمت شما تنعفل وادور بديات حق فطوم..وحمدان يطالعها ويتأفف ..

أما الكائن البشري فمن طلعت شما من المحل قبض تيلفونه واتصل بربعه..
عبيد: علوه وينك انته ..
علي: انته وين ..
عبيد: هنيه فباريس غاليري..
علي: نحن الحينه داشين المول..
عبيد: من أي بوابه..
علي: صوب كارفور..
عبيد: زين الحينه ياينكم..
ويوم تلاقوا الشباب..
عبيد: فاتكم والله .. قبل شويه وحده صااااارووخ صاارووخ ..(وقبل مايكمل رمسته قطع عليه سعيد..)
سعيد: ايييها .. بديت انته .. ارحم عيونك يبوك..
علي: وين لقيتها بعد هاي..
عبيد: يازينها يا علي.. ماعليها كلام.. تشتري ساعه كانت .. خلنا اندورها
سعيد: بتعرفها تراك..
عبيد: هيه كانت وياها بنيه صغيرونه ..
علي: غربلك الله جان بنتها..
عبيد: يالله ينعرف .. شكلها صغير هيه
سعيد: طاع انتو.. عبيد اسمحلي اقولك ماعندك سالفه تراك .. متى بتصطلب..
علي: خله يبوك يعيش مراهقته..
سعيد: جيه المراهقه لازم بالمغازل.. ها نحن راهقنا ولا سوينا سواياه..
علي: نحن رياييل..
عبيد: مايحتاي رياييل... سكتوا الله يخليكم ..
وساروا الشباب صوب ستار بوكس .. علي انتبه لوجود شخص يعرفه .. كان حمدان واقف برع نكست وهو بعد انتبه لعلي .. وتجدموا كلهم صوب بعض وتوايهوا..
علي: وشحالك حمدان..
حمدان: يسرك الحال يا بوحسن.. شحالك انته..
علي: بخيير وسهاله.. وينك يا اخي ولاحد يشوفك .. قطعتونا امره..
سعيد: لا لا حليله حمدان ماقطع .. دومه يسير علينا فالعزبه ..
حمدان: شفت .. لاتقول قطعتونا ..انته اللي من سافرت برع كبر راسك ولاتي صوبنا..
علي: هاهاهاها افااا .. انزين ويا منو تحاوط هنه..
حمدان: ماشي ياي ويا الاهل..
علي يبتسم : هيه ..
وطلعت شما ها الوقت من المحل وقامت تتلفت بعدها وها المره صدق امفوله على حمدان كل مادشت محل يوقفلها برع وشويه يختفي .. وانتبهتله ويا شباب واقف .. ويوم دققت النظر انصدمت .. مب معقوله ها علي ... من بعد ها القطيعه كلها تشوفه .. ليش جذيه هيه مب عامله حسابها لها الصدمه .. من متى تتهرب من شوفته ..
علي لمح البنت اللي طالعه من المحل حس انها شموه ويوم شاف البنيه الصغيره عرف انها يزوي .. كذلك عبيد انتبه للبنت وتم امبهت وقام يسحب سعيد من كندورته وسعيد معقد الحيات ويطالع عبيد بلاه شو ياه..
حمدان ترخص منهم ورد لخواته .. وشما جلبت بويها ومن زيغتها وربكتها طلعت من المول ..
علي تم واقف يطالعهم وهو يبتسم وعبيد هو الثاني يطالع وحاس بالقفطه .. البنت اللي بغى يلحقها من معارفهم !! يا الفشيله تم قافط ويتحمد ربه انه ماقال لسعيد ولا علي جدام حمدان يوم انتبه للبنت واختها وهن يطلعن من المحل..
سعيد: بلاكم استقطعتوا.. تحركوا..
علي: يلا سرنا ..
سعيد: العبدي يلاا..
عبيد: ها انزين انزين..
ويوم نجفوا الشبيبه من الهياته ردوا .. اول شي وصلوا سعيد .. ويوم ياي بينزل..
سعيد: علوه .. جنك ماقلت..
علي: ماتفيجت يا خوك..
سعيد: ماعليه انزين انته..
علي: انشالله انشالله .. باجر ورا باجر بالكثير..
سعيد: بنشوف..
وسكر باب السياره وردوا علي وعبيد .. طول الدرب ساكتين هم الاثنينه .. ويوم وصلو .. نزل عبيد ورد بيت يده.. وعلي دش بيتهم وطلع حجرته....
عق الغتره ووقت جدام الدريشه وهو مجتف ادينه ويفكر... شماااا.. ها الاسم فباله خلال ها الوقت.. من زمان ماطرتها فطوم جدامه .. من زمان بعد ماشافها .. من سافر يدرس فمصر ماشافها .. اكيد درت انه بياخذ بنت عمه .. انزين ويوم درت شو حلبها .. عادي كان عندها ولا تأثرت.. حن لايامه ويا شما .. توله على الضرابه وياها والتخسيس فيها .. معقوله نست ماضيهم هيه.. من حقها تنسى مثل ماهو نسى .. ماكان متصور انها تحبه .. وهو مب مقتنع انه يحبها.. عباله مشاعرهم اخويه .. وقدر يقنع نفسه بها الشي عشان يتفرغ قلبه من أي هموم .. وعق الهموم كلها على شما من غير مايدري.. من غير مايدري بحبها ومن غير مايدري بحالها من عقبه..
اتذكر رمستها يوم تقول " مايهون " .. ها الكلمه تمت جالبه حاله فوق حدر.. مب عارف شو موقفها منه تحبه صدق ولا كانت تتمصخر.. ويلس وياحاله كم مره ويقنع نفسه بانه شي عادي اكيد هيه تعتبره مثل الاخو مثل ماهو يعتبرها جيه .. وفالاخير اكدتله فطوم من رمستها انه شما مب فبالها أي شي وومعزته فقلبها مثل معزة حمدان اخوها .. وها اللي طمناه طول ها السنتين ..
حاليا مايعرف ليش قلبه بدى يحن لشما.. وده يرد بالزمن لورى .. يبى تجمعه وياها مشاعر صادقه .. بس فات الاوان.. خلاص مايقدر يكسر كلمة ابوه.. هو قاله تم وخلاص.. وعشان مايشغل عمره اكثر دش الحمام يسبح..

ـــــــ شما من عقب ماردت من المول قفلت على عمرها الحجره .. وتمت يالسه وتفكر .. اخيرا شافت علي .. صح لمحه ومن بعيد بس حست صورته انطبعت فبالها.. من ردت وهيه مب رايمه تنسى وقفته ونظرته وابتسامته .. عيزت من حالها .. كم كملت وهيه عايشه على الذكرى .. صح كانت اتمر عليها ايام وماتم تفكر هذاك التفكير فعلي بس ابدن مامر عليها يوم من غير ماتنطق باسمه او تتمنى له يوم موفق .. كانت كل يوم الفجر عقب ماتصلي لازم توقف عند دريشتها واطالع القمر وتقول " بلغ سلامي للغالي ......."
كانت تفكر وتقول معقوله نسيت حبه .. ولا انا اتجاهل .. ولا قلبي تعود على البعد ولا طاب جرحي ولا شو؟
شما فها اليوم حددت موقفها وحصرت عواطفها وتأكدت من شي.. انه علي بيظل غالي على قلبها ولكن خلاص جدامها حياتها لازم تعيشها وتتقبلها من غير علي.. اليوم يوم شافته قلبها ماقام ينبض بقوته مثل كل مره كانت تشوفه .. حست بالامر وكأنه شبه عادي اللهم كانت مرتبكه لانها من زمان ماشافته ..
حست براحه من عقب ها التفكير .. قالت فخاطرها تبى ادق لفطوم بس شافت الساعه وحده مايسرت ادق على البيت .. ودشت النت قالت يمكن تلقاها .. ومن شافتها اون لاين رمستها على طول ..
شما: زين يوم لقيتج..
فاطمه: جيه تولهتي عليه ..
شما: ركبي المايك بسرعه
فاطمه: ليش..
شما: ابا ارمسج..
فاطمه: اوكي..
وبدن يرمسن ...
فاطمه: ها شميم شو عندج ..
شما: اليوم سرت المنار..
فاطمه: انزين قايلتلي انج بسيرين..
شما: توقعي منو شفت
فاطمه: منوو
شما: شفت علي اخوج..
فاطمه: والله ..
شما: هيه (وهيه كانت تضحك..)
فاطمه: انزين .. شو سويتي..
شما: ولاشي ..
فاطمه: ليش تضحكين..
شما: ماعرف... احس اني مستانسه
فاطمه: عشان شفتيه
شما: ماعرف.. بس جيه مستانسه ..
فاطمه: تراج قلتي خلاص..
شما: انزين خلاص.. بس مب معقوله اشوفه وما استانس..
فاطمه: ياحيج... امس الهريم سبانا انا وانتي
شما: بل لييش..
فاطمه: وحليلنا ستوينا النطيحه والمترديه ..
شما: هههههههههه اسميك يا علي ..
فاطمه: ياسلام عيبتها..
شما: يحليله علي .. يوم شفته اليوم ضربتني غبنه ..
فاطمه: ليش.. عشانج حبيتيه؟
شما: فطوم مب جيه السالفه .. حتى لو كنت احبه بيتم هذا علي ..
فاطمه: قلبج وايد كبير شموه.. لو وحده غيرج جان كرهت شوفته ..
شما: علي محد يكرهه يا فطوم .. وبعدين هو ماغلط عليه ولا قال من البدايه احبها .. انا وهمت عمري وعليه اتحمل خبالي..
فاطمه: فديتج والله..
شما: يالله ماعلينا.. فطوم يبالنا نسير كم سيره ويا بعض انا وانتي..
فاطمه: وين
شما: دبي بعد وين.. بنسير نتشرى حق التقنيه .. كله تطقيمات فاهمه..
فاطمه: حللو.. بس مادري منو بيودينا..
شما: ماعليج تدبر..
فاطمه: زين والله ..
وخذتهن السوالف ويا بعض .. وعزمت شما اتي باجر بيت قوم فطوم واتفقن ويا بعض.. لا وبعد دقن لشيخه وحصه ومريم عساس يتيمعن كلهن بيت قوم فطوم..
وبالباجر العصر يت شموه عند فطوم .. اما شيخوه فنزلت عند حصوه ..
ومريم فها الوقت كانت يالسه ويا امها وابوها..
بو محمد: بنت حميد هنيه ..
ام محمد: هيه قبل اشويه يايه ..
بومحمد: ياحافظ على البنات.. ها السنه ثنويه عليهن..
ام محمد: البنات يكبرن ويكبرنا وياهن ..
بو محمد: وبيعرسن وبييبلج احفاد عيل..( كان يرمس وهو عيونه على مريم..)
مريم قفطت ووخت براسها ..
بو محمد: انا بسير العزبه ..
علايه وفهود من حسوا انه بو محمد بيطلع نقزوا ولحقوه .. مريم وامها يطالعنهم ويضاحكن عليهم ..
وتمت مريم تسولف ويا امها شويه ويوم طلعت عنها امها خاري سارت فوق .. سمعت صوت البنات فحجرة حصوه وقالت بسيرلهن وقبل ماتدخل وقفت عند الباب اللي كان نص مفتوح .. جذبتها رمستهن وماقدرت ادش تخافهن يقطعن الرمسه .. من غير ماتقصد تمت موقفه تسمع .. كل كلمه انقالت كان الها وقع كبير على قلب مريم .. ماتحملت الصدمه ردت حجرتها بسرعه وقفلت الباب .. كانت تتنفس بسرعه وكأنها مب مصدقه انسابن دموعها .. قامت تضرب على الباب بكل قهر .. لييش يا سعيد ليييش..
ليش خليتيني احبك .. ليش اسرتني بنظراتك .. ليش خليت قلبي يتعلقك لييش..
خطبولك بنت عمك وقلت لقلبي اصبر يمكن تنحل دام سعيد يحبني .. واليوم اسمع انك تحب !!
وين اروم اتحمل اكثر .. كنت اصبر عمري والحينه بشو اصبرها ..
حست بالضعف والضيج بيجتلها يلست على الارض واتاكت على الباب وهيه دافنه ويها على ركبها ..
حصه وشيخه من عقب ماخلصن سالفتهن قالن بيسيرن عند فطوم .. سارت حصه اول شي لحجرة مريم وتمت ادق عليها الباب بس مريم ماكانت تتوايبلها ..
وقالت يمكن سبقتهن ..وروحن هن الثنتين..
حصه: وحليلك يا سعيدان ولا يحب ..
شيخه : جان ريتي .. ماطاع يقولي منو هيه ..
حصه: يا الفضول ..
شيخه: لازم ابا اعرف منو هاي اللي جالبه حال اخويه ..
حصه: اون .. ها الكثر يحبها ..
شيخه: ماشفتيه كيف نقزلي يوم قلتله يبولك بنت عمك .. نطر بعويناته ..
حصه: وحليله..
شيخه: خوفاتلي الا طايحلله على وحده والله انها..
حصه: خلي عنج ظنونج .. اكيد شموه يت ..
شيخه: حليلها من زمان ماشفتها..
حصه: وانا بعد ..
مريوم بعدها على يلستها .. عقب ما حست انها خلاص بتنفجر من الضيجه قامت من مكانها ومشت دموعها ويلست على الغنفه .. تمت ساكته وتحاول تمنع دموعها من انهن ينزلن .. وخذتلها نفس وزخت التيلفون ودقت لمهره .. وبعد السلام على طول دشت بالموضوع ..
مريم: مهره انا موافقه ..
مهره: على محمد..

مريم وتحاول قد ماتقدر ماتحسبها مهره انها تصيح: هيه..
مهره: والله .. فديييت عمرج انا .. صبري ابا اصارخ .. هيهيهيهي .. جني انا اللي باخذج .. مريوم ماروم اصبر .. يلا يلا باي.. بدق لحمود وحليله من يومين وهو محترق يبى يعرف ردج..
مريم: اوكي..
وسكرت مريم عن مهره .. كان تصرفها ها من غير أي تفكير .. تبى تخوز الضيجه مب عارفه كيف .. بعد فتره حست بتصرفها الغبي .. تبى تبرد غيضها وربعت ادق لمهره .. كانت بكبرها ترتجف زايغه هيه ماتبا غير سعيد وسعيد مايباها ومحمد يباها .. وشكلها لخبصت السالفه بنفسها ووافقت على اللي ماتباه ..
قعدت تفكر باللي بيصير من جراء ها التصرف .. الحينه خلاص ماتقدر تتراجع فكلمتها .. شو بتقول عنها مهره .. سعيد مايباها خلاص .. ليش هيه تهتم ..
ها كان كل تفكيرها .. ماكانت تدري بان سعيد محترق عشان يعرف ردها .. وعلي لا تحرك ولا قال كل مايشوف مريم يتلوم ومايقدر يقوللها ..

ــــــــــــــ في بيت بوعلي .. كانن شموه وفطوم يالسات في الصاله وينهن حصه وشيخه وبعد السلام والعلوم ..
حصه: جيه مريوم اختيه مب هنيه
فاطمه: لا مايت ..
شما: البزيا قايله بتي ..
حصه: مادلها دقيت عليها الباب وماردت عليه ..
شيخه: يمكن راقده..
فاطمه: هب من عوايدها ترقد العصر .. بدقلها ع تيلفونها ..
وقبضت فطوم تيلفون البيت واتصلت لمريم ويرن التيلفون بس محد يرد .. وبعدها دقت ومحد يرد..
فاطمه: ماترد ..
حصه: شدراني .. مساعه اسمعها اتقول بتي .. يمكن غلبتها الرقده ..
فاطمه تمت اطالع ساعتها ومعقده بحياتها غريبه شو فيها مريوم .. مب معقوله راقده وتيلفونها ماترد عليه .. حست بشي مستوي .. لكنها طوفت وقالت يمكن اتي عقب اشويه ..
اما مريم .. فكانت طايحه ع شبريتها ودافنه ويها فالمخده ماتبا تفتح عينها على واقعها المرير هذا .. ودها فها اللحظه توقف انفاسها .. ماتبى تفكر اكثر يالها صداع من كثر ما مستهمه .. والحينه امورها تأزمت ومب قادره تواجه القرار اللي اتخذته بنفسها فلحظة يأس منها..كان تيلفونها يرن وماترد عليه كانت فطوم وعقبها مهره كم مره دقت ومريم تمت متبريده مب رايمه ترد عليها ووصلها مسج ويوم قرته .. حست بالضيجه بتجتلها .. بتخنقها .. ماعرفت شو تسوي غير انها تاخذ التيلفون وادق لنوره..اول ماردت عليها نوره مريم غصباَ عنها صاحت ونوره من اول ماردت وسمعت صوتها وهيه تصيح فزت من مكانها .. وترخصت من اللي عندها وسارت حجرتها ..
نوره: الريم بلاج ..
مريم: نوره بموت انا ..
نوره: بسم الله عليج شو فيج غناتي..
مريم: نوره تعالي عندي .. نوره اباج
نوره : حبيبتي مريوم قولي بلاج ..
مريم ماقدرت ترمس وصوتها كان مبحوح من اثر الصياح ..
نوره: مريوم هدي شويه ورمسيني .. زغيتيني ..
مريم: نوره تعالي .. بموت من الضيجه ..
نوره: انزيين ارمسي قولي بلاج .. ليش تصيحين شو مستوي عندكم .. مريوم ليش ضايجه .. والله وقفتيلي قلبي ..
مريم: تعبت نوره .. مابقالي حيل..
نوره: ياربيه منج . قوليلي بلاج..شي يعورج حد قالج شي .. حد يعوره شي ..
مريم: لا.. لا ..
نوره وهيه تتنهد : طيحتيلي قلبي فديتج .. قلت شي مستولكم ..
مريم: انزين اللي فيني مب شويه ..
نوره: انزين غناتي انتي هدي عمرج .. ستهدي بالرحمن و سيري غسلي ويهج وردي قوليلي شو فيج ..
مريم: انشالله ..
وبندت مريم عن نوره وسارت تغسل ويها .. وعقب ردت تيلس مكانها وهيه محطيه اديها ع يبهتها وتضغط بقو تحس بصداع فضيع وبعد ماهدت نفسها شويه اتصلت لنوره اللي كانت تترياها..
نوره: ها غناتي شو الحينه.. ترومين ترمسين..
مريم: نوره.. سعيد مايحبني
نوره: شو
مريم: طلع يحب وحده ثانيه .. وطلعت انا عايشه فدنيا كلها اوهام وكلها جذب
نوره: انتي شدراج
مريم: سمعت اخته تقول لحصه ..
نوره: انزين يمكن تقصدج
مريم: لاا ..
نوره: انزين .. وها الصياح كله عشان عرفتي انه مايحبج .. تراج من البدايه محطيه فبالج انه مايحبج .. وعرفتي انه خطبوله ورضيتي شو اللي تغير الحينه
مريم: اللي تغير اني فقدت الامل خلاص... واللي تغير اني وافقت على محمد اخو مهره..
نوره: كييف
مريم: انا غبيه تسرعت فقراري .. وافقت مع اني رافضه
نوره: مريم كيف جيه .. فهميني السالفه
مريم: يوم يتني مهره ذاك اليوم .. قالتلي انه اخوها ناوي يقول لاهله عشان يخطبوني بس كانوا يبون رايي اول..
نوره: انزين
مريم: هذاك اليوم كنت بقوللها اني مب موافقه بس هيه قالتلي فكري .. وقلت ماعليه عقب كم يوم بقوللها اني مب موافقه عساس ما اكسر بخاطرها..
نوره: وبعدين
مريم: والله ينوره من سمعت رمسة شيخوه ماعرف شو ستوالي .. تصرفت بغباء .. دقيت لمهره وقلتلها انا موافقه .. مادري ليش دقيت .. نوره شو الحل الحينه .. انا مابا اخوها .. شو اسوي ..
نوره: انقهرتي من سعيد ووهقتي عمرج
مريم: والله اني ضايجه ومب عارفه كيف بطلع من ها السالفه
نوره: مريوم لاتعقدين الامور..خلاص دقي لمهره وقوليلها انج رديتي فرايج
مريم: يا الفشيله شو بتقول عني ..
نوره: مابتقول شي. هاي حياتج مريم ومحد بيلومج على شي انتي مب مرتاحتله ..
مريم: بس توها مطرشتلي مسج وتقولي انها قالت لاخوها وهو مستانس الحينه
نوره: تبيني ادقلها انا
مريم: لا نوره ..
نوره: عيل شو .. انتي ماتبينه خبريهم قبل ماتكبر السالفه
مريم: اخاف مهره تزعل .
نوره: مريوم طالعي على عمرج اول .. خلي عنج مهره وغيرها ..فكري فعمرج انتي ماتبينه كيف بترومين تعيشين وياه
مريم: ماعرف .. بس انا ماقدر ارمس مهره واقوللها رديت فرايي .. مب حلوه
نوره: انا بدقلها
مريم: والله يا نوره مادقين .. حلفتج بربج ..
نوره: مريوم .. والله انج حاله .. ماتبين الريال وماتبين تقولين انج ماتبينه .. ماصارت هاي..
مريم: نوره والله اني تعبت احس اني غلط فغلط .. احس كل شي متلخبص .. مابا افكر فشي .. راسي يعورني
نوره: مريوم .. انتي الريال ماتبينه صح ولا لا
مريم: صح
نوره: خلاص اكيد مهره بدقلج .. انتي قوليلها انج غيرتي رايج وفكي عمرج
مريم: لاا
نوره: انزين شوفي .. قوليلها خلهم يصبرون شويه .. لا يخبرون حد وبعد كم يوم قوليلها انج مب مرتاحه
مريم: بيحطون فخواطرهم
نوره: ياربيه منج .. رضا الناس اهم من راحتج !
مريم: ماداني حد يزعل مني
نوره: مهره مابتزعل وهيه ربيعتج وتحبلج الخير ..

مريم: ......
نوره: سوي اللي اقولج عليه مريوم
مريم: بشوف
نوره: بنيي انشالله ورا باجر وبحاول اييج
مريم: انشالله.. نوره بخليج انا ..
نوره: بدقيلها
مريم: نصخيه مصتك ماروم اسوي أي شي ..
نوره: مريوم
مريم: هاا
نوره: لاتضيعين عمرج
مريم: من بعد سعيد خلاص ضعت
نوره: الله يصلح حالج .. خلاص حبيبتي ارتاحي الحينه والا ماتنحل .. وعرفي انه ربج يبالج الخير ..
مريم: اوكي.. فمان الله
نوره: الله يحفظج ..
وبندت مريم وردت على طيحتها بس ماكانت تفكر فاي شي .. كانت تتأمل حجرتها واطالع كل شي فالحجره وتنقل نظرها وكأنه ها الحجره غريبه عنها ما جد شافتها..تحس بغربه فضيعه بمجرد انها تفكر انه سعيد خلاص مابيكون له أي دور فحياتها..
اما نوره فيلست تفكر فحال مريم كانت تضحك وعينها ادمع فنفس الوقت .. تحس انها تخبلت شرات مريوم .. ويلست ترمس عمرها .. " الحينه شو بيسوابج يا الريم.. والله انج مكبره السالفه وهيه ماتحتاي غير اتصال واحد .. مهره تراني غيرت رايي.. اف منج يا مريوم.. الحينه يوم انتي تم حالج جيه.. عيل شموه اختيه كيف كانت.. والله انكن خبال فخبال عنبوكن شلكن فالحب وبلاويه عرسن وعقب حبن .." ودخل سالم وهو شال وليده ونوره ترمس عمرها .. تم معقد الحيات وسار صوبها ..
سالم: بسم الله .. منو بيعرس
نوره وهيه اطالع سالم: منو بيعرس..
سالم: انا اسألج
نوره: محد بيعرس
سالم: عيل بلاج تتحرطمين
نوره: لالا ماشي..
سالم: الحمدلله والشكر.. اندوج شلي زايد بدخل اتسبح
نوره: جيه يبته كان عند هند
سالم: كان يصيح مارامتله .. جيه مخلتنه انتي ويايه هنه..
نوره وهيه تشل زايد: فديت حبيبي ..يعل ماماه انشالله ( وتمت تلوي عليه وتحبه)
سالم: الله يا الدنيا ونحن شو خلولنا .. خلاص طاح كرتنا..
نوره: يا الغيار .. حتى من ولدك تغار..
سالم: اغار من الدنيا كلها عليج ..
نوره اطالعه وهو واقف جدامها وتبتسم ..
سالم: ابتسم وتبسمت رووحي ..
نوره: لاوالله ..
سالم: ههههههه ادري صوتي مب شي.. انزين الاهل بيسافرون باجر .. بعدج ماتبينا نسير
نوره: لاسالم ..
سالم: خلاص احسن بعد .. خلنا نقضي شهر العسل شاركونا فيه المره اللي طافت..
نوره: وها المره بيشاركنا فيه زيودي
سالم: يالله هيه خاربه خاربه من اولها..
نوره: هاهاهاها حرام عليك ..
سالم: هيه والله تكسرت ولا سوينا العرس اللي حلمنابه .. وسافرت اتعالج بدال مانعسل .. بعد مب خاربه
نوره: ههههههه تعوذ من بليس فديتك .. ها امر ربك ..
سالم: انزين .. انشالله باجر بنطلع نحن وبنحاوط فالدوله
نوره: وين تروم انته ع السواقه
سالم: اروم ماعليج ..
نوره: بنسير راس الخيمه وبنحاوط فيها
سالم: شوفيها عاده ها الراس الخيمه عشان نحوط فيها
نوره: يالله عنك ريحتها كم تسوى .. نقيانها شحلاتهن .. ضواحيها ويبالها وبحرها .. كل شي فيها يرد الروح ..
سالم: بدت عاده الحينه .. باجر بنسير دبي بنتم كم يوم وبنرد راس الخيمه شو قلتي..
نوره: خلاص كيفك المهم انسير راس الخيمه
سالم: بالش عمري انا.. بس شو بنسوي..
نوره: محد قالك تاخذني
سالم: المشكله القلب يباج
نوره: لاوالله .. وراعي القلب
سالم: ههههههه راعي القلب من غيره ماله حياه .. والقلب من غيرج ماله حياه .. يعني معادله بسيطه راعي القلب من غيرج ماله حياه ..
نوره: هيهيهيهي حبيبي والله
سالم: الله حللوه عيديها ..
نوره: سالم طالع زايد يبتسم فدييته يا ربي..
سالم: سمع امه وابوه يتغزلون فبعض ..
نوره: هههههههههه لا تفهر فيه ..
سالم: فديته وفديت امه .. ربي يحفظكم لي ..
نوره: ويحفظك النا ..
وهوى سالم على ولده وباسه ورفع راسه وطبع بوسه على خد نوره .. نوره ولعن خدودها ووخت وتمت اطالع ولدها وتمسح ع راسه وسالم يطالعها وهو يبتسم ..
سالم: بدش اسبح .. ( وحط ايده عراس نوره ونعفل بشعرها .. وروح..)
وقامت نوره وحطت زايد فسريره وسارت صوب الكبت وطلعت ثياب لريلها .. وعلقتهن ع الشماعه وردت تيلس .. ورد فكرها لمريم تبى تعرف اذ اتصلت لمهره ولا لا....

ـــــــ في بيت بوعلي..
قامن البنات من يلستهن وطلعن كلهن حجرة فطوم .. وعقب ماصلن المغرب ..
فاطمه: حصوه دقي بيتكم طالعي مريوم
حصه: لو مرادها من ييه جان يت مساعه
شما: قايله بتي تراها
شيخه: حصوه يوم انا يايه كانت يالسه وياكم هيه
حصه: انزين يمكن يوم سرنا فوق ردت حجرتها
فاطمه: احس شي مستوي
شما: مثل شو يعني
فاطمه: مادل .. شرايكن نحن نسيرلها..
شما: يلا قومن ..
وسارن البنات كلهن صوب بيت بو محمد .. ومريم فها الوقت كانت تقرا قران عقب ماصلت المغرب .. يوم سمعت الطرق ..
مريم: جين قلتلج مابا شي بس روحي ...
البنات نقعن من الضحك ..
فاطمه: حو أي جيين انا فطوم فجي ..
مريم وتعابير ويها مجلوبه : فطوم .. صبري انزين..
ووطت المصحف من ايدها وفصخت وقاية الصلاه ووقفت جدام المنظره اطالع عمرها ورتبت شعرها شويه وتمت اطالع عيونها اذ متنفخه بعدها ولا لا .. وعقب فتحت الباب ..
فاطمه: ماابغيتي ..
شما : هلااا بووووي ..
مريم: هلااا عمي .. (وسلمن على بعض..)
شما: يا الخايسه شله ماييتينا ..
مريم: كنت بيي عقب اشويه
فاطمه: ياسلام ومنو قايل بيي العصر..
مريم: تعايزت ايي..
حصه: شو من الشغل اللي عايزبج .
فاطمه: وتيلفونج شله ماتردين عليه ..
مريم: والخيبه شوي شوي عليه .. تعالن نيلس فالصاله..
ويلسن مريم وشما حذال بعض وفطوم حذالهن من الينب وشيخه وحصه مجابلاتنهن ..
مريم: شحالج شميم ..
شما: الحمدلله بخير ..
فاطمه: يلا قولي شو ياج
مريم: ماشي .. دخلت اسبح وعقب دقتلي نوره ودقيت سالفه وياها واذن المغرب و ييتن انتن ..
فاطمه: صدق
مريم: هيه .. ( واطالع شموه وتبتسملها وحطن ايدهن فبعض..ويوم لفت صوب حصوه طاحت عيونها فعين شيخه وحست بويها يحترق..)
فاطمه: اخبركن بنتم هنه يالسين .. خلنا نظهر خاري.
مريم: حر فطوم..
شما: لا الجو حلو اليوم ..
حصه: يلا قومن عيل ..
وشلن البنات بعمارهن وطلعن برع فالحوي.. وسولهن يلسه وتمن يسولفن .. كانن صدق مسويات ضجه وسوالف وتنكيت ومريم بالرغم من الابتسامه اللي مرسومه فويها الا انها بعدها بالها مشغول والضيجه متمكنه منها..
شما: اخبركن الساعه كم
فاطمه: شو تبيبها الساعه
شما: قايله لحمدان ايني الساعه ثمان
حصه: يالله جيه .. الحينه بتي ثمان..
شما: مافيني بعد اتاخر وامايه تهزبني..
مريم: حمدان بييج
شما: هيه
مريم: انزين دقيله خليه يأخر شويه .. بعدنا ماشبعنا منج
شما: هيه باين ..
مريم: يالله عنج جيه مب مصدقه
شما: لا بس من يلسنا وانتي ساكته وماتشاركينا..
مريم: ماعندي علوم ..
فاطمه: هاتي تيلفونج مريوم بندق لحمدان..
مريم وهيه ادور التيلفون: وين سار .. جيه مايبته انا ..
حصه: طلعتي من الحجره بدونه ..
مريم: حصوه سيري هاتيه ..
حصه: ماروم
فاطمه: قومي حصوه عن ايي حمدان..
حصه: ممم انزين قومي شيخوه ويايه..
شيخه: اوكي..
وعقب ماروحن..
فاطمه: مريوم شوفيج
مريم: ماشي
شما: علينا مريوم .. شكلج وايد متغير..
مريم تمت اموخيه: ماشي .. تعبانه شويه
فاطمه: قولي الصدق مريوم
مريم: صدق مافيني شي..
شما: ماتبين تقولين جدامي
مريم: شموه شو ها الرمسه..
فاطمه: عيل بلاج..
مريم: ماشي ..
وسمعن ها الوقت تهرين برع .. وقالن اكيد حمدان وطلعن هن الثلاث .. وفعلن كان حمدان اللي يهرن جدام بيت بوعلي.. وسارن صوبه ..ويوم انتبهلن نزل من السياره وسلم عليهن..
مريم: شحالك حمدان
حمدان: بخير وسهاله.. شحالج انتي
مريم: الحمدلله ..
حمدان: وين لاتين بيتنا ولاشي..
شما: شو اتدور يوم الحبيبه محد
حمدان: نحن موجودين .. لازم نوره يعني
مريم: فديتكم والله.. جامعه وعذاب مانتفضى والله حق الحواطه.. وبعدين الاسبوع اللي طاف كنت عندكم انته كنت محد..
حمدان: مادري محد قالي.. يالله الحينه صيف واجازه .. ونوره بتي وبطيح الحيه ..
مريم: يالله انشالله..
حمدان: يلا عيل شموه
فاطمه: جيه ييت من وقت
حمدان: بس.. من العصر هيه هنه ..
شما: يا النحيس انته..
مريم: حمدان خذلك لفه نص ساعه وردلها ..
فاطمه: هيه حمدان ..
شما اطالعه واطالعهن ..
حمدان: انا مب مسؤول ترا ان امايه احتشرت
شما: لا ماعليك انته يلا سير..

حمدان: ها النص ساعه شو بتفيد ..
فاطمه: لا ماعليك بنخلص سالفتين فيها ..
حمدان: والله انكن .. نص ساعه وبيي..
وركب حمدان السياره وها الوقت طلعن حصوه وشيخه من البيت وهن يدورن البنات ولقن سياره عندهن تمن مترددات مب عارفات منو ها ..وتمن واقفات لين روحت السياره وسارن صوب البنات..
حصه: منو ها
شما: حمدان اخويه
شيخه: حليله ربيعنا مال الروضه ..
حصه: لالا ربيعج انتي انا كنت صف غير ..
شما: انزين كان يارج .. ماشي مفر ربيعج ربيعج
حصه: رغتنه ..
مريم: يا قبل ماندقله ..
حصه: هيه اندوج تيلفونج ..
فاطمه: انزين يلسن يلا ..
شما: فالسكه!!!
مريم: عادي غناتي ها مقرنا الاساسي اصلن
ويلسن البنات على شكل حلقه مجابل بيت بو علي .. وطالعت مريم تيلفونها ولقت يميع المكالمات اغلبهن من مهره واعتفس ويه مريم اكثر ماهو معتفس..
وعلى سوالفهن لمحن ليت سياره يايه بدش السكه وتناقزن كلهن من مكانهن ودشن بيت بو علي.. وتمن يواقن عند الباب .. كان اللي ياي سعيد ووياه عبيد ..
شيخه: اخبركن ها سعود اخويه
حصه: شو يايبنه قلناله عشر ايي
فاطمه: عاده بيعاندبكن هو ..
شما: قومن شويه خلني اشوفه ها السعيد
فاطمه: ها عبود نازل ..
شما: عبيد ولد عمتج
فاطمه: هيه هذا ..
مريم انتهت خلاص ردت على ورى ويلست دجة الزراعه وتحس بريولها ترجف ومب رايمه تشلها ..و شما تتحرى مريم وراها ولفت على ورى اونها بسويلها حركه عاد سعيد ترا هذا .. ويوم شافت مريم يالسه سارت صوبها .. والبنات بعدهن ع وقفتهن ..
اما برع .. فكان عبيد نازل من السياره وقابض التيلفون بايده ويدق بيت خاله سيف بس ماكان حد يرد..
عبيد: سعود محد يرد..
سعيد: سر انزين انته داخل ..
عبيد: دق لعلي طالعه وين محطي سويج سيارته ..
وعقب مادق وعرفوا مكان السويج اتجدم عبيد صوب بيت خاله والبنات من شافنه ياي ..
فاطمه: ايه عبيد ياي ..
حصه: شو عنده
فاطمه: شموه شيخوه تراه ولد عموه بيدخل تغشن يعلكن
شما: والعثري.. فطوم وقفي جدامي..
مريم: يالله ما بياكلج هو ..
ودخل عبيد ها الوقت واول ماشاف البنات جدامه تم مستقطع وهو يطالعهن ..
عبيد: يعلكن انشالله وانا اسمع مصاصر برع تحريت ينون ..
فاطمه: هيهيهيهي .. لا نحن هاذيلا..
عبيد وهو يقلد فطوم: لا نحن هاذيلا.. شو ميلسنكن هنه .. حرقت تيلفون بيتكم ومحد يرد
فاطمه: جيه شو تبى
عبيد: سيري هاتي سويج سيارة علي.
فاطمه: ليش شو تبابه
عبيد: سيري انتي بسرعه ..
فاطمه: انزين ماعرفه وين ..
عبيد: بتلقينه فحجرته .. بسرعه اركضي..
وروحت عنهم ونست انها موقفه جدام شموه عسب ادسها .. شما رفعت راسها وويها يتبخر وتلز حذال شيخوه ومريم وحصوه واقفات جدامهن ويطالعن على ورى ويضحكن .. عبيد من انتبه انه فيه ناس غرب قفط ووخى براسه ..
عبيد: ااا هذا .. مريوم هاتي السويج برع ..
وجلب بويه وطلع برع ..
شما: اوه قومن قومن عني والله احس اضغطه
حصه: ههههههه ما يرزا عليج ..
شيخه: هيهيهي والله شكلنا يضحك ...
مريم: وحليله اتلوم منكن..
شما: هيهيهي تحراكن ينانوه .. ماينلام تحواطن بوقيكن البيض..
حصه: عيل شو بنلبس بالله عليج ..
ووصلت فطوم وهيه تنافخ ..
فاطمه: وين ذلف بعده
مريم: سيري برع عطيه ..
شما: لا قال انتي تودينه برع ..
مريم: لاوالله.. سيري فطوم مستعيل شكله..
فاطمه تغايض: ماروم اندوج عطيه ..
شما: يلا يلا مريوم ( وهيه شاقه الحلج..)
مريم: تخسن الا انتن ..
فاطمه: عادي محد برع ..
حصه: سيري مريوم الا سعيد هيهيهيهي
مريم: بس عاد انطبن .. ( وهيه صدق امحرجه..)
فاطمه: بل .. انزين لاتسيرين انا بسير..
وطلعت برع وعطته السويج..
فاطمه: جيه شو تبون بالسويج بدون السياره..
عبيد: السياره هناك فالعزبه ..
فاطمه: كيف جيه
عبيد: خلى سيارته العصر هناك وردينا ويا سعيد ونسى السويج فحجرته..
فاطمه: هو وينه
سعيد: عبود بند الدريشه بتفتلحنا استجواب هاي..
فاطمه: هبي بلاكم ويا روسكم ..
ويبند سعيد الدريشه وفطوم اطالع وهيه امبقره بعيونها وعطى ويل وغبر ع فطوم وتمت الفقيره الا اساعل وطلعن البنات برع وهن ينكتن على فطوم ..وعقب بشوي يا حمدان وروحت شموه .. ومريم من روحت شموه شلت بعمرها وردت البيت بحجة انها تعبانه شويه ..
مريم وهيه راده دق تيلفونها ويوم شافت انه مهره اللي داقه قفلت التيلفون بسرعه .. وربعت حجرتها ودخلت تسبح وعقب صلت العشى وطاحت ع الشبريه وهيه تحاول ترقد ..

ــــــ في عزبة بوعلي..
نزلو سعيد وعبيد من الموتر ودشوا الميلس .. لقوا الشبيبه يلعبون ورقه ودار سعيد وياهم ..
علي وهو يرمس عبيد: بلاك مستطن واقف..
عبيد: ها ..
علي: نوزعلك ..
عبيد: لا ماليه خاطر ..
علي: جيه بلاك ..
سعيد: اتصدق مادري شياه طول الدرب و ويهه مجلوب ..
عبيد طبهم وسار يطالع التيلفزيون .. وبعد المداهج اللي ستوى عسب الورقه قاموا سعيد وعلي عساس يروحون..
سعيد: ها اندوك سويج سيارتك .. انا بروح
علي: عبود قوم بنرد البيت..
عبيد وهو يزاعج : لالا ماشي . جيه عاني لين بيتكم اييب السويج وخلاف تبانا انرد
علي: ييها علينا ..
سعيد: جيه ثرك وين معزم اتسير..
عبيد: بنسير المنار يلا قوم ..
علي: جيه مواعدلك حد ..
عبيد: مو شغلك ..
علي: مافينا يا ولد الحلال ..
عبيد: لا ماشي ..
سعيد: يلا انا بروح ..

وركب سعيد سيارته وطلع من العزبه ووراه علي وعبيد.. عبيد يحايل فعلي وعلي مول ماله خاطر حق ويع الراس.. وتموا يسابقون ويا سعيد لين وصلو بيوتهم .. سعيد شل اخته وروح .. وعلي دخل سيارته فالكراج ونزلوا هو وعبيد وهم يدافنون ..
علي: يا ريال بلاك..
عبيد: عطني السويج انته .. بروح بروحي..
علي: ههههه يالله ليش ملزم انزين انته .. شو عندك فالمول
عبيد: بس ابا احوط
علي: من زينه عاد الحينه
عبيد: انا غلطت يوم ماييت بسيارتيه .. قص عليه احمدوه وتركبت وياه ..
علي: خلنا نسير نروغ البنات.. هكن يالسات ..
عبيد: ويا ها الراس
علي: قول اول مواعد حد
عبيد: قلتلك مب شغلك..
وساروا صوب البنات..
علي: كالعاده على يلستكن..بس ناقص الراس العود
فاطمه: هيهيهيهي تعبان البج بوس ..
علي: جيه بلاها
حصه: راسها يعورها..
علي: هييه .. روحن اللي ياياتنكن
فاطمه: منو هن عاده الا شموه وشيخوه ..
عبيد يطالعهن وتم يفكر ويربط وهو معقد الحيات شموه مب غريب ها الاسم عليه هاي نفسها ربيعتها يوم هن يهال يعني هيه نفسها اخت حمدان و هيه اللي شافها فالمول ذاك اليوم.. وتغيرت ملامح ويها وفداخله يحمد ربه الف مره لانه ماتهور فذاك الوقت ومالحق شما ولا كان صدق بيفتشل فشيله لانها اكيد لو شافته بتعرف شكله ..
وعقب ماسولفوا شويه شحوت علي البنات وردوا بيوتهم..
.... وسعيد طول الدرب فاتح استجواب ويا شيخه..
سعيد: جيه يالسات برع
شيخه: بس نترياك..
سعيد: غريبه بروحكن يالسات
شيخه: يعني منو بيلس ويانا
سعيد: جيه ومريم
شيخه: هيه مريم .. كانت تعبانه حليلها
سعيد: ليش شوفيها
شيخه: مادلها ..
سعيد: شقى بعد مادلينها
شيخه: وانزين انته شخصك مشتط
سعيد: كيفي ..
شيخه: والله انك حاله ماينعرفلك تراه..
ولفت بويها عنه وماعطته مجال انه يسأل اكثر .. عيزت منه شو بتسوي يعني هيه .. هو مب راضي يقوللها اللي فباله ليش اتعب عمرها هيه ..
وسعيد تم مستهم ع مريم احترق ويهه من كثر مايقول لعلي قلت ولا لا .. من يومين وهو يتريا علي يخبرها ..

ــــــ بالباجر في بيت بومحمد..
قامت مريم من رقادها وتحس عمرها متكسره وكل شي فيها يعورها .. باين عليها التعب وكان تحت عيونها هالات سود من الارق اللي ياها .. تربعت ع الشبريه وهيه حايسه براسها ومركزه بعيونها ع المنظره .. تنهدت وقامت تتغسل .. و نزلت تحت .. شافت الدنيا كلها هدووء ويوم انتبهت للساعه لقتها بعدها سبع الصبح ..
دخلت المطبخ و لقت دلال القهوه والحليب والريوق كل شي مزهب .. خذتلها كوب حليب وطلعت برع ويلست جدام الفله .. وتمت تتأمل الدنيا حولها وسرحانه ففكرها وما انتبهت الا على صوت ابوها..
بو محمد: ريماني .. شو تسوي بنتي يالسه ..
وقامت مريم : صبحك الله بالخير ابويه .. (وحبته ع راسه..)
بومحمد: صبحج الله بالنور والسرور ..
وانتبهت مريم انها بعدها ببجامتها وطالعت عمرها وتمت متلومه .. حط ابوها ايده على جتوفها ..
بومحمد: انا بسير صوب البوش.. بسيرين ويايه
مريم اطالعه وهيه تبتسم : بتترياني لين اتلبس..
بومحمد: يالله سرعي..
مريم: انشالله..
وركضت مريم حجرتها عشان تبدل وهيه مستانسه .. وابوها يوم شافها تركض تم مبتسم ويذكرها وهيه ياهل يوم اتصيح عشان يوديها العزبه .. وسار يشغل السياره وماكملت مريم خمس دقايق الا وهيه متركبه حذال ابوها ..
طول سيرتها ويا ابوها وهيه تحس بقلبها مرتااح ومطمنه .. عقت كل الهموم فها المده ومافكرت فأي شي يكدرها .. كانت تسولف ويا ابوها وينكت هو عليها ويذكرها بايام اول يوم اييبها وياه وهيه صغيره .. ودها ترد صغيره ودلوعة ابوها نفس قبل ودها ترد ياهل ماهمها الا اللعب .. بس الواحد مب بايده يرد الزمن ولا يطوفه ..
وعلى الساعه تسع ردوا البيت ولقوا ام محمد يالسه تتريا وتفاجأت وهيه تشوف مريم نازله ويا ابوها..
ام محمد: مريوم .. جيه وين سرتي..
مريم: سرت ويا ابويه
بومحمد: تولهت على ناقتها وسارت تشوفها..
ام محمد: يحيها .. وشو لقيتيها
مريم: غاويه هيهيهيهي
بو محمد: يلا حطولنا الريوق..
ام محمد: قرب زاهب ريوقك ..
بومحمد: محمد عيل وينه
ام محمد: عيالك اليوم كلهم رقود .. الا مريوم مادري وين حلبها النشاط..
مريم: ثرها حلوه قومة الصبح ..
بومحمد: يازينها الوحده يوم بتقوم من الصبح وتعاون فالبيت .. شو خانتها البنت كله راقده
ام محمد: شكلنا بنطبق نظام ها الصيف عليكن انتي وحصوه .. عقب الساعه تسع ماشي رقاد..
مريم: هههههههه انا عادي عندي الا حصوه من بيقومها ..
بومحمد: ماعليه العصا بتقومها..
ووعقب ماتريقوا .. يلسوا شويه يسولفون .. وعقب ساروا بو محمد وحرمته صوب الضواحي اما مريم فردت داخل.. يلست فالصاله اتجلب فالجريده وشويه يو خوانها الصغار ويا البشكاره ..
مريم: صباح الخير .. يلا وين البووسه ..
علايه وحمودي من شافوا مريم اسابقوا اللي بيحبها اول ..
مريم: فديتكم انا ..
علايه: ليش ماماه وين
مريم: ماماه سارت الضاحيه ..
علايه وهيه تبوز: ليش ماوعتني ..
حمودي: لوحوا عند عاعا ..
مريم: وليه بيفجون لغوبهم الحينه .. يلا يلسوا اشربوا حليبه الحينه ماماه بتي .. جين هاتي لهم صمون وحليب..
جين: اوكي.. يلا جلس منيه مافيه جنجال..
مريم: افا منو يسوي جنجال..
علايه: مب انا ها حمود
حمودي: لا لايه ثوتلي واواه
مريم: ماعليه لايه جيه تضربينه
علايه: انا ماضربيته .. هو شر شعري..
مريم: غربلله بليسج انتي .. طلع لسانج الحينه .. يلا يلسوا مؤدبين تراه راسي يعورني وان خبلتوبي بمردغكم بالعصا..
علايه اطالع مريوم وهيه مكشخنه بويها وحمودي يشوف علايه ويقلدها ومريم اطالعهم وغصبن عنها نقعت من الضحك ..
وبعد اليلسه ويا اخوانها سارت فوق ودخلت حجرة حصوه ولقتها منخمده خلتها وردت حجرتها ومن يلست دق تيلفونها ..
مريم اطالع الرقم وتعفس بويها " يعني الواحد مايستانس بيومه .. لازم يرد يستهم.. ياربيه شو بسوي الحينه ارد عليها ولا لا.. اوكي برد وبقوللها اني رديت فرايي خلاص .. اسفه مهره بس ماقدر .. " وردت على التيلفون
مهره: السلام عليكم
مريم: هلا وعليكم السلام
مهره: وينج انتي من امس ادقلج وماتردين .. هميتينا عليج ..
مريم: ها .. لا .. التيلفون ضيعته ونسيت وين كان ..
مهره: هيه .. وانا اقول مريوم ماترد وحليلها مستحيه ..
مريم وهيه تحس بالاحباط : شحالج انتي
مهره: قبل كل شي .. تراه اليوم انا ومحمد متفقين انخبر امايه عنج .. وانشالله ع نهاية الاسبوع بتيكم امايه اتخطب..
مريم: شوو
مهره: هيه بعد شوه مانروم نأخر أكثر ماصدقنا على الله انج عطيتينا القرين لايت..
مريم وتحس بدقات قلبها اتزيد تبى ترمس تقول لا لاتقولون بس تلعثمت ومارامت ترمس .. تحس بصوت مهره انها مستانسه وفرحانه .. وكل ماترمس عن محمد اتبين لمريم شكثر هو مستانس .. حست انها بتكون قاسيه لو قطعت فرحتهم هاي.. هم شارينها ويبونها .. وسعيد باعها خلاص .. ضربتها غبنه وتمت ساكته وماترد على مهره..
مهره: يالله فديتج يا الريم .. تعرفين وايد احبج
مريم: ........
مهره: هههههه ها يوم انا اقولج جيه استحيتي عيل يوم اخويه بيقولج شو بتسوين
مريم خلاص حدها طاحن دموعها وتحس بالغصه بتقطع حلجها ..
مهره: تعرفين مريوم اخويه وماشافج وجيه ملزم عليج عيل لو شافج شو بيسوي..
مريم: من زيني عاد انا
مهره: يالله فديتج غزال ماشالله عليج ..
مريم: مهاري بخليج الحينه
مهره: ليش
مريم: امايه تباني..
مهره: اوكي حبيبتي .. يوم بنخبر امايه برد ادقلج
مريم: اوكي بباي
مهره: باي..
ومن بندت مريم التيلفون فرته فره وهيه صدق متغصصه من عمرها.. شوكان بيستوي عليها لو قالت لمهره ماابا.. وقفت جدام البلكونه وهيه تشوف صورتها معكوسه ع الجامه .. تمت تتأمل عمرها وفبالها مية فكره وفكره بس عقلها كم بيفكر وقلبها كم بيتعذب..

دشت عليها حصوه الحجره تمت واقفه عند باب الحجره وهيه تمتح ...
حصه: شو تسوين
مريم: بسم الله وعيتي انتي
حصه: قبل شويه
مريم: دخلت عليج لقيتج منطبره
حصه: حسيتبج انزين وقمت..( واجدمت عندها..) بلاج
مريم: بلاني
حصه: كنتي تصيحين؟
مريم: لا ..
حصه: عيل بلاهن عيونج حمر .. وخشمج قطعة دم
مريم: مادري وعيت وانا مزجمه
حصه: فها الحر .. انالله .. انزين متى واعيه انتي
مريم: مساعه..
حصه: انا يوعانه بسير اتريق..
وطلعت حصه وهيه حايسه البوز .. حصه بدت تحس فانه شي مستوي لمريم بس شكلها ماتبا تخبرهن .. طبتها وسارت ادورلها ع سرط..

ــــ في بيت قوم سعيد..
الضهر وبعد الغدى يلسوا العايله متيمعين .. كانوا خوان سعيد وخواته يايين كلهم ومرتبشين ربشه .. تموا يسولفون وفالاخير ردوا يرمسون عن سعيد ومتى بيخطبوله رسمي ومتى الملجه والى اخره .. سعيد من سمع ها الرمسه لا وابوه يخطط ويتكتك .. شل بعمره وسار حجرته ..
تم مضايج اول شي .. وزخ التيلفون ودق لعلي .. عطاه من الزين وهزباه ولزم عليه اليوم يرمس مريم .. تم منقهر انه هو كان موجود واهله يخططون ويتفقون وهم خلاص واثقين انه بيوافق .. قال فخاطره بيشوف اول مريم وهو محطي انها اكيد مابترده لانه قلبه مثل ماهو يحبها تراه بعد يحسبها..
بالرغم من تباعدهم الا انه كل من سعيد ومريم كان بينهم تواصل فكري كل منهم يحب الثاني بصمت من غير مايعرف الطرف الثاني ..
كان سعيد يحس بعمره انه خلاص مافيه صبر اكثر.. ماعرف شو يسوي غير انه يغمض عينه ويتخيل صورة حبيبته ويشل ..
" مشتاق لك .. مشتااق لك.. مشتاق صوتك يا الغلا.. ياللي بقلبي منزلك .. والقلب عنك ماسلا.. ياخل انا محتاجلك وين انته يا ريم الفلا.. نفس الشعور ابادلك واجدد عهود الولع.. يا خلي جاوب بسألك من وين لك هذا الحلا.. انته بشر ولا ملاك الشمس منك تخجل.. لي مايعرفك يجهلك .. يعل منك ماخلا..."
شيخه كانت واقفه عند باب حجرة سعيد ومسانده راسها بالييدار .. حستبه انه تغصص من رمسة اهله ولحقته .. يوم سمعت الشله ضربتها غبنه .. سعيد اخوها يحب صدق وهيه مب رايمه تسويله شي .. انزين ليش مايخبرها هو مايهون عليها .. بتفديه بروحها لو يبى بس يخبرها منو هيه حبيبته .. وحست انها لازم تسوي شي .. على الاقل تفركش سالفة خطبته من بنت عمه .. وهيه واثقه انه خواتها الكبار لو رمستهن وفهمتهن اكيد بيكون الهن تأثير على ابوهن ويفنقشون السالفه قبل ماتستوي .. من يتها ها الفكره على طول نزلت تحت عند اهلها وبعد ماخفت اليلسه شويه سحبت اختها اسما ( وهيه معرسه وماخذه واحد من اهاليتهم) وبدت ترمسها فسالفة سعيد من البدايه وحتى الحينه .. اسما ماكانت مقتنعه بها السالفه ورايها كان انه بنت عمه احسله .. بس عقب محاولات من شيخه وعقب ماطاحن ها الدميعات من عينها حست صدق اسما انه سعيد عايف السالفه ومب مرتاح ووعدت شيخه انها ترمس امهم ويحاولن ويا ابوهن ...

ـــــ والعصر بيت بو محمد..كانت مريم يالسه فحجرتها وهيه مستغصه من عقب مكالمتها ويا مهره اللي قالتلها فيها انهم رمسوا امهم واللي استانست على الخبر ومدحت فمريم واهلها .. وقالت بدق لام محمد فاقرب فرصه . .وعقب اتصل علي لمريم يتخبرها وين هيه ..
مريم: بالله عليك وين بكون يعني
علي: لايمكن سايره مكان..
مريم: وين الله يخليك ترانا الا فالبيت..
علي: اباج فسالفه مريوم ..
مريم: شو
علي: انا جدام بيتكم الحينه عادي ادخل..
مريم: ياحافظ عليك البيت بيتك .. تعال ..
وبندت مريم عن علي ولبست وقايتها وظهرت برع ولقت علي فالحوي بعده .. ويلست على الدريات تترياه لين يوصل..
علي: سلمن علييهم
مريم: وعليك السلام..
علي: جيه يالسه هنه ..
مريم: يالله خبرني شو عندك ..
ويلس علي حذاها .. تم يطالع فالسما ويتلفف يمين يسار .. ومب ياسر يلف على مريوم ..
وفوق كانت حصه ماره عند بلكونه الصاله وانتبهت لوجود حد تحت وتمت اطالعهم ولقت انهم علي ومريم وتمت ترمس عمرها " يالله يا علي لو خاطبيلك مريم جان زين .. شكلكم متوالمين.. ااه يالله شو بنسوي..." وتمت اطالعهم شويه وروحت عقب.. وعلي بعده مرتبك ومب عارف كيف بيقول لمريم..
مريم: بلااك
علي: احم .. مريوم
مريم: هلا
علي: هيه
مريم معقده الحيات : بسم الله شو فيك
علي: لا ماشي.. بس يعني بغيت اخبرج شي..
مريم: شوو
علي: هذاك .. شوفي مريوم بكل بساطه ريال يبى يخطبج ..
مريم انجلب ويها وقالت فخاطرها " يالله يا مهره قلتو بتخبرون الام اشوف علي درى.."
علي يطالع مريم وهو بروحه يحس ويهه قافط ..
علي: ماتبين تعرفين منو
مريم: منو ( وهيه تعدل وقايتها وباين عليها الرجفه..)
علي: سعيد بن حميد ..
مريم تمت امبققه بعيونها وفاجه حلجها و وايدها مثبته على الوقايه بعدها واطالع علي بصدمه كبيره ..
علي: هههههههه بلاااج ..
مريم: منو
علي: سعيد ولد خالي..
مريم عدلت من هيأتها وحطت ايدها ع راسها وتمت موخيه ..
علي: تعرفين اول ماقالي تميت اضحك ..
مريم: علي انته متأكد.. مب مغلب؟
علي: بسم الله الريال مرمسني من كم يوم .. بس صراحه اتلومت اقولج .. لو انه مالزم عليه اليوم اييج واقولج جان ماقلتلج ..
مريم تمت اطالع علي وهيه ترص على ضروسها .. لولا الفضيحه جان الحينه انقضت على علي وعضته عض .. تحس انها بعدها مب مستوعبه رمسة علي . سعيد يباها لا و ومخبر علي من كم يوم .. عيل منو هاي اللي يحبها وبيتحدى الكل عشان ياخذها معقوله تكون هيه .. كانت تحس بالدنيا ادور وادور وخاطرها اتقول لعلي تأخرت وايد .. لكنها قامت من مكانها وسوت لعلي طاف وردت داخل .. علي تم يضحك وفسر حركتها بانها مستحيه .. ومارام يوقفها وقال بيعرف رايها عقب اذ موافقه ولا لا .. وطلع من بيت عمه وركب سيارته وفباله مريم وسعيد ويدعيلهم بالتوفيق .. وزخ تيلفونه ودق لسعيد وقاله انه خبر مريم واللي عليه سواه وماباقي الا رد مريم وخبره انه بيولي المهمه لفطوم ..
وعلى سوالفه ويا سعيد ما انتبه الا بسياره يايه جدامه رونق سيد عق التيلفون من ايده وقام يلفف وهو يحس انه السواقه صعبه مستويه ومب رايم يلف بالسكان واللي جدامه واصل عنده لامحاله وشكله اللي فالسياره سكران يلفف بموتره ودعم بسيارة علي وعقها ع الرصيف الثاني من بعد كم جلبه ..
سعيد يسمع الدربكه ويزاعج على علي .. بس علي مايرد عليه لانه فار التيلفون جد .. وتم مستقطع مب عارف شو يسوي .. استودت الدنيا فعينه وركب سيارته وشخط لين حارة قوم علي..
واول ماشاف الحادث وقف بسيارته ونزل على طول عندهم .. شاف سيارة علي كيف منجلبه وركض صوبه وهو يصرخ ويزاقر علي.. كان يبى يفتح باب السياره ويطلع علي بس الرياييل اللي متجمهرين منعوه وقالوا سيارة الاسعاف بتي ..
سعيد يطالع السياره ودموعه يسيلن ويصيح صياح " فجوني .. اخويه بيروح مني .. فجوني خلوني اطلعه .. فجوني .." ويت سيارة الاسعاف وطلعوا علي من السياره اللي كان بكبره ملطخ بالدم .. مرروه جدام سعيد وسعيد مصدوم ويطالعه وهو يتنافض .. وركض وراهم وركب فسيارة الاسعاف .. وكانت سيارة اسعاف ثانيه بعد يايه وشلوا الريال اللي داعم علي.. طول الدرب سعيد يالس حذال علي ويرمسه .. والمسعفين حد يحط الاكسجين لعلي وحد يعابل بالاجهزه .. وسعيد عينه على علي يترياه بس يفتح عيونه يدعي ربه وهو يمسح بايده ويه علي ويمش الدمان ..
سعيد: اللهم لا نسالك رد القضاء وانما نسالك اللطف فينا .. يالله تعافيه يالله يا رب .
وتم حاط ايده بايد علي اللي بكبرها دمان .. حس بضغطة ايده وتم يطالعه .. كان علي يشوف سعيد ..
علي: دير بالك ع الاهل يا خويه..
سعيد: علي .. اهلك فعيوني وبتقوم انته انشالله وبتحطهم بعد فعيونك .. بس الله يخليك لاتجهد عمرك..
علي: هذا يومي يا سعيد
سعيد: لاتقول جيه فديت خشمك .. يا علي انته بتقوم وبتصح
علي وهو يرمس بصعوبه: ماوصيك يا خويه
وتم يلفظ انفاسه ويردد الشهاده ورص بايده على سعيد وسلم روحه لربه .. سعيد تم يطالعه ويطالع ايده ويرد يطالعه ومب مستوعب اللي يصير..
سعيد: عـــــلي .. علي قوم الله يخليك .. علي مالي غيرك صديق فها الدنيا .. علي قوم لاتعذبني .. علي..
والاسعافيين اللي كانوا عند علي بعدوا سعيد عن علي وقاموا يعابلون ويركبون بالاجهزه ولكن خلاص فااات الاوان .. وردت الروح لباريها .. ومازالت ايد علي مثبته فايد سعيد .....

وبعد ماوصلوا المستشفى .. نزل سعيد من سيارة الاسعاف وتم واقف وهو محطي ايده على حد السياره ويحس بريوله ثجال ومب رايم يحركهن .. نزلوا علي جدامه وهو ملحف بكبره .. دموعه كانن ينسابن من غير توقف .. ماقدر يتحمل الصدمه ماكان متخيل انه علي رفيق دربه خلاص راح عنه وخلاه ..
تم يمشي بخطى واهنه وانتبه لصوت حد يزقره .. كان احمد وعبيد وناصر يايين ..
ومن شافوا سعيد تموا يزقرونه وربعوله ..
ناصر: خير سعيد شو مستوي.. وين علي
عبيد: بخير علي
سعيد ماقدر يرفع راسه ويطالعهم كان موخي والشباب متوترين .. وسعيد مب رايم يرمس .. ناصر واحمد خلوهم وركضوا داخل وين عند رياييل الشرطه والناس .. كانوا شباب من حارتهم بعد يايين ويا الاسعاف .. وكلهم داخل يطمنون على علي .. رياييل الشرطه كانوا يستجوبون اللي كانوا شاهدين الحادث..
عبيد: سعيد ..
سعيد وهو يرفع راسه واطيح عينه بعين عبيد..
عبيد: سعيد .. شو مستوي .. بلاه علي.. سعيد ..
وسعيد مب قادر يوقف بحيله وعبيد قابضنه بايده ويطالعه بنظرات كلها خوف وكلها ترقب للي بيقوله سعيد .. بس سعيد لوى على عبيد وهو يصيح ..
عبيد بروحه عينه دمعت وتم لاوي على سعيد ..
عبيد: لاتقول سعيد .. علي بخير صح .. علي مافيه شي..
سعيد: علي خلانا يا عبيد .. علي راح .. راح ..
وفالصوب الثاني ناصر واحمد من خبروهم بوفاة علي .. تموا منصدمين يطالعون فبعض وهم مب مصدقين .. خيم السكوت امبينهم ودخلوا ايشوفون علي ..
واحد من الموجودين دق لبوعلي يخبره بالحادث .. طلع من العزبه وهو مسرع للمستشفى عشان يطمن على ولده وانصدم صدمة عمره يوم قالوله انه ولده توفى.. وانتشر الخبر ودرى الكل بالحادث .. ام علي من قالولها الخبر تم قلبها مقبوض وسارت هيه وام خليفه ويا الدريول صوب المستشفى وهناك كانت الفاجعه بالنسبه الهن ..
ـــــ في بيت اليد..
كان الكل يالس يتريا اتصال واحد بس يطمنهم على علي.. فطوم كانت يالسه ودافنه راسه على ركبها وهيه تصيح ومريم حذالها تهدي فيها وتقولها انه انشالله يكون بخير .. حصه يالسه مجابلهن واطالعهن وعينها ادمع .. ام محمد وموزه ولطيفه يالسات يرمسن عن الحادث ويتناقشن عن اللي سمعنه ..
كان الكل متوتر ومشحون .. سمعوا صوت سياره تدخل البيت وتراكضن كلهن برع .. كان عبيد ياي بروحه.. يوم نزل من السياره لقى الحريم كلهن جدامه .. تمن يطالعنه ويترينه يرمس يقول شي .. عبيد تم ميود على عمره وشكله ابدن مايسر ..
ام خليفه: ها وليدي شحاله ولد خالك .. يعله بخير
لطيفه: عبيد شياه علي ..
عبيد : علي.. علي عطاكم عمره ..
من قال ها الجمله الكل بلم .. وما انتبهوا الا على فطوم طايحه مغمى عليها و مريم صرخت ويودتها وتصيح .. حصه من زيغتها ربعت بيتهم وهيه تصيح ..
ويلسن كلهن ع الارض يصيحن ويندبن الحال.. عبيد يوم شاف الصياح مشتل شل بعمره وركب الموتر ورد الدختر..

وبالباجر ... الكل توافد بيت بوعلي عشان يعزون .. ام علي من ردوها من المستشفى تمت يالسه فحجرة علي ولاقدرت تظهر منها .. اتصيح ع ضناها وقلبها متقطع على فراقه .. مريم وحصه وفطوم كانن يالسات فحجرة فطوم وكل وحده منهن حالها ارثى من الثانيه.. الحريم فالصاله ويا الناس اللي اييون ويروحون ..

وفي حجرة فطوم ــ
فطوم يالسه على الارض ومتاكيه على الييدار ودموعها ماجفن على اخوها .. مريم يالسه حذالها وتحاول تهدي قلبها بقراية القران .. حصوه طايحه ع الشبريه وكل ما تخيلت صورة علي زادت فصياحها ..
فاطمه: مريوم
مريم: عونج
فاطمه: امايه بعدها فحجرته
مريم: هيه ..
فاطمه: مريم علي خلاص مابنشوفه ..
مريم ماقدرت تستحمل لوت على المصحف وصاحت بصوت مسموع .. وفطوم كذلك .. وحصوه قامت ويلست حذالهن ..
حصه: مريم .. انا جتلت علي .. انا
مريم وهيه تلوي عليها: علي ارتاح من الدنيا وبلاويها .. الله ريحاه ..
حصه: الله يبى يعاقبني لاني كنت ماباه
مريم: حصوه لاتقولين جيه ..
وتمن يصيحن وهن متكاومات على بعض .. كل وحده تبى تواسي الثانيه وكل وحده تبى اللي يواسيها ..
وبعد مامرن ايام العزى .. وبدت ييات الناس تخف .. يلسن الحريم كلهن ويا ام علي يحايلن فيها تطلع من حجرة المرحوم .. ولكنها مب راضيه .. بعدها مب مستوعبه اللي صار ومب متخيله انه ولدها خلاص غاب من عينها ..

ـــ وفي بيت بوحمدان ...
شما يالسه فحجرتها .. وحاله هيه بعد لايسر صديق ولا عدو .. اللي يالها مب اقل من اللي صاب فطوم واهلها .. علي غناتها وحبيبها راح خلاص ومابتقدر تسأل عنه عقب!! علي الغالي خلاص ماله وجود الحينه !!
شما طول ها الايام كانت فحجرتها وماقدرت حتى انها تسير العزى او اطب ذاك الفريج .. نوره من عرفت عن الحادث ردت ويا ريلها من دبي وكانت كل يوم تسير العزى وتيلس ويا البنات وتواسي جراحهن ..
كانت يوم ترد من العزى تيلس ويا شموه بس شما ابدن ماتتنطق ولا بكلمه .. ها المره يلست وياها .. وبدت ترمسها ..
نوره: شما حبيبتي.. مب زين ها اللي اسوينه فعمرج .. انزين لا ترمسين بس رفعي راسج شوفيني .. من كم يوم ماذقتي قوت .. حرام عليج بتموتين
شما: احسن
نوره: شموه شو احسن .. علي مات والله يرحمه نحن مابيدنيا شي نسويه .. كلنا قلوبنا حزنانه عليه .. بس ها قضا ربج
شما: ليش انا ما مت بداله
نوره: استغفري ربج يا شما .. ( تمت نوره حاطه ايدها ع راسها وماقدرت تمنع نفسها من انها تصيح ..) يا ربيه من وين بلقاها انا .. منج انتي ولا من فطوم ولا مريوم .. ارحمني خلاص ..
وطلعت من عند شما وردت حجرتها وهيه اتصيح ...

ــــــ وفي بيت بوعلي ..
كان الظهر ومحد فالبيت غير فطوم وامها ويدتها.. كانن يالسات فحجرة المرحوم.. ويطلعن اغراضه وثيابه وام علي يالسه على شبريته وكل مايطلعن شي تمت تلوي عليه .. ويوم طلعن كناديره تمت حاضنتهن وماتبى تفجهن ..
فاطمه: امايه فديت روحج ..
ام علي: يا ربي لاتعاقبني فعيالي .. قبل خليفه والحينه علي .. شو هي حياتي بلاهم
ام خليفه: تعوذي من بليس يا امايه .. هذا ابتلا من ربج .. صبري والله بيكون وياج
فاطمه تمت اطالعهن وطلعت من الحجره .. قلبها كل يوم ويتقطع اكثر .. ماتقدر تتحمل .. نزلت تحت وسارت الصاله .. شافت صورة علي وفهودي اخوها المعلقه على الييدار.. وقفت مجابله الصوره وركبت على الغنفه ونزلت الصوره ..
بوعلي: شو تسوين
فاطمه نزلت من الغنفه وتمت موخيه: امايه بتنزل تحت
بوعلي وهو معصب: ها الصوره دامني حي ماباها تنزل فااهمه
فاطمه : انشالله ..
وردت الصوره مكانها .. وهيه يايه بتطلع من الصاله زقراها ابوها .. ومن رفعت راسها وطاحت عينها بعينه غصبن عنها صاحت وركضت عند ابوها وتم حاضننها ويهدي فيها ....
مرن اسبوعين على وفاة علي .. ومازال الحزن متمكن على قلوب الجميع .. وفي بيت بو محمد .. كانت مريوم يالسه ويا اهلها .. ولازم كل يوم ينذكر المرحووم عند كل حد .. ومن بدوا يرمسون عنه طلعت من الصاله وسارت حجرتها .. ولحقتها حصوه اختها.. يلسن شويه ويا بعض وهن يحاولن يتناسن الموضوع ولكن الا ما ايي فبالهن وكل وحده تبى تقول للثانيه او على الاقل اتذكر الثانيه بسالفه استوتلها ويا علي..
حصه: مريوم
مريم: ها
حصه: مب متخيله ها الوضع بعدني
مريم: كيف
حصه: مب متخيله اني مابشوف علي
مريم: حصه خلاص ..
حصه: مريوم ماروم اخوز صورته من بالي ..
مريم: منو منا يروم اصلن
حصه وقفت مجابله الدريشه واطالع فريجهم وهيه مجتفه ادينها ..مب مستوعبه الامر.. علي عاد .. اللي اللي عندها فوق الكل وامبداي على الكل .. كانت راضيه بأنها اتعيش وياه طول العمر ومحطيه فبالها خلاص انها له ومستحيل ترده بالرغم من انه قلبها ملك لغيره .. دار فبالها وساوس وتمت كله تلوم عمرها وتقول ها عقاب من ربها الها لانها فكرت فغير علي ..
مريم: فشو سرحتي
حصه: انا مب سرحانه .. انا افكر
مريم: فشو انزين
حصه: من غير علي شاغل فكري
مريم وهيه تتنهد: استهدي بالرحمن يا حصه .. ربج لو مايحب علي جان ماخذاه .. ادعيله بالرحمه .. الحينه هو مايبى منا غير الدعاء
حصه: الله يرحمه ويدخله فسيح جناته .. ( ضربتها الغبنه ولفت بويها عن مريوم وردت اطالع من الدريشه..)
دقت نوره لمريوم .. وطلعت حصوه على طول من عندها وتمن يرمسن ..
مريم: متى بتردين العين ..
نوره: بعدنا مطولين ..
مريم: احسن بعد..
نوره: مريوم بغيت اسالج
مريم: هلا
نوره: اهل دبي ..
مريم: بلاهم
نوره: شو سالفتهم الحينه ..
مريم: ماعرف.. هم يو العزى ..
نوره: ومهره؟
مريم: امبلا
نوره: ماقالتلج شي؟
مريم: شو بتقول يعني.. يايه تعزي هيه هب تخطب.
نوره: لو رمستج عقب بتردينهم؟
مريم: نوره مب وقته ها الرمسه
نوره: انزين طمنيني بس .. شو بتسوين
مريم: حياة المرحوم .. فنفس اليوم اللي توفى فيه ياني لين بيتنا ورمسني وماظنتني ارد طلبه
نوره: ليش شو استوى
مريم وعينها ادمع: ياني يقولي انه سعيد يباني .. ومن عقب ماطلع من بيتنا استواله الحادث.. يعني انا هاك الوقت لو ماروحت عنه جان الحينه هو امبينا .. ( وهنيه عاده انفجرت من الصياح ..)
نوره تمت ساكته .. شو بترمس فيها عاده .. قبل هيه تهدي فحصه وتقولها الله مكتب ها الشي والحينه هيه بروحها استوت افكارها يهوليه ..
نوره: لا حول ولا قوة الا بالله ..
وبندت مريم فويه نوره .. ها الكلمتين اميودتنهن فخاطرها وماقالتهن لحد .. طول ها الاسبوعين وهيه تفكر لو بس تمت يالسه وياه شويه جان ماصار اللي صار .. كلها وساوس الشيطان وهيه تدري بها الشي بس القلب وهو متألم لفراق انسان عزيز وغالي تتيمعله كل الظنون ..
نوره تمت يالسه وتفكر فحال مريم واهلها .. كانوا وايد غامظينها .. حالتهم وايد ادهورت .. ودقلها ها الوقت ريلها ..
نوره: هلا الغالي
سالم: بالمهلي.. انتي وين
نوره: فالحجره تعال محد داخل..
سالم: لا اظهريلي .. انا برع عند الباب
نوره: انشالله ..
وبندت عن ريلها وشلت ولدها وطلعت عند باب الفله ..
نوره: اقرب ..
سالم: سويلي درب
نوره: محد داخل ..
سالم: جيه وعمتيه وين . وشموه وين
نوره: شموه حابسه عمرها .. وامايه بيت سيف بن علي
سالم: ابو المرحوم
نوره: هيه
ودشوا داخل ويلسوا فالصاله ..
سالم: دوم عمتيه اتسيرلهم
نوره: من توفى علي وهيه ماتقطع سيراتها
سالم: هيه حليلها.. الله يرحمه انشالله ريال ماشالله كان
نوره: حليله من صغرنا ونحن دومنا وياه .. تخيل سالم لين ونحن فالثانويه كنا دومنا اندق سوالف وياه ..
سالم: شفته كم مره ويا احمد فالعين ..
نوره: والله قلبي يعورني .. يالله يا الدنيا مابغى يكمل دراسته برع عشان يتم ويا اهله .. بس الله خذاه ( وضربتها الغبنه ودمعت عينها وتمت موخيه براسها..)
سالم وهو حاط ايده فايدها : الله يرحمه انشالله ويغمد روحه الجنه ..
نوره: مريوم وايد تعبانه وفطوم حالتها ماتسر .. والله قلبي يعورني عليهن
سالم: الله يصبرهن انشالله .. هاي هيه الدنيا كلنا فانين فيها .. متى اخر مره سرتيلهن
نوره: من اسبوع
سالم: فديتج جيه ماتسيرين عليهن دوم .. اكيد محتاجاتلج الحينه .. شراتج بسيرلهن وبخفف عليهن ..
نوره: ماتحمل اشوفهن وهن بها الحاله
سالم: ايام وبتعدي انشالله .. يلا سيري لبسي عباتج بوديج هناك
نوره: وزايد عند منو اخليه
سالم: شليه وياج ..
نوره: انشالله ..
وخلت ولدها عن سالم وسارت نورة تبدل ولبست عباتها وهيه بتنزل مرت على شما..
نوره: شماني مابسيرين ةيايه؟
شما: وين؟
نوره: بسير عند مريوم وفطوم
شما: لا
نوره: شما غناتي مايصير جيه.. مول ماسرتيلهن .. اكيد فطوم محتاجتلج الحينه .. دوم يوم اسير تسألني عنج وتقول ليش شما مايت
شما: نوره ما اقهر اسير
نوره: تعوذي من بليس شما.. وقومي يلا
شماوعينها ادمع: نوره ليش تبيني اتعذب .. نوره ماتحمل البقعه بلاه ما اقدر اسير
نوره: ياشما خلاص .. الحي ابقى من الميت .. فطوم حالها مايسر سيريلها واسيها .. مثل ما انتي تتعذبين ترا فطوم تتعذب اكثر منج .. كانت فنفس البيت وياه حجرتها مجابله حجرته وين ما بتعق بعمرها بتتخيله فها المكان كل ماتشوف امها كيف حالها قلبها يتقطع اكثر.. عذابج مايي شي حذال عذاب فطوم وامها ( وهنه مارامت تكمل صاحت بقو وتمت حاطه ايدها على ويها.. ماتتخيل عمرها تفقد ولدها مثل ام علي.. بالرغم من انه البنات شاغلات بالها الا انها كانت وايد متعاطفه ويا ام علي وكل ماتشوفها تصيح....)
شما: نوره .. (وقامت ولوت عليها..)
نوره: شما صعبه يوم الام تفقد ولدها والله صعبه..
شماوهيه تزيد فصياحها: وصعبه يوم الوحده تفقد غاليها ..
نوره وهيه اطالع شما: شما عيشي الواقع .. امبونج فاقدتنه.. بس فطوم وامها غير..
شما تمت موخيه وتحس بقلبها وكأنه يدمي من الجروح وجسمها يتنافض .. تدري انها مقصره فحق ربيعتها بس كانت متألمه واايد .

شما: اتريوني نوره .. بسير وياكم
نوره: الله يرضى عليج يا شما..
ورفعت شما راسها وطاحت عينها بعين اختها . ابتسمتلها نوره وبادلتها شما بالابتسامه..
وطلعت عقب نوره من عندها ونزلت عند ريلها وتموا يالسين يتريون شما..

ــــــ في بيت بوعلي..
كانت فطوم يالسه ويا امها وابوها .. الهدوء مخيم عليهم .. بوعلي يجلب فالجريده وام علي يالسه وبالها سرحان.. فطوم اطالعهم ومب عارفه شو تقول.. تباهم يرمسون يقولون أي شي .. السكوت وايد يخوفها ..
فاطمه: ابويه
بوعلي: عونج امايه
فاطمه: وين تباني ادرس؟
بوعلي: كيفج امايه ..
فاطمه: انزين شو احسن جامعه ولا تقنيه
بوعلي: اللي يريحج غناتي
فاطمه: انا مابا اسير عنكم بعيد.. بدرس فالتقنيه
بوعلي: خلاص حبيبتي اللي تبينه بيصير
ودش فهود عليهم الصاله ..
فهد: ابويه يلا قم أخرتنا
ابويه: جيه وين تبى انته
فهد: تراك قلت بتودينا انا وعلايه عند البوش.. عمي طلعله زام وبيروح بوظبي احينه
بوعلي: انشالله الغالي ..
ووقف بوعلي لبس غترته وعقاله وهو ياي بيطلع تم يطالع حرمته.. ماعرف شو بيرمس وشو بيقول .. قال الايام بطيب خاطرها وطلع ويا ولده ..
وهو بيطلع تلاقف برع ويا احمد وسعيد وعبيد يايين .. سلم عليهم عقب روح ودشوا هم داخل عشان يسلمون على ام علي .. فطوم من سمعت حسهم طلعت بسرعه لانها كانت بليا وقايه.. ودشوا الشباب وسلموا على ام علي ويلسوا حوالينها...
سعيد: شحالج عمتيه
ام علي: شو حالي يا وليدي من عقب الغالي
احمد: يا عميته اللي خذ عنج الغالي بيعوضج انشالله ..
ام علي: وين يتعوض علي يا احمد .. والله انه عيني ماتطرف من عقب ماغاب.. النوم ماذوقه.. من لي الحينه سند فها الدنيا من عقبه
سعيد: ونحن يا عموه .. كلنا عيالج وعيونا لو تبينهن مايغلن عليج .
ام علي: تعال فديتك
ومدت ايدها له وتقرب سعيد منها وحضنها .. نزلت الدمعه من عينه وهو فحضن عمته.. من غاب عنه علي وهو حاله مجلوب فوق حدر.. محد قدر يحسسه بالحياه ومحد خفف الامه غير حضن عمته .. احمد وعبيد تموا ساكتين واحترموا ها اللحضه..
دشت فطوم عليهم وهيه شاله صينية القهوه وحطتها ع الطاوله وتمت اطالع امها وولد خالها وتبتسم .
فاطمه: ياسلام .. ونحن مالنا رب
ام علي: تعالي فديتج ..
ويلست حذال امها من الطرف الثاني وحبتها ع راسها..
ام علي: ربي يبارجلي فيكم ..
سعيد: يلا بسج قومي .. يايبه تراج القهوه سيري ضيفي..
فاطمه اطالعته.. حست وكأنه علي يرمسها.. الكل كان يشبه علي بسعيد بس فطوم تعترض ولكنها الحينه صدق حست بالشبه امبينهم بحة الصوت لمحة الويه الضحكه واايد ياخذ منه .. ابتسمتله بكل لطف.. وقامت اتقهوي الموجودين..
يوم عطت احمد الفنيان تم يطالعها وطاحت عينها فعينه ونزلتها بسرعه ..
احمد: شحالج فطوم
فاطمه: الحمدلله..
احمد: دوم انشالله ..
عبيد: ايه بلاج نشبتي .. عطيني فنيان
فاطمه: حزن .. مستلقث
وعطته فنيانه وردت تيلس حذال امها.. وعين احمد ماتنزل عنها.. يطالعها وهو مبتسم .. من توفى علي وهو دوم ايي بيتهم .. ييلس ويا فطوم شويه ويطمن عليها .. صح ماكانت ترمس مول وكله ساكته بس المهم عنده كان يلس ويونسها .. قلبه يعوره عليها .. اول مره يشوفها جذيه هزلانه وويها شاحب وعينها كلها حزن.. فطوم راعية السوالف والربشه خلاص ماعاد الها وجود .. غامظنه حالها بس ما يأس الا ويخليها تبتسم مره ثانيه وفعلا تم وراها لين ماخلاها ترمس واطلع شويه من الحزن اللي فقلبها ..

ـــــ في بيت بو محمد ..
لبست مريم وقايتها وطلعت برع وهيه ترمس ويا نوره ..
مريم: روح ريلج..
نوره: هيه بسرعه ظهري
مريم: يلا عند الباب انا..
وطلعت مريم من بيتهم وتلاقفت ويا نوره وشما وسلمت عليهن ودشن بيت قوم فطوم..
مريم: سيارة احمد ولد عموه هاي
نوره: يعني هو داخل..
مريم: اكيد.. فيه الخير وحليله .. دومه ها الوقت ايي
نوره: انزين ونحن وين نسير..
مريم: اكيد هم داخل .. بندش الميلس الداخلي نحن ..
ودشن الميلس ويلسن...
مريم: بسير اطالعهم وبيي اوكي..
نوره: بسرعه مريوم ..
مريم: انشالله..
ودشت مريوم بيت عمها من باب الميلس اللي يودي للفله .. دشت المطبخ وسألت البشكاره عن فطوم وقالتها انهم فالصاله .. وسارت هناك ..
مريم: السلام عليكم ..
وهيه داشه كانوا مجابلينها عبيد واحمد ..
الكل: وعليكم السلام..
وتجدمت مريم عندهم ووقفتلها فطوم ووايهتها .. وهيه يايه بسلم على عمتها انتبهت لوجود سعيد اللي كان يالس حذال عمته .. بدت ربكتها.. سلمت على عمتها وحبتها ع راسها
ام علي: شحالج امايه
مريم: بخير الحمدلله شحالج انتي عموه
سعيد وقف عساس يسلم على مريم.. مدلها ايده وهيه متيبسه مكانها .. وصافحته .
ومحد حاس بسخونة الاجواء عندهم غير فطوم ..
سعيد: شحالج مريم
مريم: الحمد لله ..
واخرت على ورى ووقفت حذال فطوم ..كانت واايد مرتبكه وو قافطه .. مب رايمه ترمس .. نست ليش هيه يايه اصلن ..
فاطمه: يلسي مريوم
مريم: ها
فاطمه: يلسي..
مريم: لا بسير ..
وطلعت مريم من الصاله وويها معفوس .. ووقفت فنص الدرب .. واذكرت انها يايه تقول لفطوم انه البنات يترينها.. وردت مره ثانيه الصاله بس مادشت تمت واقفه عند الباب .. مارامت ادش .. شافها عبيد وتم معقد الحيات ..أشرتله انه اييها وسارلها ..
عبيد: بلاج مريوم ..
مريم: عبيد قول لفطوم اني اباها
عبيد: انزين ادخلي ..
مريم: لا مابا .. سير قوللها انه بنات ياياتنها
عبيد: من بناته
مريم: نوره وشموه هنيه
عبيد: هيه شموه .. انزين
مريم: عبيد
عبيد: ها
مريم: روحوا انتوا انزين .. هن يبن يسلمن على عموه ..
عبيد: انزين بقوللهم ..
مريم: عبيد
عبيد : هااااااااااه
مريم: خلاص ماشي .. ( وهو ياي بيروح) عبيد عبيد..
عبيد: ويع يقولج عبيد .. شو تبين
مريم: الخييبه .. ذلف ويا ويهك مابا منك شي
عبيد: انزين شو تبين
مريم: ماشي
وردت مريم عند البنات وعبيد رد يلس ..
احمد: جيه بلاها مريوم
سعيد وهو يلف على ورى : جيه شو مستوي
عبيد: لا ابدن ماشي .. بس بنات يايات يسلمن على خالتيه
فاطمه: من بناته
عبيد: ربيعاتج ..
ام علي: بنات حميد يمكن ..
عبيد: هيه هن
فاطمه تبتسم: شموه يمكن يت .. انا بسيرلهن ..
احمد: عيل نحن بنسير..
ام علي: يلسوا فديتكم ..
سعيد: البنات يايات عاده الحينه .. باجر انشالله بني
وقاموا الشباب كلهم ..
ام علي: الله يحفظكم انشالله
سعيد: يلا فمان الله ..
ام علي: موافجين خير..
وطلعوا الشباب وركبوا الموتر وروحوا ..
سعيد: وصلني البيت احمد
عبيد: جيه سعيد
سعيد: مالي خاطر اسير أي مكان
احمد: ياريال خلك اقوى من جيه..
سعيد: يا احمد .. هذا اخويه.. اخويه .. ( ولف بويها الصوب الثاني..) من لي فها الدنيا من عقب عينه .. لاصديق ولاصاحب ولا حد..
عبيد: افا ونحن وين سرنا ..
احمد: نحن خوانك يا سعيد وقلوبنا دومها مفتوحه لك ..
سعيد: يعلني ماعدمكم ..
عبيد: يلا عيل ودونا العزبه ..
سعيد: لا برد البيت .. والله مالي خاطر اسير مكان
عبيد: يا ريااال
احمد: خلاص على راحتك ..

ــــــــ وفي الميلس.. البنات كلهن واقفات من بعد السلام ..
فاطمه: مابغيتي اتين شموه
شما: ادري اني مقصره فديتج .. سامحيني
فاطمه: جيه مايتيني من قبل ..
نوره: فطوم حبيبتي . خلاص تراها الحينه يت ..
فاطمه: شموه انتي ماتدرين انه علي توفى .. ماتدرين انه اخويه عضيدي خلاص راح ..
شما تمت اموخيه وساكته .. تقاوم صيحتها بس ماقدرت .. كانت مريم واقفه حذالها .. حطت ايدها على جتفها ..
مريم: شما غناتي .. ( اطالعها وهيه مستغبنه وفطوم من شافتها اتصيح صاحت..)
نوره: دخيل والديكن لاتفجلنا مناحه .. والله اني تعبت خلاص ..
مريم: خلاص شما .. فطوم عيوني خلاص ..
شما مشت دموعها وتجدمت لفطوم ولوت عليها ..
شما: اسفه فطوم اني ماييت .. والله حالي من حالج .. بغيت اللي يواسيني ويعزيني بفقدانه .. انا بروحي حالي كان عليل كيف تبيني اييج .. ييتيه لج ماكانت بتهون عليج ..
فاطمه: حصل خير ..
شما: مب زعلانه عليه
فاطمه: ازعل من الدنيا ولا ازعل عليج
مريم: يويلنا .. بسكن محاضن خلنا نسير عند خالوه..
وطلعن كلهن وسارن داخل ..و يلسن ويا ام علي يونسنها ..

ــــ في بيت بوسعيد ..
اول مادش سعيد البيت .. لقاه فاضي ومحد فيه .. تم يزاقر ع البشكاره وتخبرها عن اهله وقالتله انهم بيت عمه .. وسار عقب حجرته .. اسلقى على شبريته وتم يطالع السقف ..
وبعد فتره سمع حد يدق عليه الباب ...
سعيد: منوه.
شيخه: انا شيخوه
وسار يبطللها .. سعيد: جيه انتي ماسرتي بيت عمي
شيخه: لا
سعيد: عيل يوم كنت ازاقر شله ماتوايبتي
شيخه: كنت اسبح
ورد سعيد وطاح ع شبريته ..
سعيد: من متى سايرين قوم امايه
شيخه: العصر
سعيد: ليش سايرين؟
شيخه: مادلهم .. بس جيه .. خواتي كانن هنه وقالن بسيرن يسلمن على عمي
سعيد: هيه ..
شيخه: ابا ارمسك سعيد
سعيد: تعالي رمسيني
وتيلس شيخه ع طرف الشبريه: انزين قم برمسك
سعيد: شيخوه مالي بارض .. قولي شو عندج
شيخه: قبل اسبوعين رمست اسما اختيه عنك
سعيد: عني؟
شيخه: قلتلها تقول حق ابويه انك ماتبى بنت عمك
سعيد: متفيجه شيخوه
شيخه: ليش يعني .. مب أنته شليت الدنيا يوم عرفت انه حيرها لك..
سعيد: شيخوه مب وقته ها الرمسه .. انا حاليا مافكر فأي شي ..
شيخه: وحبيبتك
سعيد: شيخوه ارحميني خلاص..
شيخه: سعيد عاد ..
سعيد: ظهري برع
شيخه: كيفك .. بس انا بخبر ابويه وبقوله يفركش السالفه .. ساد قلبك متعذب عشان علي بعد يغصبونك ع شي انته ماتباه
سعيد تم يطالعها ويلس : تحبيني شيخوه
شيخه: في فالدنيا اخت ماتحب اخوها .. عيوني لك لوتباها .. انا مابا اشوف اخويه الغالي يتعذب واسكت .. بفديك بروحي لو تبى
سعيد: فديت روحج .. ادري اني مقصر وياج غناتي
وتقرب منها وباسها ع راسها ..
شيخه: وعدني انك ماتخليني ..
سعيد: وليش اخليج
شيخه: مثل علي ماخلا فطوم انته بتخليني
سعيد: شيخه شو ها الرمسه .. اللي خذ علي بياخذنا كلنا ..
شيخه: بس مابا يصيرلي مثل فطوم
سعيد: حتى لو صارلج عندج غيري اثنينه
شيخه: لا
سعيد: ليش لا
شيخه: محد يسواك عندي ..
سعيد: وامج وابوج
شيخه اطالعه وتبتسم: ممم شوي اكثر عنك
سعيد: لاوالله .. يلا عيل برع
شيخه: هيهيهي خلاص كلكم نفس الغلا
سعيد: حبيبتي والله شيخوه ..
شيخه: والله احبك ومابا شي يغصصبك
سعيد: دام عندي شيخاني الغصه مابتيني
شيخه: تقص على منو .. و حالك اللي من كم شهر وهو والله انه ..
سعيد: ماعليه شيخو.. كل شي بايد ربج وكل شي بيتيسر..
شيخه:انشالله.. انا اسمع حشره .. شكلهن امك وخواتك ين
سعيد: وين ما بتسمعين حشره وعيال خواتج اربعه وعشرين ساعه فاجين اثاميهم
شيخه: حليلهم .. بسيرلهن .. بتي؟
سعيد: لامابا .. بندي الباب وراج
وطلعت عنه شيخوه ورد لعزلته .. تم يفكر فرمسة شيخه .. وحليلها وايد محاتتنه وخايفه عليه .. يت فباله مريم .. مريم اللي اتجاهلها ها المده كلها وتناسى حبه العذري وحل فقلبه الحزن مكان الحب .. كان يتحرى عمره بما انه قدر ينسى وجودها خلال ها المده انه ممكن ينسى الحب ولكن اليوم بشوفته الها تجددت المشاعر وعرف انه مستحيل حبه لمريم يموت مهما كانت الظروف..
اتذكر اخر رمسه ليه ويا علي.. كان يقوله انه خبر مريم عنه.. وكأنه يشهده انه بلغ الامانه .. يعني اليوم مريم يوم شافته كانت تدري باللي فخاطره .. وهو لين احينه مايدري باللي فيها .. وقال لعمره بما انها تدري انه يباها بتترياه ..

وشيخوه يوم نزلت لقت امها واختها اسما .. ويلست وياهن
شيخه: جيه عليا وين عيل
اسما: ردت بيتها ..
شيخه: هيه .. وابويه
ام سعيد: خاري اظني ..
شيخه: متى بيي؟
اسما: جيه شو تبينه
شيخه: ابا ارمسه عن سعيد ..
ام سعيد: جيه بلاه سعيد
شيخه: امايه .. كيفكم اذ مارمستوا وقلتو لعمي انه سعيد مايبى بنته ترا انا برمس وبخبر عويش وبعيفها بسعيد وبخليها ترده وعمي يابر مابيردلها أي طلب
ام سعيد: صه انتي .. مالج دخل فها السوالف
شيخه: شو مادخلني.. اشوف اخويه يضيع واسكت ..
اسما: هدي شيخوه شو بلاج .. خلاص ابويه انا برمسه انشالله
شيخه: اسبوعين ولا رمستيه
اسما: ماتفيجنا ..
ام سعيد: وهو ثره شله مايرمس ابوه بروحه
شيخه: يالله يا امايه لين احينه ماعرفتي ولدج انتي.. تحيدينه مايداني يرد ابويه فشي.. لو الود وده من اول مادرى سار يرمسه ولا تم كابت على عمره.. يبى يقوله ومب ياسر. والحينه من عقب ماتوفى علي ابدن ماله بارض لاي شي .. يحس بالدنيا كلها ضده وانه ماله ونيس .. حرام امايه تحرمونه من حقه..
ام سعيد: ياحافظ على شيخوه .. قامت ترمس رمسه اكبر عنها
اسما: ماعليج منها هاي امايه .. ياما تحت السواهي دواهي
كان بو سعيد واقف عند الباب .. وسمع كل كلمه قالتها شيخه .. انسحب من المكان من غير مايحسبه أي حد .. وطلع برع .. تم يفكر فرمسة شيخه . الحينه ها البنت الصغيره تفكر فاخوها ومستقبله وهو الابو اللي المفروض عنده راحة عياله فوق كل شي مافتكر فولده ..
ماحيد بعمره الا وهو قابض التيلفون وداق لاخوه وخبره بكل شي وتفاهموا .. ورد عقب داخل .. وسار عند سعيد ..
سعيد: هلا ابويه
بو سعيد: تعال اباك فرمسه
ويلسوا فالصاله..

بوسعيد: شوف يا سعيد .. عمك تراني رمسته فاللي خاطرك اتقولي اياه.. وانا ياوليدي مابا اغصبك على شي .. هاي حياتك انته وكان المفروض اني اشاورك من البدايه .. بس اللي اباك تسويه انك تسير عند عمك وترمسه .. اكيد هو محطي فخاطره لو انه مابين ..
سعيد وهو مب مصدق اللي يسمعه .. من متى وهو يحاول يرمس ابوه والحينه من نفسه هو فركش السالفه.. اكيد شيخوه الها دور فالسالفه .. قام من مكانه وحب راس ابوه
سعيد: ربي يطولي بعمرك
بوسعيد: يا سعيد الريال يناقش ويبدي رايه فها الامور مايتم الا مندس .. انا لولا رمسة شويخ ماكنت بدق لعمك..
سعيد تم ساكت ...
بوسعيد: على منو حطي عينك
سعيد: ها
بوسعيد: شو ها بعد.. من بنته اللي تباها
سعيد: مافكر الحينه ابويه .. انا بعدني الكلية ماتخرجت منها شلي فالعرس
بوسعيد: ياحافظ عليك.. انشالله بتتخرج وبنشوفك معرس وابو عيال بعد
سعيد يبتسم: باذنه انشالله..
وعقب ماروح عنه ابوه تم سعيد يالس وهو مبتسم .. يحس بالحياه بدت تعطيه اللي يباه.. يحس وكأنه يبل انزاح من على صدره.. هموم كان وايد محاتنها .. ومب عارف كيف بيظهر عمره منها .. بمساعده بسيطه من اخته قدر يحل كل شي.. يعني لو هو من البدايه استعان ابها جان الحينه هو واصل للي يباه من زمان.. ولكن كل تأخيره وفيها خيرة .. وكل انتظاره مابيضيع هباء ..
----------------------------------------------------------------------------
ــــــــــ وتوالت الايام وشرفت الاجازة الصيفية على الانتهاء.. بدى دوام فطوم وشما فالتقنيه .. مريم ردت للجامعة ونوره كذلك ..
تواعدت مريم ويا نوره وتلاقن فالكوفي هاوس.. تمن يالسات يرمسن ..
نوره: متى يخلص بريكج مريوم
مريم: باقي ساعه ..
نوره: اخاف سالم ايني الحينه
مريم: شو اييج تمي ويايه
نوره: بدقله بقوله يأخر شويه .. اخافه يحتشر
مريم: ييه .. من الله مانتلاقى الا بالزور
نوره: صبري.. بحط السماعة عن حد يشوفني
مريم: حي .. بخبر عليج انا ..
نوره: هيه ماعليه .. (ودقت نوره لريلها وقالتله يتأخر فالييه شوي..)
مريم: ها شوقال
نوره: ولا شي.. شكله مشغول الحينه
مريم: هيه حليله عاده بيحضر للماجستير الحينه
نوره: انا اعايزبه تراني .
مريم: غبيه بدال ماتشجعينه
نوره: اتخرج ومتوظف والحمدلله .. شله بعوار الراس سنتين
مريم: خليه برايه.. احمد ولد عموه بيسافر برع عيل يكمل..
نوره: اون .. وفطوم
مريم: بلاها
نوره: عن الاستهبال
مريم: ييه يا فطوم .. تغيرت جذريا من توفى علي.. خفت سوالفها وربشتها..
نوره: حليلها.. انزين تراهم بيملجون قريب؟
مريم: كل شي تأجل الى أجل غير مسمى .. عشان جيه احمد بيسافر برع يكمل دراسته..
نوره: وهيه شو سوت يوم درت
مريم: احمد فاجأها .. ماقال لحد انه بيكمل برع.. بس الاسبووع اللي طاف كنا كلنا يالسين وسمعناه يقول بيكمل برع
نوره: انزين
مريم: بس جيه
نوره: يعني الا رمسه
مريم:لا احسبه كان يرمس جد .. بس فطوم ماسوت للامر سالفه
نوره:جيه
مريم: مادريبها .. وهو يرمس كانت ترمسني وتقول الا يخرط .. مادري شو تقصد
نوره: حليلها ..
مريم: بس اذ هو مفكر يكمل برع.. تراه سنتين بيتم .. احس انه قاصد ها الشي..لانه يدري بأنه مستحيل عمي ايوزه فطوم خلال ها المده واحمد مابيقهر..
نوره: يحيه .. الله يعينه انشالله
مريم: انشالله...

ــــــــ وفي بيت بوعلي
فطوم كانت رادة من التقنية العصر .. دشت بيتهم ولقت امها ويدتها وام محمد يالسات كلهن فالصاله ..
فاطمه: السلام عليكم
الكل: وعليكم السلام..
ام علي: ها غناتي يتي
فاطمه تبتسم لامها وتيلس حذاها: فديتج يا امايه تولهت عليج
ام محمد: ها فطيم شو التقنيه وياج
فاطمه: الحمدلله تمام..
ام خليفه: بعد هاي غير عن مدرسة مريوم
فاطمه معقده الحيات: أي مدرسة .. اماايه مريوم فالجامعه انا الا التقنيه
ام خليفه: وجيه ثرج ماسرتي ويا مريوم
فاطمه: لاا وين .. ماروم اصبر عن ماماتي ..
ام علي: يا العياره انتي
ام محمد: فديت مريوم حتى هيه ماتصبر.. دومها تتصل وماتخلي حد ماتتخبر عنه..
فاطمه: هيهيهي مريوم فنتك
ام خليفه: شو ها .. تدرسه هناك
فاطمه: هيه امايه يدرسون فنتك هناك .. يستون فنانات عقب يمثلن هيهيهيهي
ام خليفه: غيرهن الله .. شو يمثلن بعد منقوود ..
ام محمد: حيها والله فطوم راده مستانسه وتخبص على يدتها ..
فاطمه تضحك وتكمل سوالفها ويا يدتها: يالله امايه عادي البنات الباجيات هب احسن عنهن ..
ام خليفه: وابويه انا .. لالا مريوم بنتي حشيم ماتدرس ها اللي تقولينه .. انتي شو تاخذين فالمدرسه مالج
فاطمه: انا باخذ تكنلوجيا الاتصال
ام خليفه: شو يسون فيه
فاطمه: يتصلون للناس وكل شي
ام محمد اطالع ام علي ويردن يطالعن فطوم وهيه تتناقش وتخرط على يدتها..
ام خليفه: غربلات بليسج .. بعد تتصلون حق رياييل
فاطمه: هيه امره حق كل حد
ام خليفه: غربلالله عدوينج ..امايه اتلاحقي على بنتج بيخلونها ترمس رياييل.. اخييييج شو ها المنكر اللي تدرسونه .. ودريها الدراسه ولد عمتج حاشرنا يباج فكي عمرج من ها المنكر ولا العسو المحناية زاهبه ..
فاطمه هنه قفطت وسكتت وامها حذالها اطالعها وتبتسم : عمتيه بنتي تسوي سوالف وياج الا .. بييبن شهادات انشالله هيه ومريوم وبيرفعن روسكم
ام خليفه: جيه خريط اللي قالته
ام محمد: هاهاهاها تخربط الا قلنالج
ام خليفه: غيرج الله من حبيصه .. قاصه عليه
فاطمه: فديتج انا .. مايطيع زينج نخربط عليج بس نسولف .. نغير المود شويه ..
ام علي: سيري امايه بدلي وارتاحيلج شويه
فاطمه: انشالله .. يلا تامروني ع الشي .. يدوتي تبين شي..
ام خليفه: يدتج الجلبه هاذيج سيريلها..
فاطمه: بل فديتج جيه زعلتي .. ( وسارت عندها وحبتها ع راسها ..) مشكله بعد يوم يزعلون
ام خليفه غصبن عنها ضحكت وضربت فطوم ..
فاطمه: مول ماضربتي امايه
ام خليفه: خلج ..
فاطمه: هيهيهيهي يالله انا بسير ..
ام علي: الله يحفظج
وطلعت فطوم من عندهن وهيه فارده ويها .. تحس بوناسه فداخلها ماشعرتبها من توفى علي .. صح مرن شهرين وبدت شويه الويوه تغير من ملامحها الحزينه .. بس بعده .. علي الكل مفتقدنه .. والكل ميود فقلبه الحزن ..
دخلت حجرتها وبعد ماتسبحت طاحت ع سريرها .. كل مره فايدها دبدوب تلوي عليهم كلهم وفالاخير قبضت دميتها .. تمت اطالعها .. يلست اتسطعها .. تلعب بشعرها .. لين غلبها النعاس ورقدت ..
فاطمه من عرفت انه احمد بيسافر يدرس برع وهيه مب مصدقه يعني مسويه للأمر طاف وقالت أكيد بما أنه احمد ماعطاها علم للأمر من قبل يعني ها مجرد كلام صدر منه .. وكانت مطمنه على الاخر..

ـــــــــ وعلى نهاية الاسبوع ..
طبعا نزلت مريم من الجامعه .. وتجمعت العائله .. الكل يوم الخميس يالس فبيت اليد .. مريم وفطوم وحصوه يالسات على طرف ويرمسن ..
مريم: فطوم .. الكبش احمدوه يطالع صوبنا لاتلفين بويهج
فاطمه: حلفي
مريم: والله
حصه: مريوم مايطالعها عاد ..
مريم: جب انتي .. هكن عويناته مصوبات امره
فاطمه: احمد مابيسوي ها الحركه الا مراده من شي ..
ولفت فطوم بويها وطاحت عينها بعينه .. يبى يقولها قومي ابا ارمسج بس ماقدر يفهمها .. طرشلها مسج على تيلفونها .. فطوم سمعت صوت المسج ويوم قرته ..
فاطمه: يباني اطلع برع
مريم: هو مطرش
فاطمه: هيه
حصه: شعليكم .. يا فرحته هو يوم طلعولج التيلفون
فاطمه: حرام عليج .. والله انه مايدقلي ولا انا ادقله الا فالضرورات
حصه: هيه باين
مريم: انزين والحينه اونج بتظهرين
فاطمه: صبري برد عليه..
وطرشتله.." وايد ذكي انته.. الكل هنه وتبانا نطلع .. مافيني ع الحشره.. "
احمد يوم قرى تم معفس بويها .. الحين شو الحل .. لازم يرمسها اليوم .. لانه خلاص ناوي على الرحيل ومحد بيرده وطرش مسج ثاني " حياتي انتي.. اباج ضروري" .. وقرت فطوم وبدت تفكر شو ها الضروري .. وردت اطرش" شو عندك انزين ؟ الحينه ماقدر اطلع" ويوم قرى المسج .. تم يتأفف وتغصص منها .. .. قام من اليلسه ..
ناصر: ها وين ساير..
احمد: متواعد ويا سعيد
عبيد: بسير وياك ..
احمد: يلا عيل..
سالم: ايه وانا ..
عبيد: ارتاح مكانك الغالي
لطيفه: شو ها بعد .. خلوا اخوكم يسير وياكم .. عنبووه
ناصر: سلوم انته من استويت اتسير وترد ويايه .. شو تبابه عبيد
سالم: ابا اشوفه وين يسير ويرد
عبيد: ييه بيحاسبني بعد .. يلا احمد جنك مواعد الريال بتتأخر عليه..
وطلعوا الشبيبه .. والبنات عيونهن عليهم .. فاطمه فخاطرها شكله حرج احمد منها.. ومريم ياحافظ سايرين لسعيد ويل حالي لاجواب ولا شي من صوبه .. وحصه اطالعهم وفكرها سرحاااان بالمره .. مثل هااي اليلسه فكل مره كانوا يظهرون الشباب ووياهم شخص .. وينه ها الشخص الحينه ..
مريم: بلاج حصوه متنحه على الباب
حصه: اتريا علي يطلع
فاطمه: حصه
حصه وهيه تنتبه لرمستها: ها .. قصدي اذكرت علي
قالتها بصوت شوي عالي .. مريم وفطوم تمن مويمات .. ويدعن انه ام علي ماسمعت حصوه .. محد سمع صح .. بس سالم سمع .. تم يطالع حصه بنظرات حزينه .. وحس بعمره عاجز عن الحركه ومارام حتى يعدل بيلسته.. حصه حبيبته مازالت رابطه عمرها بعلي.. حتى بعد وفاته!! بس اللي يدور فباله متى بتحن عليه حبيبته!
احمد وهو طالع طرش مسج لفطوم كتب فيه " حبيبة قلبي.. انا مسافر ورا باجر.. تمي بغياضج هذا انزين .."
فطوم من قرت المسج بققت بعيونها .. وطلعت من اليلسه بكل هدووء ولحقتها مريم..
مريم: فطوم عاد انتي تعرفين من اسبوع انه بيسافر
فاطمه: بس ما أكد .. تحريته يسولف
مريم: يالله ترا قال ورمس جدامنا كلنا
فاطمه: ليش يسافر ويخليني.. ساد اخويه خلاني بعد هو يخليني
مريم: شو بيسوابج انتي.. رمسيه انزين
فاطمه: مابا
مريم: كان يبى يخبرج عن سفرته يوم قالج اظهري
فاطمه: يمكن
مريم: اكيد عيل بيرمسج عقب وبيقولج اسبابه..
فاطمه: وانا حق منو بيخليني ولا خلاص صرت ما اعنيله شي
مريم: فاطمه بس .. احمد يحبج وانتي تعرفين ها الشي .. لا تمين توسوسين
فاطمه: دقيله خليه ايرد
مريم: اسفه.. وبعدين كيف بيرد وهو يقول مواعد سعيد.. يوم بيرد فليل رمسيه
فاطمه تمت اطالع مريم بنظره مكسوره .. وسكتت .. تمت اترتب افكارها والرمسه اللي تبى تقولها لاحمد..

ــــــ فها الوقت في العوير.. مهرة يالسه ويا امها ويرمسن ..
ام مهره: الله يعينهم على بلواهم .. عندالله يا الدنيا.. ربيع اخوج كان .. يسير ويرد وياه يوم كانوا فمصر..
مهره: الله يرحمه .. بس امايه مرن شهرين الحينه وبنكمل الثالث.. وانتي مارمستي ام مريوم ..
ام مهره: يالله يا مهره العرب بعدهم جروحهم ماطابت وتبيني ارمس فها السالفه.. حشى عليه
مهره: امايه
ام مهره: لا فديتج .. مب حلوه ..
مهره: عيل مته؟
ام مهره: اذ الله كاتب لاخوج نصيب ويا مريم بيسهل علينا كل شي ..
مهره: وان حد خطبها ها الفتره
ام مهره: ربج يعين
مهره: بس محمد يباها
ام مهره: البنات متروسات
مهره: هو مايبا غيرها امايه
ام مهره: شو بيسوى يعني..
مهره: خلاص امايه بنتريا شهر وبترمسين ام مريم اوكي
ام مهره وهيه تتنهد: ان الله راد
مهره تبتسم: فديت روحج يا امايه
وعقب ماطمنت مهره على اللي كان شاغل بالها .. بدت تسولف ويا امها وتدخل فمواضيع مختلفه .. وتناقش وياها سالفة الملجة متى بتكون لانهم أجلوها لعطلة نص السنه ..

ـــــــ البنات من عقب ماظهرن من بيت يدهن يلسن فالحوي .. فطوم كانت وايد مضايجه ومريم تهدي فيها .. حصوه طلعت وراهن .. ويلست وياهن .. وعقب بشوي ياهن سالم .. ويلس حذال مريم ع الدجه ومجابل فطوم وحصوه اللي كانن يالسات ع الارض..
سالم: فطوم شو فيج
فاطمه: ماشي
سالم: بسم الله .. بلاها هاي
مريم: ضايجه شويه
سالم: هيه
مريم: شو الدراسه وياك بو غنوم
سالم: عاثره
مريم: افا .. ليش
سالم وهو يطالع حصه: مادري ..
حصه حست انها يطالعها .. وكأنه يباها ترمس بس هيه تمت ساكته واطالع فطوم .. ماتبى عينها اطيح فعينه .. ماتبى احسيساها ومشاعرها تجدد .. كفايه قبل.. كانت تعتبر مشاعرها قبل خيانه لعلي والله راواها .. ها تفكيرها .. وها اللي يخليها تحمل عمرها الذنب ..
سالم: حصه انتي باديه اوكي فالدراسه
حصه: ها
مريم: حصوه اذاكر بتغلبك
سالم: حصيص علمي انا الا ادبي ..
فاطمه: لا تستهين بالادبي .. يباله شده بعد
سالم: انا مب فالح فشي اصلن .. ماعرف شو الكتب فيهن
مريم: سالم لازم اذاكر اول باول
سالم: بيخلص الشهر الاول فالدراسه وانا بعدني الكتب مانزلتهن من الموتر
حصه هنه غصبن عنها ضحكت .. سالم عيبته السالفه .. يوم هاي السالفه رام فيها يضحك حصه وينسيها همها .. عيل بيروم انشالله انه ينسيها كل شي ويفرغ قلبها الصغير من الهموم اللي شالتنها ..
مريم: حلف بربك سلوم
سالم: والله ماقص عليج .. شو ابابهن انزلهن .. كله محطي اني بدورلي تلخيصات
حصه: يحيه .. والله مذاكرة الكتب احسن
سالم: خل عنج عاد .. احسن للبنات الدحيحات .. اكيلات الكتب
حصه: هبي .. صل على نبيك
سالم: اللهم صلي وسلم على سيدنا محمد .. بس بعد بتمن دحيحات
مريم:الله يغشك يا سلوم .. مادري كيف بتفلح
سالم: سكتي الله يخليج .. ها الشهاده صافنهن صف تراني .. لو بندز فالمواد الا العربي شو بسويبه والجغراافيا يا لووعته .. فها الحصتين بالذات اطبه المدرس وايلس العب بالتيلفون
حصه: ماشالله عليك .. شو مب محطي فبالك هدف انته
مريم: كلنا كنا محطين فبالنا نسبة وذاكرنا ويبناها .. همتك الحينه بو الشباب انتبه لعمرك من البدايه..
سالم: شو اباها النسبه .. بييب فوق الستين وبيدخلوني أي كليه
مريم: يا حافظ عليك وانا اقول سالم بيكمل جامعه .
فاطمه: ها ويه جامعه .. بيت عموه محد طلع منهم فطين غير احمد
سالم: هيه عاد بتحامي عن الخطيب
فاطمه وهيه رافعه حياتها: تعرف ويهك
سالم: هيه هاذوه.. شحلاته يخبل ..

فاطمه: اجلبه عيل..
حصه: حلللوه هااي هيهيهي
سالم: لاوالله عيبتج ..
مريم: هههههه حليلك يا سلوم ما بيرحمنك ها الثنتين ..وحليله شو يجلب ويهه ساد ياي ومونسنكن بعلومه
سالم: ها الناس هم .. هب عوير وزوير اللي جدامي
حصه: فعيييييينك ..
فاطمه: لالله انته عوير وحرمتك اللي بتاخذها قلها زوير ..
سالم: هيهيهيهي فديتها عادي تراني قلتلها ( بصوت واطي..محد سمعاه غير مريم اللي عطته بنظره خلته يقفط..)
وبعد شوي طلع ناصر من البيت وسار وياه سالم .. اما البنات فردن عند الحريم ..
ويوم تفرق الكل .. تمن مريم وفطوم بيت يدهن ويا موزه وولدها ... يدتهن دشت ترقد وعمتهن بعد شحوتت عيالها ودشوا يرقدون ..
مريم: بعدها عشر وين يبون الكل دخل يرقد
موزه: جيه .. شكلي انا بعد بخليكن وبشل ولديه وبنسير نرقد
فاطمه: افا ونحن منو بيتم ويانا
موزه: الا بيتكن ها يلسن برواحكن
مريم: ماعليه انزين انتي .. اللي يتم وياج ..
موزه: هههههه وليدي اشوفه قام يثاوب ..
مريم وهيه تشل علاوي: عليوي بترقد
علاوي: بابا
مريم: بلاه بابا
علاوي: بى بابا
مريم: بابا وين ثره
علاوي: هن هن
فاطمه: عاش الهن .. موزه كم كمل
موزه: سنه ونص بعده ..
مريم: يا الشيبه .. فديتك وفديت اسمك
فاطمه: عاده وينهم اللي مسماي عليهم .. يدي وراح واخويه لحقاه
موزه تمت اطالع فطوم ومب عارفه ترد ..
مريم: كلنا لاحقينهم يا فطوم .. موزه ولدج يثاوب عسل الريال
علاوي وهو يطالع مريم وحايس راسه : بى باباه
مريم: يعلك يا نويصر جان تخلي ها الياهل يزاقرك وانته محد
فاطمه: قوييه
موزه: يا الهرمه نويصر اللي بياخذج .. ها عمج
مريم: عاادي لاه..
فاطمه: الا من وراه من جدامه ماتيسر
مريم: يالله جيه مايسر .. من استويت وانا دومي ويا ناصر.. جنه اخويه هب عمي
موزه: يحيج انتي ..
فاطمه: اقول موزه دقي حق ريلج طالعيه متى بيي
موزه: ليش
فاطمه: بس بنسولف وياه
موزه: لاحول.. ماحيدج تسولفين ويا ناصر
مريم اطالع فطوم : هيه موزه دقيله طالعيه وين.. من زمان ماخذنا وعطينا وياه
موزه: لحظه بشوفه
مريم: تخبريه عن عيال عموه بعد
فاطمه: يالله جيه شو تبينهم ( اونها تستنكر على مريوم.)
مريم: يالله يافطوم شو شواباهم .. عيال عموه هاذيل
موزه: اخبركن لعبن على غيري انتن .. قوليلي دقي لناصر وتخبريه عن احمد واختصرن الدرب
مريم عاد بقت من الضحك وفطوم تبتسم وهيه قافطه.. موزه فهمت لمرادهن
ودقت لريلها وقالها انهم يايين فالدرب..
موزه: على مشارف الوصول حبيب القلب
فاطمه: ها
مريم: شو ها موزه خليتيها تستحي
موزه: ههههههه فطوم تستحي
فاطمه: ياسلام مب بنت جدامكن .. يعني مول ماستحي .. فاصخه الحيا
موزه: محشوومه هههههه
مريم: فديتها بنت عمي .. خدودها احمرن حتى .. خلاص درينا انج تستحين
فاطمه: جب انزين
موزه: ها صوت سياره
مريم وهيه توايق من الدريشه: ول طالعي يسابقون ريلج واحمد
موزه: دومهم هاذيل جيه .. من يدشون البيت لازم يلفون على الدوار ويعطون ويل
مريم: وامايه وين عنهم
موزه: حليلها عمتيه تكون راقده ويفززونها
فاطمه: هيهيهي فديت العيوز .. تفز بعد
موزه: حيج انتي .. بس يلسن تنشافن تراكن ..
ويوم دشوا الشبيبه ...
ناصر وراه احمد وعبيد وسالم.. سلموا ويلسوا ويا البنات..علاوي من شاف الابو ركضله ويلس ناصر حذال حرمته فطوم ومريوم ع غنفه والغنفه اللي حذالهن سالم وعبيد واحمد بعدهم موقفين..
عبيد: غريبه منزربات داخل اليوم .. كنا دوم يوم نرد انا وعلي نـ (وقطع رمسته بسرعه وبدى يتلعثم خصه من شاف فطوم ..)
احمد وهو يغير السالفه: انا يوعان .. منو منكن بتعشينا..
ناصر: هيه والله يوع .. ماتعشينا حليلنا
مريم: جيه والمطاعم اللي فاجه ذراعينها ..
احمد: لاعاد انا وناصر مشتهين عشى من ايدج اليوم
سالم: هيه يلا مريوم سيري سويلنا عشى معتبر
مريم: مايحتاي انا بسوي ..
فاطمه: تبونها تسممكم خلوها تسوي
موزه: تصدقين مريوم .. من طبيت فريجكم وماجد كلت من ايدج
مريم: هاا .. والكيك اللي اسويه
موزه: ها طبيخ بالله عليج .. قصدي شي شي يعني
فاطمه: هاي الكيك اللي تسويه تراه الا جاهز
مريم: فقت ها الراس .. المهم انه كيك واني ضربت الخلاط فيه وحطيته فالفرن واستوت كيكه بعد شو ..
موزه: فطوم وحليلها اطبخ .. شحلاته اكلها
مريم اطالعهم كلهم وامبحلقه بعيونها : ويعني شو المطلوب
عبيد: شمري عن ساعديج وسيري سويلنا شي
مريم: فطوم انتي مدحوج قومي سوي
احمد: لا انتي بتقومين .. فطوم ما تشتغل عندهم
مريم: يااسلااام وانا اللي اشتغل
ناصر: ههههههه كيفج مريوم يلا قومي عليج طاح الحمل .. ماعندج حد يحامي عنج..
مريم: ياسلام .. عندي سلوم يلا رد عليهم
سالم: لالا سيري سويلنا عشى .. انا صدق يوعان تراني
عبيد: ويييييو وحليلها
مريم: الله ينفدك انته .. شعندك عليه .. موته على حراق ويهي
عبيد: شو اسوي .. يعبني ويهج يوم يقفط
مريم: وياويهك ..
احمد: يلا قومي مريوم
مريم: انزين بقوم .. بس حلموا بأكثر من سندويجات جبن
ناصر: لا مايسد اليوع
موزه: مريوم سوي برغر .. وبيض .. وجبن..وحليلهم يواعا ..
احمد: وسوي بطاطا وهاتي الكاتشب بعد
سالم: انا ابا سندويجة همبرغر ولاتحطيلي طماط فيها ..
عبيد: انا لاتحطيلي خضره امره انزين..
ناصر: انا سويلي جبن ..
احمد: انا ابا هنتين جبن وهمبرجر..
مريم: ومعده .. مب زين يمتن ..
احمد: انتي شعليج .. يوم بمتن هاذيج الساعه رمسي
سالم: رياضي اخويه محافظ على لياقته ..
ناصر: يلا خلصنا اوامر سيري سوي ..
مريم وقفت واطالعهم واحد واحد ومحطيه ادينها على خصرها وادق بريولها على الارض وراصه بعيونها .. فطوم اطالعهم واطالعها وهيه تضحك ومب رايمه تسكت مريم: بعد يتأمروون ..
فاطمه: مريوم ايي وياج ..
احمد: لا ارتاحي انتي .. يلا مريوم سيري ( وسار ييلس حذالها بشوي .. وفطوم تعرق وتنشف.. وهو مسوي الامر عادي ويضحك ويسولف لو انه كان متغصص منها بس قال بيرمسها عن السالفه عقب ..)
وسارت مريم المطبخ التحضيري وتسمع شو يبون الشباب وقامت اطلع سندويجات الصمون والجبن وقلت بيض وسوت البرغر .. يلستلها حوالي نص ساعه واللي فالصاله حاطين عليها حط عبيد: يالله ماصارت سندويجات هاي .. غووزي سايره تسوي هيه
موزه: هههههه حليلها مريوم كلكم طحتوا عليها طلبات ..
فاطمه: منشوف خبيصها عاده شو مسويه
سالم: يالله عني خليتها بروحها اتسوي .. بسير اطالعها
احمد: ويلك .. خلها بروحها تشتغل
فاطمه: خيبه تأديب
احمد: خلها ..
سالم: لالله بسيرلها ماتهون عليه
ناصر: ياحافظ عليك .. مشكله ماكنت كبرها ولا عادي تاخذها
سالم: انزين عادي السيده خديجه كانت اكبر عن الرسول بكم سنه .. بيغلبنا ثلاث سنين يعني !..
فاطمه اطالعه: لااه .. مفكر يعني
سالم: هيهيهيهي حليلي بعدني نونو .. بعد مافيني اخذ عيوز بتلعوزني عقب ..
مريم وهيه ادش وقابضه الصينيه : منيه اللي بتلعوزك؟
عبيد: ههههههه شكووه
ناصر: تعالي الريم الحقي على الصبي .. طلع هيمان فيج
مريم وهيه تشق الحلج: لاوالله
موزه: مشكله بس قال مابا عيايز
مريم: ها اندوكم سرطكم ..( ووطت الصينيه .. كانت مسويتلهم اللي يبونه وشكلهن واايد شهي.. والريحه شحلاتها .. والمنظر وايد كول .. والترتيب .. هجموا الكل ..)
مريم: والخيبه انزين قولو شكرا اول ..
سالم: تسلم ايييدج بنت خالي..
عبيد: عاده من زينه نقول شكرا .. بس يالله الرضى بالقليل
ناصر: يالله عنك كسرت بخاطرها .. مشكووره بنت خليفه ماقصرتي
مريم شاقه الحلج ..
موزه: زين عيل يوم رمتي لها الشغلات لج مستقبل عيل
مريم: هيهيهيهي انزين تعالو منو العيوز هاي (وهيه اطالع سالم..)
سالم: هااا لالا محد.
فاطمه: والله عمج قال لسالم بيوزج اياه فقال انه مايبى عيوز
مريم: نعم نعم
سالم: هيهيهيهي لا جذابين ..
مريم: اييه ودك انته ودك ..
سالم: هيه والله ودي انا .. بس مانروملج
مريم: عنبوذا الراس .. واصلن من قال اني باخذ ياهل
سالم: افااا الحينه انا ياهل
عبيد: هيهيهيهي بعدك ماطلعت من البيضه .
مريم: يا مسود الويه ..
سالم: خلاص خشمج خشمج ..
مريم: قم عني امره لا ترمسني جنه ها يطلع منك
سالم: افا عليج بنت خالي .. انا قلتلهم ماتهون عليه الريم تخلونها تشتغللكم وعاد هم زودوا الرمسه عقب..
فاطمه: ياااا الدبس ... مادري منو قال مافيني اخذ عيوز
احمد: فطوم ما تجذب تراها ..

فاطمه: هيه والله
سالم: ييها رمسوا ها الاثنينه عاد
فاطمه: جب انزين
احمد: سمعت .. انجب
فاطمه اطالع احمد فخاطرها تضحك بس اونها مسويتله طاف ..
وبعد فتره ...
ناصر: يالله انتشحوا ايه .. نحن بنسير نرقد
احمد: سير ارقد انته .. نحن بنيلس نسولف شويه
مريم: لا انا بروح تأخرت امايه بتحشرني
فاطمه: وانا بعد
احمد: شو تروحن بتي الساعه وحده الحينه هب زين تطلعن فليل. باتن هنيه
مريم: حلف انها وحده
احمد: الحينه بتي
فاطمه: لابالله انغسلنا اليوم مريوم
مريم: انا بروح .. قوم سلوم وصلني لين بيتنا
سالم: تراج ماتبينه الياهل
مريم: اباه الحينه يلا قوم ..
احمد: وياها الراس .. تمن شويه ونحن بنوصلكن عقب
فاطمه: هيه عشان ننغسل من الزين ..
ناصر: يلا موزه شلي ولدج من مساعه راقد ..
موزه وهيه تشل علاوي: مريوم ردي الصحون فالمطبخ
مريم: بعد معشتنكم وانظف وراكم
ناصر: هيه كيفج ..
وروحوا هو وحرمته ..
مريم: خلوه محله لويثكم والله ماشليته .. بعدني اسير واقرقع فالمطبخ اتهبون الا انتو
عبيد: يلا مريوم بنشل وياج .. الصراحه غمظتيني
مريم: والله ماشليت شي .. انا بسير
فاطمه: ويااج عنوني .. صبريلي
احمد: صبرن انزين كلنا بنطلع وياكن ..
مريم وهيه واقفه عند حد الباب ويا فطوم: اول شلوا الصحون
احمد: لاوالله
سالم: قوم عبيد بنشلهن .. باجر بتوعى العيوز وبتهزب ..
مريم: ايه انته العود شل ويا اخوانك
فاطمه اطالعها: خليهم بروحهم يشلون
مريم: لا هو يشل وياهم ..
احمد: مب عكيفج .. (وتجدم صوبهن )
مريم: ويا ها الراس .. تموا بروحكم انتوا انزين انا بسير
فاطمه: تهبين الا انتي
احمد: مريوم صبري شويه .. بس بقوللها شي
مريم: اسفه بروح
احمد: مريوم عن النحاسه ..
مريم: افف .. تبون ترمسون ارمسوا وانا موجوده
احمد: لاوالله .. جلبي ويهج
فاطمه: لاا تمي
احمد: فطووووم رمسه بيني وبينج
فاطمه ميوده ايده مريم: امايه بتحتشر ..
احمد: فطوم عاد ..
مريم تأففت واطالعتهم ...
مريم: خلصوا مشواراتكم بسرعه بسير عند الشباب جان ماكسروا المواعين فالمطبخ
احمد: يازينج يا الريم يوم تسمعين الرمسه
مريم اطالعتهم وهيه رافعه حياتها وسارت المطبخ ..
احمد: بعد ماتباها تروح.. جيه باكلج انا
فاطمه: هيه امره
احمد: شو بلاج
فاطمه: مابلايه شي
احمد: علينا .. المفروض انا اللي اتم محرج منج هب انتي
فاطمه: لاوالله .. بتسافر وانا اخر من يعلم
احمد: اول ماقلت اظني كنتي موجوده .. شو اسويبج يوم انتي بانيه ها الحاجز بيني وبينج .. حتى الرمسه ماقمتي ترمسينها ويايه .. ايلس وياج شويه وتروحين .. شو اسوي يعني
فاطمه واطالعه : يعني بتسافر
احمد: بسافر
فاطمه: سنتين مابتي
احمد: سنتين بس بيي من فتره لفتره
فاطمه: وانا
احمد: اترييني سنتين .. طول عمري وانا اترياج آنسي العذاب ها المره انتي.
فاطمه: حرام عليك .. ساد فراق اخويه بعد انته
احمد: حبيبتي الدماني .. كل يوم لو تبين بدقلج كل يوم بتشوفيني بعد لو تبين .. فاطمه: ماباك تسير.. حضر الماجستير هنيه
احمد: ما اقدر فطوم .. انا بس عيزت من التريي .. كل ماشوفج احس اني بفقدج .. ابا ها السنتين يخطفن على خير وانا بعيد عنكم واول ما ارد بملج وبعرس بنفس اليوم وماعليه من حد ..
فاطمه: احمد ( بنبرة رجا)
احمد: ماقدر والله فطوم ...
فاطمه وخت براسها ومن غصتها طاحن دموعها .. احمد تم يطالعها وهو ساكت .. يدري من اول انه فطوم بتضايج بس شو يسوي .. خلاص تحدد السفر ويبا يكمل برع لانه يدري لو تم فالدوله مابيقدر يكمل بيتم كله يحاتي فطوم ويفكر فالملجة والعرس وظروفهم ماتسمح فالوقت الحالي.. هو محترم قرارهم ويدري بأنه قلوبهم حزنانه بعدها بس شكثر بيتريا فباله انه بيسافر واول مابيرد بيشوف الاوضاع تحسنت..
احمد: فطامي .. والله احبج .. ها الفتره اللي بغيبها اباج فيها تصونين حبي .. واباج تكون متأكده اني مستحيل اتخلى عنج ..
فاطمه: بس الحين بتتخلى
احمد: حبيبي افهميني ..
فاطمه بعد تنهيده يأس: خلاص بكيفك.. بس متى السفر؟
احمد: يوم الاحد..
فاطمه تمت ساكته واحمد مسك ايدها وتم ميودنها .. مش دموعها وعيونه ماتنزل منها .. هو بنفسه عينه دمعت .. سحبت فطوم ايدها من ايده .. واطالعته..
فاطمه وهيه تبتسم: يعل الرب حافظنك انشالله ..
احمد: من قلبج
فاطمه: من كل قلبي
احمد: مب مضايجه
فاطمه: بعدك عني اكيد بيضايجبي بس دام ها رايك بحترمه ومابعترض
احمد: فديت روحج الغاليه.. ربي يقدرني انشالله واخلص واردلج .. صدقيني فطوم بخليج اسعد وحده فها الكون .. ماببخل عليج بشي .. عيوني لو تبينهن فدوى لج .. كلي فداج ولا اشوف دموعج نازله ولا احس الحزن بصوتج
فاطمه ابتسمتله ووخت براسها ..

وفي الصوب الثاني .. عبيد ومريم وسالم يقرقعون فالمطبخ .. ينظفون المواعين ويحطونهم فالكبت..
عبيد: يالله يا مريوم ظهري تيبس .. دخيلج تعالي غسلي بدالي
مريم: ماشي يلا اشتغلو .. زين مني ييت اشرف عليكم
سالم: انا عيزت من التمشيش .. اندوج ها
مريم: ماشي يلا .. باقلكم صحنين .. والقلايه .. يلا بتخلصون
عبيد: انا شو كالفني داق ع الصدر وقلت بشل وياها.. مادري انها بتخلينا نغسل
مريم: هيه جيه بتخلون المطبخ لوث عيل ..
سالم: هيهيهي عادي مسوينها مره ..
عبيد: هاك اليوم الكل ياي هنه وانا وسلوم تمينا فالعين
سالم: كنا سايرين نحوط وردينا نص الليل ومشتهين معكرونه.. مايسرنا نوعي البشاكير وعفدنالج فالمطبخ وجلبناه فوق حدر
عبيد: ييه يا المهاسه اللي استوت الصبح .. كل بشكاره تهازب من صوب .. حتى الطباخ زين مافلعنا يبوج
مريم: هههههههه دواكم .. ولا انتوا شلكم فالمعكرونه .. على الاقل سولكم اندومي
عبيد: اخ مب حلو
سالم: ماعليج .. سوينالنا هاذيج المعكرونه ورمينا رم منها..
مريم: ياحافظ عليكم .. انا لو عزيمه استوت عندنا ولا شي ايلس فالمطبخ وفاجه حلجي اشوف البشاكير شو يطبخن ومع ذلك للحين ما جربت اطبخ شي
سالم: مالت عليج .. شو خانتها البنت ماتعرف تطبخ .. عيل شو بسوين لريلج
مريم: هيهيهي عادي باخذ دوره قبل ماعرس
عبيد: مايحتاي دوره نحن بنعلمج كل حصه بمية درهم.. دسكاونت تراه الا حقج ..
مريم: هيه ماعليه عشان تعلموني اسوي سم بدال اكل
عبيد: افف واخيرا خلصت .. يلا خلونا نطلع ..
مريم: شطار عيال عموتي .. يعل الرب يحفظكم لحريمكم ..
عبيد: لحريمنا.. خلينا نعرس اول .. يلا طلعوا
ويوم وصلوا الصاله لقوا احمد وفطوم يالسين وداقين سالفه ..
مريم: ياحيهم .. يالله بسكم سوالف .. ابا اروح
فاطمه: مريوم ببات عندج انا .. توها امايه دقت واحتشرت عليه وقلتلها اني ببات عندج..
مريم: اوكي قومي عيل
عبيد: يلا تصبحون ع خير
سالم: وانا بعد بسير انطبر ..
مريم: نعم .. لا حضرتك بتوصلنا .
احمد: مايحتاي سويلم بيوصلكم بروحه يتبريد من شيخ الين
سالم: جب جب
مريم: يا الديايه
احمد: هههههه يالله قومن بوصلكن ..
وطلعوا مريم وفاطمه واحمد .. تموا يتمشون لين بيت بو محمد .. ويوم اطمن عليهن انهن دشن البيت رد هو بيت يده ...

ــــــــــــ بالباجر بيت بو محمد ..
فطوم ومريوم كانن يالسات فالصاله ويتناقشن ..
مريم: سعيد كان يبى يخطبني ..
فاطمه معقده الحيات: سعيد ؟ متى هاا . وليش كان والحينه شو
مريم: خيبه هيدي عليه ..
فاطمه: ليش ماقلتيلي من قبل..
مريم: الظرف ماكان يسمح ..
فاطمه: يحيك يا سعيدان .. يعني اتنطق ورمس .. انزين منو قالج وشدراج ..
مريم: حياة المرحوم قالي .. انه سعيد رمسه عني .. وقال انه يبى يخطبني .. كان علي هو الوسيط امبينا .. بلغني الرمسه وراح لربه ..
فاطمه تمت ساكته وتحاول تجمع رمسة مريم ..
فاطمه: يعني ..
مريم: مادري .. علي قالي وراح .. يمكن السالفه راحت وياه ويمكن تنبش مره ثانيه ..
فاطمه اطالعتها: اذ سعيد رمس وقال صدقيني بيسوي اللي فباله... وبعدين شيخه من ايام قالتلي انه خلاص ما بياخذ بنت عمه ..
مريم ابتسمت ووخت ...
فاطمه: صدقتيني الحينه .. ياما قلتلج انه ظنونج كلها غلط .. سعيد كان باين عليه .. تصرافته ونظراته وكل شي .. انتي مشكلتج من تسمعين خبر خلاص ماترومين تواجهينه .. ترضخين لواقعه بسرعه .. قالولج يبونه لبنت عمه فجيتي مناحه مع انه قلنالج ان مايباها ..
مريم: والاسوء فطوم اني عقبه بكم يوم سمعت شيخوه تقول انه يحب وحده ؟
فاطمه: كيف ..
مريم: شيخه كانت ترمس حصه وتقوللها انه مايبا بنت عمه لانه يحب وحده .. ماتحملت عمري ذاك اليوم حسيت صدق اني خلاص منتهيه ..
فاطمه: متى كان؟
مريم: تذكرين يوم شموه اتي وتيمعتن فبيتكم ..
فاطمه: هيه يوم ماييتنا ..
مريم: هيه .. يالله شكثر قلبي تقطع ذاك اليوم وبالباجر ياني حياة علي وخبرني عن سعيد ... والله احس حياتي ذيج الايام كانت كئيبه صدق .. صدمه ورا صدمه ونهايتها وفاة علي ..
فاطمه: الله يرحمك يا اخويه ويغمد روحك الجنه ..
مريم: امين يا رب العالمين ..
فاطمه: حياتي والله .. تولهت عليه مريوم ماتتخيلين كيف ..
مريم: والله انا بعد .. احس حياتي ناقصنها وجوده.. مادري كيف بعيش باقي حياتي وها النقص كله بسبب غيابه..
فاطمه تتنهد: ودي بس اشوفه مره وحده على الاقل .. ودي اقوله اخويه حبيبي سامحني اذ غلطتك عليك .. اخويه احبك وبظل احبك ..
مريم دمعت عينها ولفت بويها عن فطوم عشان ماتشوفها وتكملها هيه بعد .. وبعد فترة من السكوت والتأمل ..
فاطمه: مريوم تبيني ارمس سعيد؟
مريم: عن اشوه ؟
فاطمه: عنكم
مريم: لا فطوم .. خلاص هو رمس وقال واذ بيرد فقراره كيفه لاتجبرينه على شي
فاطمه: بجس نبضه ..
مريم: لا فطوم خلي الخطوه اتي منه هو ..
فاطمه: بس بداها هو ..
مريم: بس ماكملها ..
فاطمه: اوكي كيفج ..
وبدت مريم تغير السالفه ودشن فمواضيع شتى .. و من عقب ماخلصن كل سوالفهن عن احمد وعن سعيد .. ماخلن شي ماقالنه .. ويوم ماحصلن رمسه تمن يعابلن فتيلفوناتهن ويطرشن مسجات لبعض..مريم تمت اطالع الصور اللي عندها .. وقفتها صوره وتمت تتأملها وتحس بقلبها بيطلع منها .. غرقرت عينها ..وفخاطرها .." الله يرحمك يا علي .. الايام ربعتبنا .. كبرنا ورحت انته عنا.. بشتاقلك يا علي .. والله كنت غالي غلاة الاخو يا علي .. الله يرحمك .." من ثلاث اشهر بس قبل وفاته كانت مصورتنه وهو يسولف وياها .. قالها صوريني واذكريني دوم .. ماتخيلت انهم بينحرمون منه .. كان فاكهة ها الفريج كله محد كثره طيب بالرغم من تخسيسه..الكل كان مجبور انه يحبه ..
ياها شور انها تحذف الصوره لكنها بدلت عنها بسرعه عشان ماتحذفها..
مريم: فطوم ملل
فاطمه: حسيتي
مريم: لا وبعد بسير الجامعه اليوم ..اف
فاطمه: زهبتي قشراتج
مريم: بعدني بدخن ثيابي اول ..
فاطمه: مابسيرين الجمعيه
مريم: لا قلت لابويه اييبلي اللي اباه ..
فاطمه: يحيج .. سيري عيل رتبي اغراضج الساعه 11 الحينه ..
مريم: مالي خاطر ..
فاطمه: مريوم احسبي انا مأخرتنج .. سيري انا بروح بيتنا
مريم: لا تمي بعده وقت .. ماشي باقلي غير الشطنه ..
فاطمه: بعد انا بسير فديتج .. امايه بتزعل محد فالبيت عندها غير فهود ..
مريم: ممم خلاص فديتج .. انشوفج الاسبوع الياي
فاطمه ومريم قامن سلمن على بعض وروحت فطوم ومريم ردت حجرتها تزهب عمرها للجامعه ..