نهاية حبك اعدامى< رووووعة بجد>

عبدالعزيز مستانس: انشالله يبه
بوفارس: على شو مستعجل .. بعدك صغير ..
عبدالعزيز: البنت حبوبه
بوفارس بخبث: اخاف حبوبه بس
عبدالعزيز انحرج: ................
دخل عليهم تركي وكان يمشي بالعكاز ..
تركي: السلام عليكم
الكل: عليكم السلام
بوفارس: ها يبه .. ماشالله اليوم بالعكاز ..
تركي: اي الحمدلله
عبدالعزيز: يعطيك العافيه
تركي: الله يعافيك
تموا الشباب يسولفون .. وبوفارس طلع عنهم .. واتصل لمريم بنته
بوفارس: مرحبا مرايم
مريم: هلا بابا .. شحالك؟
بوفارس: الحمدلله .. في حد حولج مرايم؟
مريم: عندي امي وايمان وفارس
بوفارس: روحي بعيد عنهم ..
مريم طالعتهم بخبث: تبيني اروح بعيد عنهم بابا .. تبي تقولي سالفه ماتبي حد يعرف شي .. وراحت بعيد عنهم ..
فارس وايمان يطالعون مريم بفضول
بوفارس: ياللوتيه .. قولي لي بروحج الحين
مريم: اي
بوفارس: زين .. سمعي كلامي عدل وخليه بيني وبينج ..
مريم: انشالله
بوفارس: عندج صديقه اسمها نوره بنت محمد .... صح
مريم باستغراب: اي عندي .. ليش؟
بوفارس: ابيج تاخذين رايها في الزواج .. هل هي متقبله فكره الزواج .. والزوج نفسه قبل الزواج
مريم: بابا مو فاهمه شي
بوفارس: انا افهمج .. اخوج عبدالعزيز قرر يكمل نص دينه .. واختارها .. وانا سألت عن اهلها وما عليهم زود الصراحه .. نتشرف بنسبهم ..
مريم بوناسه: وااااو احلى خبر ..
بوفارس: هيييييي صبري عن الينون .. اول سوي اللي قلت لج عليه و لاتقولين لحد شي .. قيسي النبض عندها عشان نتقدم رسمي .. زين يمه
مريم: انشالله بابا ..
بوفارس: عيونه انتي ... بس خلج سياسيه مو ادشين في الموضوع على طول .. تحملي
مريم: كيف سياسيه بعد؟!!؟
بوفارس: يعني ما تقولين لها اخوي يبيج .. لأ . سأليها عن حياتها وخططها للمستقبل .. حاولي تعرفين شو طموحاتها .. بعدين دخلي عليها من مدخل ثاني عن العرس والزواج والاستقرار .. ولما تحسين براحه وايجابيه من ناحيتها اخذي رايها في اخوج وبعدين فجري المفاجأه وقولي لها ان عبدالعزيز بيتقدم لها بس وانتي حابه تاخذين رايها قبل ما يصير كل شي رسمي .. واذا الامور تمام بلغيني عشان نتقدم رسمي اوكي ..
مريم: اوكي .. ولا يهمك .. انا قدها .. انا .... ويقاطعها بوفارس
بوفارس: هييييي يالمربوشه .. اثقلي .. ولا تنسين تردين علي
مريم تضحك: هههههههه من عيوني
بوقارس: يسلم لي عيونه انا .. يلا ابوي مع السلامه
مريم: الله وياك بابا ..

" ما وعدت انك تقاسمني المحبه .. وتبقى لي حب ولدروبي دليل "
الجوهره: هلا والله بهالصوت
ابراهيم: الله يحي هالصوت .. شخبار جوهرتي؟
الجوهره: مستانسه والله
ابراهيم: يا عسى هالوناسه دوم
الجوهره: وحليله خالي رحنا معاه المجمع وقعدنا في الكوفي شوب .. وتم يسولف لنا عن طفولته .. سوالفه تضحك .. بس مسكين عانا فيي حياته مؤخرا ..
ابراهيم: انشالله هالوناسه ماتفارق روحج وحياتج .. ويا ربي تخلي لهم خالهم
الجوهره: انشالله الله يسمع منك
ابراهيم: تدرين يا عيوني ..
الجوهره: شنو حياتي ؟
ابراهيم: من رجع خالج ونفسيتج وايد متطمنه و مرتاحه .. احسج غير .. رجعتي جوهرتي اللي اول ما عرفتها .. تذكرين حيويتج ونشاطج وضحكتج على حياة الوالد والوالده .. كنتي كتكوته وقتها بس عسل وربي عسل .. ولما صار اللي صار تحملتي مسؤلية اخوانج وكافحتي عشان راحتهم .. بس الله جزاج ورجع لكم خالج وانشالله بيعوضكم .. لان الحين نفسيتج تدل على ان خالج شل حمل كبير كان على ظهرج .. الله يعطيج العافيه حياتي ..
الجوهره تصيح: الحمدلله ان خالي رجع لنا
ابراهيم بضيفه: حياتي ليش هالدموع .. كفايه دموع ابي البسمه ترجع لشافتج .. ابي اسمع الضحكه .. ابي اشوف الدلع اللي تعودت عليه .. مسحي هالدموع ..
الجوهره: آآآه يا ابراهيم هاي دموع الفرح .. انت ذكرتني بحياتي اللي اهملتها .. لان هدفي كان اخواني وبس .. فديتك يا ابراهيم بدونك ايش كنت بسوي ..
ابراهيم: انتي الخير والبركه .. الله يحفظج حق شبابج .. الا اخوج يوسف شو اخباره؟ من فتره ما شفته ؟ مشغول ؟؟
الجوهره: يعابل صديقه مرقد في المستشفى .. مسوي حادث
ابراهيم: جزاه الله خير ..
الجوهره: وياك يا عيوني
ابراهيم: الا بقولج جوهرتي ..
الجوهره: قول فديتك
ابراهيم بتردد: انا كلمت امي واختي عنج
الجوهره منحرجه: ..........................
ابراهيم بخوف: وين رحتي ؟؟؟ معاي جوهرتي
الجوهره بهمس: ايوه
ابراهيم تنفس براحه: زين ما رديتي على كلامي .. امي واختي قريب بيزورونكم
الجوهره: حياهم الله ..
ابرهيم بصوت عالي: فديتج والله يا جوهرتي ..
الجوهره: زين شفيك ؟ شوي شوي ..
ابراهيم بوناسه: ما تتصورين شلون انا مستانس .. الله يخليج لي يا جوهرتي .. انتظر هاليوم من 8 سنين .. و رجعت خالج فاتحة خير علينا
الجوهره بتموت من الحيا: زين .. انا لازم اروح الحين ..
ابراهيم: فديت اللي يضيعون السالفه .. خلال كم يوم بيتصلون لكم الاهل انشالله
الجوهره: خير انشالله ..
ابراهيم: زين حياتي روحي الحين ما قدر احرجج اكثر من جي .. ههههههههههه
الجوهره بدلع: يالشرير .. بااااااااي
ابراهيم: الله وياج حياتي ..
سكرت من ابراهيم وتمت تصيح من الفرحه ..
الجوهره: واخيرا الله بيجمعني بك بالحلال يا ابراهيم .. الحمدلله رب العالمين .. يا رب تيسر امورنا يا رب ..
خالد راح عند ابوه عشان يكلمه عن تصرفات اخوه علي .. لانه لازم يوقفه عند حده .. راح خالد مكتب ابوه طق الباب ودش ..
خالد: ها يبه مشغول ؟
بومحمد فصخ نظارته: هلا يبه خالد .. تعال
خالد: شحالك يبه ؟
بومحمد: الحمدلله .. انت شو علومك ؟ وشلون على تجارتك انت و ولد عمك فارس؟
خالد: الامور ماشيه تمام والحمدلله .. وفارس ولد عمي ماشالله عليه شغول .. ومو مقصر في شي
بومحمد: يبه لو احتجتوا اي شي احنا حاضرين .. لا تستحي تطلب مني او من عمك
خالد: ماتقصرون والله .. بس يبه بغيتك في سالفه ..
بومحمد: عسى ما شر يبه ..
خالد: السالفه تخص علي اخوي؟
بومحمد مستغرب: علي اخوك .. شو فيه ؟؟
خالد: علي وايد تغير يبه .. تصرفاته غريبه من اول ما جى ..
بومحمد مو فاهم شي: شلون تصرفاته غريبه ؟
خالد: ما كلمتك الريم اختي امس ؟؟
بومحمد: لا ما كلمتني .. ليش؟؟
خالد: مع اني موصيها

بومحمد: على شو موصيها ؟؟ امس لما رجعت البيت ما شفتها .. كانت نايمه
خالد: اهاااا
بومحمد: شو اللي صاير من وراي ؟؟ علمني ..
خالد بتردد: يبه .. علي اخوي .. مممممممم علي
بومحمد بصوت عالي: شو فيه علي ..
خالد ارتبك: علي مد يده على الريم ونتفها من الضرب ...
بومحمد قام من الكرسي وضرب الطاوله بيده من اللي سمعه: شوووو .. مد ايده على اخته ؟!! على اي اساس ؟؟
خالد: استهدي بالله يبه .. خل افهمك الموضوع
بومحمد: مابي افهم شي .. روح ناده لي الحين والريم معاه .. بسرعه يا خالد
خالد بخوف وخضوع: انشالله يبه .. طلع من المكتب وراح غرفة علي ومالقاه
خالد: مصيبه علوه محد .. ابوي بيقلب البيت علينا .. راح غرفة الريم وشاف محمد في ويهه وسأله عن علي
خالد: محمد .. وين اخوك المؤدب علي ؟
محمد: مادري به ؟؟ من العصر الاخ طالع .. ليش ؟
خالد: ابوي يبيه ..
محمد: ليكون قلت له شي .. خلود امي حلفت علينا
خالد: لا ما قلت له .. انت ما تدري شو صار امس؟!!؟
محمد مستغرب: شو صار ؟؟
خالد: اخوك الكريم .. ضارب الريم .. وزين ما كسر ويهها بس
محمد بعصبيه: شو ... الريم .. الريم .. ويطق بابا غرفتها بقوه .. الريم طلعي ..
الريم طلعت متخرعه: نعم شو صاير ؟؟
محمد من شاف ويهها و الدنيا صارت سوده جدامه: شو سوى هالمتوحش ؟؟!!!
الريم: الله يسامحه اخوي ..
خالد: تعالي تحت المكتب ..
الريم: المكتب !!!!
خالد: اي ابوي يبيج
الريم بخوف: هاا ابوي .. زين زين بنزل
محمد نزل تحت بسرعه
خالد: محمد على وين ؟
محمد وهو ماشي: اجيب المتخلف اخوك من وين ما يكون ..
خالد: الله يستر بس .. نزل زالريم لحقته .. اول ما دخل المكتب شاف ابوه رايح راد ويطل من الدريشه وعلى اعصابه ..
خالد: يبه هاذي الريم عندك ..
بومحمد من شاف ويهها وسحبها لصدره وبحنان واساها ..
بومحمد: سمالله عليج .. ليش سوى جي .. ليش ؟؟
الريم صاحت بصوت عالي: بدون سبب مقنع .. قلت له اني مستأذنه منك يوم بطلع وضربني ..
ما كفاه ودش علي الغرفه وفشلني مع بنت عمي مريم لما كنت اكلمها على التلفون .. يشك فيني يا يبه وهني صاحت بحرقه وقهر ... يشك فيني .. انت عمرك ما مديت ايدك علينا ولا لحظه شكيت في تربيتك لنا .. اما هو اهانني .. يبه يبه .. وتمت تصيح بحزن على صدر ابوها ..
بومحمد مسح دموع الريم وتم يشوف الجروح اللي بويهها: انا اوريج فيه ..
بومحمد يصارخ: محمد .. يا محمد ..
خالد: يبه محمد برا في الحوش .. يحاول يتصل بعلي ..
بومحمد: وليش وينه حضرت جنابه ؟؟
خالد: مادري يبه ..
بومحمد: ناد لي محمد الحين ..
خالد تخرع من ابوه: انشالله .. وطلع من المكتب راح عند اخوه
خالد: حمود .. حمود
محمد: ها شو فيك ؟؟
خالد: ابوي يبيك
محمد: قوله جاي .. بس اتصل على المتخلف اخوك عشان يجي البيت
خالد: الوالد مشوط .. خل عنك المتخلف .. وتعال معاي
محمد لحق اخوه: وراك ..
خالد: ما رد عليك ؟
محمد: لا مايرد .. مادري شو سالفته ؟؟
دخلوا الاخوان المكتب ..
بومحمد: وينه طال عمره .. سموه علي ...
محمد: اتصلت عليه ومايرد .. الحين بتصل مره ثانيه
بومحمد: يلا بسرعه .. اتصل محمد جدام ابوه .. وما رد عليه علي ..
محمد: ما يرد يبه .. يمكن ناسي جواله في السياره
بومحمد: خالد ..
خالد: نعم يبه ..
بومحمد: روح طلعه لي من تحت الارض .. ما ترجع البيت الا وهو معاك .. سمعتني
خالد متوهق: انشالله يبه .. طلع من البيت يدور اخوه ..
الريم بخوف: يبه
بومحمد: ها يبه .. قولي ..
الريم: ابي اروح غرفتي ارتاح ..
بومحمد: ما تروحين .. ارتاحي على الكرسي
الريم بخوف: انشالله يبه
محمد: يبه اجيب لك شي ؟
بومحمد: قولهم يجيبون لي قهوه
محمد وهو طالع: انشالله
شافته ام محمد وهو طالع من المكتب .. وقدها سمعت الحشره بس خافت تدخل ..
ام محمد: محمد يبه
محمد: هلا يمه
ام محمد: شفيه ابوك ؟
محمد: معصب على علوه
ام محمد بخوف: ليش؟.. ليكون قلتوا له شي؟؟
محمد بعصبيه: لا .. ويه بنتج قاله كل شي
ام محمد: شو فيها بنتي؟
محمد: اللي ما يحشم حد مد ايده عليها .. وقالها اللي صار
ام محمد وتصفق ويها: ليش جي تسوي باختك .. حرام عليك .. الله يعينك على ابوك .. شو اللي غيرك يا ضناي
محمد: ولدج ذي مب صاحي
ام محمد: الله يهديه
محمد: يمه .. ابوي يبي قهوه
ام محمد: تعال اسويها وخذها معاك ..
اما الريم كانت ميته من الخوف من المواجهه اللي بتصير .. دخلت عليهم اسماء ..
اسماء تكض ناحية ابوها: بابا
بومحمد حضنها وابتسم: هلا اسامي
اسماء وتبوس ابوها وتحضنه: مووووح .. بابا نروح المكتبه نشتري دفتر وألوان
بومحمد: مو الحين بابا .. صبري بنروح فالليل
اسماء بدلع: بس بتسكر المكتبه .. بابا عاااااد .. الحين
بومحمد: لا ماتسكر .. عااااد
اسماء وحطت ايدها على ويهه ابوها: يلا عاااد .. الحين .. الحين .. يلا
بومحمد يبوس ايدها: موووح .. مو الحين .. تبين اقول لفاضل يوديج مع فهد
اسماء تفكر: مممممممم زين .. عشان انت بتوديني متأخر .. بروح مع فاضل
بومحمد نزلها: روحي نادي فاضل وفهد .. يلا يبه

اسماء: انشالله
بومحمد: عفيه بنتي
الريم كانت تتفكر في تعامل ابوها مع اختها .. قلبه طيب بس ما يرضى بالغلط .. الله يخليك لنا يا يبه..
الريم: يبه .. بروح اشرب ماي
بومحمد طالعها: الريم تعالي يبه
قربت الريم من ابوها: نعم يبه
بومحمد: يبه انا داري انج ما تبين تشوفين اخوج وانا اهاوشه .. صح ؟
الريم منزله راسها: صح يبه .. ولو هو بعد اكبر مني .. يكسر خاطري حتى لو غلط علي
بومحمد حط ايده على كتفها: ولا يهمج يالحنونه .. مثل امج .. بس بناديج بعد ما تفتهم وياه
الريم ابتسمت لابوها: انشالله ..
في بيت بوفارس مريم وفاطمه وايمان قاعدين مع بعض في غرفة ايمان ..
فاطمه اطالع نفسها في المرايه: شو رايكم نقول لفارس يودينا البحر..
ايمان وتلعب بشعرها: شلون نروح بدون جويسم ..
فاطمه: لا مانروح كلنا .. بس احنا الثلاثه .. نتمشى شوي ..
مريم: ونقعد مع فارس نشوف شو فيه ..
ايمان: اي صح .. لان حالته مو عاجبتني هاليوين اللي فاتوا
فاطمه باستغراب: ليش شو فيه اخوي ..؟ مريم وايمان قالوا لها سالفة المكالمه اللي قلبت كيان اخوهم
فاطمه: احلفو انتوا الثنتين .. وليش انا اخر من اعرف بالسالفه ..؟؟؟؟
ايمان: احم .. انا ما نسيت الموضوع بس ما حبيت اتكلم فيه ... توقعت ان مريم بتقول لج ..
فاطمه طالعت مريم: ها الشيخه مريم .. عذرج .. ؟
مريم: عذري .. هههههههههه ما عطت الموضوع ذيك الاهميه ..
فاطمه: شلون ما عطتوا الموضوع اهميه .. مو اخوكم ... ولا شلون ..
مريم: بدت الاخت فاطمه بالمواعض ..
ايمان: ههههههههه
فاطمه طبت عليهم: يالدببه ..
ايمان: هيييييييييييي فطوم قومي عني ..
فاطمه: ما جني الكبيره بينكم
مريم: ههههههه .. زين الحين عرفتي الموضوع قومي عني ..
ايمان: وعني ..
فاطمه قامت عنهم: لا تعيدونها زين ..
ايمان: زين مريم روحي قولي لفارس عشان نجهز
مريم: اخاف يقولي لأ .. فطوم روحي قولي لفارس .. انتي ما يرد لج طلب
فاطمه: ممممممممممم بفكر ..
مريم + ايمان: عااااد
فاطمه: it’s pay back time باذلكم شوي .. كيفي ..
ايمان: يلا عاد فطيم .. انتي الكبيره ولازم تعطفين علينا ...
فاطمه: صج عاد .. الحين انا صرت الكبيره .. ممممم بعد ترجوني
مريم: يلا فطوم .. نبي نصلي العصر ونطلع .. وما نتأخر لازم المغرب نروح لجاسم ..
ايمان: عفيه فطيم ..
فاطمه: مممممم الموضوع جاري التفكير ..
ايمان: ولا مذلتج ... انا بروح اقوله
فاطمه: لو وافق لج اللي تبينه ..
ايمان يثقه: بتشوفين .. وراحت ايمان غرفة فارس .. طقت الباب دخلت لقته منسدح على السرير ومغمض عيونه ..
ايمان" باين عليه في عالم ثاني ": احم .. احم .. السلام عليكم اخوي الموقر فارس ..
فارس فتح عيونه بتكاسل: عليكم السلام جلالة الملكه ايمان بنت محمد ..
ايمان: اقول طال عمرك .. عساك مو تعبان ؟؟
فارس: لا موتعبان حضرت جنابج .. هاتي من الاخر
ايمان: يعطيك العافيه طويل العمر .. اي .. اي .. قربت من السرير وقعدت جنب فارس ..
فارس: اي .. اي .. شو وراها
ايمان مو عارفه من وين تبدا: بعد اخبارك طال عمرك .. شلون امورك هالايام ؟
فارس امشي مع ايمان: اخباري طيبه .. وكل اخبار الخير عندي طال عمرج ..
ايمان: الله يسلمك .. ويعطيك العافيه .. عساك على القوه ..
فارس تكى على ايده وهو منسدح مجابلها: الله يعافيج ويحفظج يا هلا ويا مرحبا ..
ايمان"حشى ما يزهق هاذي": احم .. احم ..
فارس: حلو حلو
ايمان: على قلبك بو الشباب
فارس: يسلمج ربي طال عمرج .. فالخدمه احنا ..
ايمان"حشى باله طويل .. زهقني ماعرف شلون بقوله": واخبارك بومحمد ؟
فارس: الحمدلله .. تمام التمام ..
ايمان: بتطلع مكان اليوم طويل العمر ..
فارس: ماعتقد والله .. تعبان حتى مالي خاطر اروح المستشفى ..
ايمان: الله يعينك طال عمرك
فارس: اي طال عمري وطال عمرج
ايمان: مالك خاطر تروح تتمشى على البحر؟
فارس"صدقيني بازهقج يا ايمان صبري": لا مالي خاطر كلش ...
ايمان: احم احم .. كلش يعني حتى مالك خاطر تشم نسمة البحر
فارس: هوا بيتنا شحلاته
ايمان: اح .. اح ..
فارس: وغصه .. اقصد سمالله عليج
ايمان: احم .. الله يسلمك اخوي
فارس: يلا برا اختي ..
ايمان: خير اخوي .. تكلمني
فارس: اي اكلمج .. ادلين طريقج ولا ادليج
ايمان وتلتفت حواليها: من تكلم اخوي ..
فارس: اكلمج اختي .. يلا شلي عمرج وبرا ..
ايمان: اننشالله طال عمرك .. بس ممكن طلب قبل ما طلع
فارس: لا مو ممكن

ايمان وبسرعه تتكلم: فارس .. ارجوك ممكن تودينا البحر .. ارجوك قول اي .. وركضت عند باب الغرفه تنتظر الرد
فارس يطالعها بخبث: مممممممم زين مو موديكم براااا ... ههااااااي ومات من الضحك
طلعت ايمان خايب ظنها" الدب .. ساعه اتحايل عليه .. واخرتها يفشلني وبكل برود يقولي لأ .. آآآه وين اودي ويهي من فطوم ومريوم .. راحت غرفتها وشافتهم ينتظرون النتيجه .. اول ما دخلت الغرفه .. الا فاطمه ومريم وبصوت عالي ضحكوا عليها: هههههههههههههههههههههههه
ايمان: ضحكوا شعليكم
فاطمه: اروح انا اكلمه ...
ايمان ومريم: اي عاااااااد
مريم بترجي: يلا تأخر الوقت
فاطمه تمشي ببرود: مممممممم .. كنت بروح بس خلاص غيرت رايي
ايمان: مذله .. فطوم عاد روحي قولي له
فاطمه: اسمي فاطمه .. ولا تدرين ناديني الاميره فاطمه
ايمان: الاميره فاطمه .. ممكن تكلمين اخونا الموقر فارس
فاطمه: بغير اسمي من الاميره فاطمه الى .....
تقاطعها مريم: المذله فاطمه ههههههههههههه
وكلهم ضحكوا .. راحت فاطمه تقول لفارس يوديهم ..
طق .. طق ..
فارس: اختي ايمان .. لادشين
فاطمه: وووووووع انا مو ايمان
فارس ضحك: هههههه تعالي فديت قلبج فطوم
فاطمه دخلت الغرفه وابتسمت لأخوها: هلا فارس
فارس: اهلين ... شو اخبارج؟
تمام .. يا ضايق الصدر
فارس: منو يقول اني متضايق
فاطمه: انا مانتظر حد يقولي .. قلبي يحس فيك
فارس: فديت قلبج .. بس هالمره احساسه غلط حبيبتي
فاطمه: مستحيل
فارس يضيع السالفه لانه خاف يضعف جدام اخته ويقولها السالفه: مطرشينج الربع ...
فاطمه: ههههههههه اي
فارس: لأ
فاطمه: يلا فارس .. قوم تنشط شوي .. قوم
فارس: وين تبون تروحون؟
فاطمه: نشم هوا على السيف .. مو مطولين ..
فارس: خليها مره ثانيه ..
فاطمه: عشان خاطري فديتك .. قوم
فارس: وانا اقدر على دلعج يا فطوم .. اجهزوا .. عندكم 10 دقايق لو تأخرتوا بغير رايي ..
فاطمه لا شعوريا باسته وطلعت: هييييييييييي
فارس: هبله فطيم ..
راحت الغرفه و واونها حزينه ..
ايمان: ها بشري ..
مريم باستغراب: معقوله فارس يقول لفطوم لأ ؟؟!!!
فاطمه بحزن: ترجيته .. وما رضى
ايمان: لا .. اكيد اخوي صار بعقله شي .. مكالمة ذاك اليوم سوت فيه هاي كله!!!
فاطمه: ايه عليك ياخوي
مريم: اوهووووووووووو
فاطمه: يقول لكم فارس لو ماجهزتوا خلال 10 دقايق بيغير رايه .. وراحت غرفتها تركض عنهم ..
ايمان: دبه يا فطوم .. دبه
مريم: هههههههههههههههههههه
جهزوا البنات وفارس كان ينتظرهم فالصاله .. اول وحده نزلت ايمان ..
ايمان: مرحبا اخوي فارس ..
فارس: هلا والله اختي ايمان
ايمان: ابغي اعرف سر تأثير فطوم عليك
فارس: هههههههههههههه نقطة ضعفي الدلع .. وفطوم دلوعه .. ودلعها موووت
ايمان: وووووي هاي كله فطوم .. عيل ما شفت دلعي كيف .. مو الدلع يغار مني .. احم احم
فارس: الله يشفيج اخت ايمان .. ما يركب عليج الدلع .. وووع
ايمان: صج عاد .. اصلا انت ما تدري ان فطوم ماخذه الدلع من انا .. هع
فارس: لو فطوم ماخذه الدلع منج ... صدقيني اتبرى من فطوم ..
ودخلوا عليهم مريم وفاطمه
فاطمه: شو فيها فاطمه .. سمعت اسمي
ايمان: حشى الذيب على طاريه .. يالذيبه ..
مريم: الحين اختي ذيبه يالمتوحشه
ايمان: هههههههه ليش متوحشه .. شايفتني علي ولد عمي
مريم + فاطمه: ههههههههههههههههههههههه
فارس باستغراب: شو سالفة علي ولد عمي ... وليش تقولين عنه متوحش ؟؟!!
مريم: الله يسلمك .. امس علي منتف الريم بنت عمي من الضرب
فارس: افااااا علي يسوي جي .. يمد يده على حرمه ..
فاطمه: لو تشوف ويها شلون معلم من الضرب .. تعور القلب مسكينه
فارس مستغرب: علي !! متأكدين علي!!!
ايمان: اي علوه هالجحش
فارس: عمي يدري ؟؟
ايمان: مادري ..؟
فارس: الله يعين علوه لو درى عمي ..
فاطمه وايمان: ليش؟؟
فارس: عمي ما يرضى بالغلط .. وتعرفونه يموت في بناته .. ما عنده الا هالاثنتين ..
مريم: ايه عليها الريم .. كانت تعور القلب
فارس: الا الله يعين علوه .. اقل شي ممكن يسويه عمي انه يطرده من البيت ..
ايمان باستغراب: شو يطرده .. بل
فارس: عمي لما يعصب ما يشوف جدامه
مريم: زين يلا نكمل في السياره
فارس: يلا ..

هنادي: خالي شرايك اعزمك على كوفي لاتيه ..
سلمان مبتسم: ما عندي مانع ..
الجوهره: هييي انتي ... بسج طلبات من خالي
سلمان: خليها تدلع .. توها ورده
الجوهره: يه خالي .. وايد معطها ويه .. زياده عن اللزوم
سلمان: وهالورده تستاهل
الجوهره: والله .. وانا شنو ؟
هنادي: انتي جذور هالورده .. انتي الاساس
الجوهره قامت وحضت اختها: فديت عمرج يا هنود
هنادي: خلاص قومي باصيح ..
سلمان يطالع بنات اخته"الله يخليكم لبعض"
هنادي: ها خالي .. اجهز
الجوهره: وليش انتي اللي تجهزين بس؟؟
هنادي: باسوي Undo ... ها خالي نجهز
سلمان والجوهره: ههههههههههههه عبيطه
طلعوا من البيت وراحوا الكوفي شوب اللي تعودوا يروحون له مع خالهم
الجوهره: ناقصنا يوسف فديته
سلمان: قلت له خذ اجازه يوم واحد .. ما طاع كلامي .. قالي عنده شغل وايد .. ويبغي يخلصه عشان بيطلع اجازه طويله .. يقول يمكن يسافر مع ربعه
الجوهره: باستغراب: يوسف بيسافر .. ومع ربعه !!
سلمان: انا اقترحت عليه .. وبالعافيه وافق
هنادي: مسكين يوسف والله .. ما شاف الدنيا .. دفن نفسه معانا ..
سلمان: يقول للحين ما قرروا وين بيروحون ..
الجوهره: انشالله يستانس فديته
هنادي: انتي كل شوي تتفدينه .. ليكون ريلج هو ..
الجوهره: يالملسونه انتي ..
سلمان: زين ريه وسكينه ... شتبون تطلبون .. الريال ينتظر ..
الجوهره: ههههههههههههه
هنادي بلقافه: انا ابي المعتاد .. تعرفون طلبي ..
سلمان ضحك على لقافتها: ههههههههههه هنود يالملقوفه ..
هنادي انحرجت: هااااا
الجوهره: بصراحه يا خالي .. سكتها .. ههاااااي
هنادي: خالي فشلتني .. ماحبك ..
سلمان: يه .. انا ما فشلتج .. بس مدحتج
الجوهره: هههههههه وينك يا يوسف تشوف ويه هنادي .... هههههههه
هنادي و ويها احمر: خالي شوف جوجو ..
سلمان: جوجو .. ما قلت شي يضحك .. مدحت هنوده شوي ..
الجوهره ماتت من الضحك .. وهنادي شوي وتصيح ..
من بعيد كان في شخص يراقب هنادي .. من اول ما دخلت الكوفي شوب .. انعجب بحركاتها وايد .. وتذكر انه انه شافها من قبل .. بس ما حطها في باله .. لكن هالمره ارتسمت ملامحها في عقله وقلبه هالشخص يطلع نواف .. طبعا ما تكلمت عنه من قبل ..
نواف عمره 30 سنه مو متزوج .. ابوه توفى لما كان عمره 25 عنده اخت وحده اسمها منيره متزوجه .. بس هو عايش مع امه ..
كان قاعده بروحه على الطاوله اللي بالزاويه ويقرى الجريده .. لفتت نظره هنادي بدلعها وعفويتها .. كانت هنادي مندمجه مع خالها واختها بالسوالف لما طاحت عينها بعين نواف اللي كان سرحان فيها هنادي سرحت بنظراته وبعدين استحت نزلت راسها .. انتبهت لها الجوهره .. حاولت تتبع نظرات اختها بس هنادي نزلت راسها قبل ما توصل الجوهره للشخص اللي ناظرته هنادي ..
هنادي"هاذي ليش يطالعني جي"
الجوهره"في من كانت هنادي سرحانه .. عيونها كانت ضايعه"
سلمان"شفيهم بنات اختي .. صخوا مره وحده"
نواف"الله الله على الجمال الرباني .. شهالعيون اللي تذبح"
سكتوا هم الاربعه .. وكلن في قلبه كلام للثاني .. بس مو عارفين كيف يوصلونه لبعض .. في لحظه تجمدت كل المشاعر والافواه .. في لحظه كلهم حسوا بالحنان والحب .. ويا اسعدها من لحظه عاشوها هم الاربعه .. بعيون حايره وقلوب حنونه .. قطع لحظةالصمت وصول الطلب ..
سلمان: Thank you
الجرسون: You welcome sir, any thing else sir
سلمان: No, thank you again
هنادي: خالي .. ابي سكر زياده
سلمان: روحي على الطاوله اللي في الزاويه وخذي اللي تبينه .. واشر على الطاوله
هنادي تابعت اتجاه ايد خالها وشافت ان الطاوله جنب طاولة صاحب الجريده مثل ما سمته في قلبها
هتادي: هااا خالي ... مممممم
الجوهره: شفيج ... روحي
سلمان: هنوده .. شفيج يبه ؟

هنادي"وصاحب الجريده": بس في واحد قاعد هناك ..
الجوهره: شفيه ؟؟ بياكلج ؟
سلمان: روحي يبه .. الولد مشغول بجريدته ..
هنادي بخضوع وتوتر: اوكي .. مشت بخطوات متقاربه وبطيئه .. مرت من جنبه .. وصاحب الجريده مثل ما سمته ما رفع عينه عليها احتراما لنظرات خالها اللي كانت تتبعها عشان تحسسها بالامان .. مدت ايدها وخذت 3 اكياس من السكر ومن الارتباك طاح كيس السكر على الارض .. و زاد ارتباك هنادي اكثر لان صاحب الجريده طوقها بنظراته وهي نازله ترفع السكر من الارض .. في هاللحظه تمنت لو الارض انشقت وبلعتها .. مشت صوب طاولتهم عند خالها واختها .. وقعدت على الكرسي بهدوء وكانت منزله راسها ومتوتره ..
سلمان: هنوده ..شفيج؟
هنادي وكانت تتعلثم في الكلام: ما .. ما ... مافيني .. شـــ شي
سلمان: بهدوء: اللي قاعد على الطاوله اللي هناك .. ضايقج بشي .. وانتي رايحه ؟؟
هنادي: لــ لــ لالالا ..
الجوهره: شفيج هنود؟!؟!؟
هنادي بعصبيه وتوتر: ما فيني شي .. اففففففففففف
الجوهره فضلت السكوت .. وتمت اطالع خالها .. و خالها يبادلها نفس النظره ..
هنادي مدت ايدها على الكوفي وذوبت فيه السكر .. وشربت الكوفي وكلت الكيك في صمت وهدوء
اما سلمان وبنت اخته الجوهره .. كانوا يطالعون بعض طول الوقت وعيونهم تتكلم .. طلعوا من الكوفي شوب في صمت وراحوا للبيت .. اول ما وصلوا هنادي راحت غرفتها وارتمت على السرير .. والجوهره راحت تاخذ لها شور .. سلمان تم في الصاله ينتظر الجوهره عشان يكلمها في موضوع هنادي .. في لحظة انتظار سلمان في الصاله .. رن تللفون البيت .. ورفع السماعه
سلمان: الو .. السلام عليكم ..
ام ابراهيم: عليكم السلام يبه ..
سلمان: آمري يبمه .. من بغيتي ؟؟
ام ابراهيم: ما يامر عليك عدو .. بغيت الجوهره ..
سلمان: السموحه الوالده .. بس هي مشغوله الحين ..
ام ابراهيم: عيل بلغها ان احنا يوم الاربعاء بنمر عليكم البيت بعد صلاة المغرب اذا انشالله ..
سلمان مستغرب ومستانس: حياكم الله الوالده .. البيت بيتكم
ام ابراهيم: الله يحيك يبه .. لا تنسى بلغهم .. قولها ام ابراهيم ..
سلمان: انشالله .. والنعم يا ام ابراهيم
سكر الخط وتم يفكر في المكالمه"من ام ابراهيم ؟؟ تعرفها الجوهره من وين ؟؟ معاها بالمدرسه ؟؟ بس مستحيل تعرفها لانها مره كبيره بالسن .. بتنزل جوجو وبسألها"
نرجع لهنادي الهيمانه .. من رجعت من الكوفي شوب والبنت طايحه على سريرها .. حتى ما فضخت عبايتها .. تمت مستلقيه على السرير مغمضه عيونها .. وتشوف في ظلمة عيونها صاحب الجريده .. ونظرته لها وهي قريب من طاولته .. ودارت في بالها اسأله ..
هنادي" من انت ؟؟ في عيونك حنان وطيبه .. من انت يا صاحب الجريده ؟؟" غفت عينها من غير ما تحصل اجوبه على اسألتها .. دخلت عليها الجوهره وشافت حالتها .. قربت منها تتحس جبهتها .. خافت لتكون اختها تعبانه ..
الجوهره: هنوده .. حبيبتي قومي فصخي عبايتج .. بس هنادي ما ردت عليها .. الجوهره .. حست ان اختها في غفوه .. شلت عنها عبايتها وشيلتها وغطتها ونزلت عند خالها .. ولا تدري شو ثمن نزولها بيكون ؟؟ دخلت الصاله وشافت خالها يتابع المباره ..
الجوهره: هلا خالي ..
سلمان: اهلين ..
الجوهره: مب طالع مكان خالي ..
سلمان: مادري .. يمكن فالليل امر على عبدالهادي .. اللي كان معاي بأمريكا ..
الجوهره: اهااا .. الساعه كم بتروح ؟؟ ما بقى شي على الليل .. الحين الساعه 8 ونص
سلمان: باروح له على الساعه 10
الجوهره: 10 !! وايد متأخر ..
سلمان ينكت: احلى المواعيد بعد الساعه 10 .. هههههههههه
الجوهره: هههههههههههه والله انك سوالف يا خالي ..
سلمان: مممم جوجو .. ممكن شاي بالنعناع من ايدج الحلوه .. وممكن تزيدين النعناع يا عروسه ..
الجوهره ابتسمت بس استغربت من كلمة عروسه: من عيوني .. وهي رايحه المطبخ تمت تفكر في آخر كلمه قالها خالها" شقصده بالعروسه .. اول مره يقولها لي .. كل يوم اسوي له شاي .. جات على اليوم يعني ليش ؟؟!!" خذت الشاي وراحت لخالها .. قدمت له الشاي وقعدت .. وسلمان كان يفكر كيف يبدى الموضوع معاها .. استجمع قواه ونطق ..
سلمان: جوجو حبيبتي ..
الجوهره اتقلب قنوات التلفزيون: هلا خالي ..
سلمان: من ساعه تقريبا اتصلت وحده اسمها ام ابراهيم .. وحددت موعد بتمرنا فيه .. بيكون يوم الاربعاء ... تعرفينها شخصيا ؟ لانها طلبت تكلمج بس كنتي فوق ..
الجوهره تجمدت رقبتها وماقدرت تلتفت على خالها .. من الاحراج ..
سلمان انتظرها ترد او تلتفت عليه .. "شفيهم بنات اختي اليوم" ..." ...
الجوهره التفتت على خالها: معاك خالي ..
سلمان: مارديتي علي .. تعرفين ام ابراهيم ؟؟
الجوهره: لا خالي ما عرفها ..
سلمان مبتسم: يعني نقول مبروك ..
الجوهره انحرجت وطلعت من الصاله .. راحت غرفتها وطبت على السرير .. حضنت المخده وتمت تضحك على نفسها ... اما سلمان اتصل على يوسف يبلغه بهالخبر الحلو ..
سلمان: هلا يوسف ..
يوسف: هلا والله خالي ..
سلمان: وينك؟
يوسف: رايح عند تركي ..
سلمان بخبث: رايح عند تركي ولا الحب .. وضحك سلمان بخبث ... هههههههه
يوسف منحرج: احم .. خالي .. رايح عند تركي
سلمان: زين ماعلينا .. يوم الاربعاء في ناس بيجون يخطبون ... جهز نفسك .. استأذن من الدوام .. ولا دبر عمرك شوف لك اي صرفه لازم تكون موجود
يوسف فرحان: والله .. ومن هالناس ؟
سلمان: مادري والله .. اتصلت وحده اسمها ام ابراهيم .. وحددت موعد يوم الاربعاء
يوسف: خلاص ولا يهمك .. افضي نفسي .. دونت وووري
سلمان: بارك الله فيك .. اقولك .. متى بترجع البيت ؟
يوسف: يعني ساعه .. او ساعه ونص بالكثير
سلمان: لا تتأخر لاني بامر على عبدالهادي على الساعه 10
يوسف: انشالله خالي ..
سلمان: مع السلامه

" لا تغرك الدنيا .. تصبح عديم احساس .. لا تحس يوم انك اصبحت فوق الناس .. حاسب من افعالك ومن دعوة المظلوم .. "

خالد: السلام عليكم جابر .. شو اخبارك؟
جابر مو قادر يسمع خالد من الازعاج اللي عنده: شتقول ؟؟؟؟
خالد رفع صوته: شو اخبارك ؟
جابر: هلا هلا خالد .. شحالك انت ؟
خالد: شو هالحشره اللي عندك ..
جابر: ولاشي بس مغنى ورقص .. ليفوتك
خالد استغرب" مغنى ورقص": انت وين ؟
جابر: في شقة واحد من الشباب ..
خالد بتردد: جبور .. علي معاكم
جابر: علوه موجود .. اناديه لك ؟؟
خالد انصدم: لا لا لا .. وين شقتكم .. انا بامر عليكم .. بس لا تقول لعلوه
جابر: حياك .. وصف جابر الشقه لخالد .. من دون علم علي .. لان جابر كان سكران ولا حاس باللي يسويه .. وعلي لاهي في خرابيطه .. وصل خالد للشقه .. وهو راكب الدري يسمع صوت الاغاني والحشره .. وكان يمشي بتوتر وخوف من اللي بيشوفه .. طق الباب .. بس محد فتح له من الازعاج .. اتصل مره ثانيه على جابر ..
خالد: انا عند الباب .
جابر: جايك ...
اول مانفتح الباب .. خالد حس بضيقه .. حس ريوله ماتشيله .. شاف العجب .. شراب وبنات ورقص وخلاعه وقلة ادب .. واللي صدمه اكثر .. منظر جابر وهو فاتح الباب بيد والكاس باليد الثانيه .. دخل يدور على اخوه من بين السكارى والشبه عاريات .. وياليته ما شاف اخوه .. كان قاعد على كرسي في اخر الشقه كاسه في يده وبنت في حضنه .. تمنى في هاللحظه لو تنشق الاض وتبلعه ولا يشوف اخوه بهالمنظر المقزز.. اما علي كان مشغول مع كاسه والبنت اللي بحضنه .. رفع عينه على شخص وافق يناظره .. انصدم .. طاح الكاس من ايده وتم فاتح فمه يطالع بخوف واحراج .. خالد قرب من اخوه .. سحب البنت من ملابسها وحذفها على الارض .. مسك اخوه من ايده وطلع معاه بكل هدوء .. علي كان هادي هدوء خالد .. ركبوا السياره ومازال الهدوء سيد الموقف .. حرك خالد ومشى بالسياره لعند البحر .. وقف قريب من السيف .. نزل من السياره راح صوب اخوه وفتح باب السياره وسحب اخوه من ثيابه وقف عند البحر.. دز اخوه في الماي .. وغطس راسه في الماي وطلعه .. ورجع غطس راسه وطلعه مره ثانيه .. تم على هالحاله لمدة دقيقتين .. كان يصيح وهو يسوي هالحركه لاخوه .. وعلي ما ابدى اي ردة فعل ...
خالد: اوعى لنفسك .. شو انت من البشر .. وين راحت تربية بومحمد .. هاى جزاه .. وين ايمانك وين دينك ؟؟ .. ليش مشيت هالطريق ليش؟؟ .. احنا في ايش قصرنا عليك .. ؟؟ عندك اللي غيرك ما عمره حلم فيه .. اهل يحبونك ويدارونك .. ام تحاتيك .. اخوان وخوات يموتون فيك .. كل شي موفرينه لك .. بومحمد قصر في شي .. ماعتقد .. الماده موفرينها لك .. هاذا هو ابوك يشتغل الليل والنهار عشان يوفر لك احسن لبس .. احسن بيت .. احسن سياره .. سفرات و وناسه ودلع .. وهاي جزاه .. خالد رفع علي من كتوفه ودزه في الماي .. رفعه وقام يضربه على ويهه ودموعه مبلله خدوده على حال اخوه .. اصحى .. اصحـــــــــــــــــــــــــى ..
خالد: علي اخوي اللي تغرب عنا يرجع لنا فاسق .. كافر .. ليش ؟؟ حرقت قلبي الله يحرق قلبك .. ابوي قالب الدنيا عليك .. تستريل على اختك .. كسرت ويها .. عشان تبين لها انك ريال .. وضربه مره ثانيه على ويهه .. خالد ما كان يحس يقوة ضربه لاخوه من القهر والغل اللي في قلبه على سواة اخوه .. طلع دم من ويه اخوه .. وهني خالد وقف عن ضرب اخوه .. سحبه من ملابسه وشله وحذفه في السياره في السيت اللي ورا .. ركب السياره وحط راسه على سكان السياره وتم يصيح بصوت عالي .. آآه يا علي .. ليش جي ليش ؟؟ آآه يا يمه .. آآآه يا يبه .. الله يصبركم آآآه .. مسح دموعه بعد ما طلع اللي بخاطره من دموع وحزن .. وشاف اخوه من مراية السياره .. كان طايح على السيت اللي ورا ومغمض عيونه من الصدمه ولا تحرك من مكانه .. توجه خالد للبيت وكان يسوق بكل هدوء اول ما وصل البيت نزل من السياره .. راح المكتب عند ابوه .. دخل المكتب وكانت ملابسه مبلله بالماي وفيها شوية دم .. وحالته حاله ..
خالد: يبه تعال ..
بومحمد بخوف: خالد .. شو فيها ملابسك ؟؟
خالد طلع وطلع وراه بومحمد .. وكان مستغرب من تصرف خالد .. اول مره يشوفه معصب .. وصلوا لسيارة خالد .. و وقف خالد عند السياره
بومحمد: شفيك ؟؟ ليش جايبني هني ؟؟ شو عندك؟؟
خالد: افتح باب السياره وبتعرف ..
بومحمد بخوف: شو فيها السياره يبه ؟؟
فتح الباب وسكت .. انصدم من اللي شافه .. سكر باب السياره .. التفت على خالد .. وكان خالد متكتف يطالع ابوه .. رجع بومحمد فتح باب السياره وسحب علي و وقفه على حيله ..
خالد: لا توصخ يدك فيه يبه ..
بومحمد ماسك علي من ملابسه/ ليش ؟؟ وين لاقيه .. ومن اللي ضاربه ..؟؟؟
خالد: لاقيه في قذاره الله يعزك .. وانا اللي ضاربه .. وبعد احس اني ما اشفيت غليلي فيه ..
بومحمد تكى علي المرهق على السياره: وين كنت؟؟ تكلم ولا اكسر ويهك .. مثل ما كسرت ويه اختك .. علي يطالعهم بخوف وحس نفسه ياهل من الخوف اللي عاش فيه .. واول مره يشوف خالد بهالاعصاب ..
بومحمد ضرب علي كف على ويهه: اصحى .. انا اتكلم .. شو فيك مسطل ؟؟ شارب ؟؟
خالد: اي كان شارب ..
بومحمد ترك علي و وقف يطالعه: انا قلت شارب لانه مفهي وعيونه حمر .. خالد انت متأكد انه شارب..
خالد: اقولك ولدك شارب .. اقولك ولدك نيس .. شو تبيني اقولك عنه .. حسبي الله ونعم الوكيل ..
بومحمد نزل على الارض ومسك راسه من الصدمه .. في هالوقت طلع لهم محمد ..
محمد شاف ويه اخوه: منو مسوي بك جي ؟؟ مع من متهاوش بعد .. ما كفاك اللي سويته بالريم .. انت ماتجي من وراك الا المشاكل .. علي كان منزل راسه .. خالد طلب من ابوه انهم يدخلون ..
خالد: يبه .. تعال المكتب .. محمد بيتصرف معاه ..
محمد: شو مسوي هاذي .. كيف تبوني اتصرف معاه؟؟!؟
خالد همس بسرعه في اذن محمد: اخوك سكران وانا اللي ضاربه .. وده فوق ياخذ شور ويصحصح .. بس لاتشوفكم امي .. محمد حس الدنيا دارت فيه من اللي سمعه .. خذ خالد ابوه للمكتب .. اما محمد مسك اخوه بقرف من ملابسه ودخله الميلس ودزه في البانيو وفتح عليه الماي البارد ..
محمد: لا تتحرك من هني .. بروح اجيب لك ملابس ..

علي كان متحرقص من برودة الماي .. ومحمد راح غرفة اخوه يجيب له ملابس .. اول ما فتح الكبت طاحت على الارض صوره الخليعه اللي كان متصورها مع البنات في مصر ..
محمد رفع الصور: يالله عليك يا علي .. انت على ايش بتموت ... الله يهديك .. خذ ملابس لاخوه نزل تحت .. لقاه على نفس الحاله .. بند الماي وسحبه من البانيو وحذف عليه الفوطه ..
محمد: نشف عمرك وبدل ملابسك وتعالي الميلس بسرعه سمعت ..
بدل علي ملابسه وكان منصدم ويفكر بالاحداث اللي صارت له .. شاف نفسه في المرايه .. وانتبه للجرح اللي فوق عينه واللي كان ينزف .. طلع الميلس حق اخوه .. قرب محمد من علي ومسك ويهه
محمد: انسدح على الكرسي خل انظف جروحك ..
علي انسدح وكان مستغرب من تعامل محمد معاه بالرغم من المعامله اللي لقاها محمد من علي .. نظف محمد جروح اخوه وضمدها .. طلع من الميلس فتره ورجع.. هني علي خاف .. قعد محمد جنب علي وتكلم بهدوء ..
محمد: ليش جي سويت يا علي ؟؟ هاي اخرة التربيه .. شراب وبنات .. ولاحد فينا سواها .. انت ليش غير عنا .. على فكره ... خشيت صورك مع البنات اللي كانوا بالكبت .. وليش متفرعن على اختك .. انت مالك الا الريم واسامي .. بدل ماتكون سندهم .. صرت عدوهم ... تمد ايدك على الريم .. لو تشوف حالتها من بعد ما طلعت عنها .. والله انها تعور القلب .. حط في بالك ان خالد هو اللي قال لابوي عن اللي صار مو الريم .. علي انصدم من اللي سمعه وحس بالذنب .. وفي هالوقت دخل عليهم خالد .. و وراه بومحمد ..
خالد بهدوء وبدون اي مقدمات: علي ليش سويت جي؟؟
علي منحرج: ..........................
بومحمد كان واقف يطالع علي بغضب ..
خالد: علي اسمحلي اني مديت يدي عليك .. بس من اللي شفته .. اخوي وابي مصلحتك ..
بومحمد بعصبيه: لا والله .. شو رايك تبوس راسه بعد ..
خالد: يا يبه .. استهدي بالله .. علي غلط واكيد انه ندمان على غلطته ..
بومحمد: غلطه .. عن اي غلطه تتكلم انت ... قول غلطات .. شرب .. وبنات .. وصياعه .. ومد ايده على اخته .. ها علي يبه .. ذكرني لو نسيت شي .. ارفع راسك .. طالعني .. اقولك طالعني .. انا هني موفي الارض .. انت اللي مستواك الارض ..
علي رفع راسه .. بس ما قدر يحط عينه بعين ابوه .. قرب بومحمد من علي ورفع ايده .. بس محمد وقف بينه وبين علي .. ومسك ايد ابوه ..
محمد: اذكر ربك يا يبه .. كفاه اللي جاه من خالد .. الضرب مو اسلوب للتفاهم ..
بومحمد: ويوم ضرب الريم .. كان اسلوب تفاهم ...
خالد: يا يبه .. علي عاقل ..
بومحمد: شو .. هاذي عاقل .. العاقل مايسوي سواة المينون اخوك .. انطق يالعاقل .. دافع عن نفسك ولا قادر على الريم .. ومع كلام بومحمد ... دخلت الريم وهي خايفه .. شافها خالد ..
خالد: تعالي الريم ..
الريم صاحت من اللي شافته: نعم خالد ..
خالد: علي جدامج خليه يشوف ويهج .. رفعي يراسج ..
الريم كانت تصيح ومنزله راسها: خلاص .. اللي صار صار.. كانت حزينه على اخوها ..
بومحمد سحبها من ملابسها: وانا اقول تعالي .. رفع راسها وخلاها تشوف اخوها .. والريم كانت تصيح بصوت عالي .. خلاص يبه .. خلاص .. ولاشعوريا حضنت اخوها من شافت الجروح في ويهه .. اما علي انصدم من اخته .. وتم هو يصيح بس دموعه حكت حزنه على اللي سواه باخته .. وقلبها الكبير .. اللي سامحه ..
الريم وسط دموعها: علي فديتك منو اللي سوا فيك جي .. سمالله عليك .. والله مسامحتك .. و مو زعلانه عليك .. قعدت على الكرسي وعلي قعد على الارض وحاط راسه في حضن اخته الحنونه .. وتمت تمسح على راسه وتصيح .. علي تم يصيح مثل اليهال ..
علي: سامحيني يا اختي .. كنت مفتكر اني ريال لما مديت ايدي عليج .. والله اني آسف .. وماراح اسامح نفسي على اللي سويته فيج .. يا ليت الزمن يرجع ورا واصحح غلطتي .. وتم يصيح في حضن اخته مثل الياهل .. والريم حاضنه بقوه وتهديه ..
الريم: فديتك يا خوي .. محد فينا معصوم من الغلط .. والله اني نسيت اللي صار .. وقلبي ما فيه شي عليك .. مسامحتك .. بس لاتنزل دموعك الغاليه .. رفعت راس اخوها وباسته على جبهته ..
خالد وبومحمد ومحمد كانوا مذهولين من اللي صار جدامهم ..
بومحمد" قلبج حنون يالريم .. على اللي سواه فيج وما هان عليج "
خالد" ياليت قلبي مثل قلبج يالريم .. الله يخلينا لبعض "
محمد" الحمدلله على محبتنا لبعض .. كنت متوقع ردة فعلج .. قلبج كبير"

فاطمه: بصراحه وناسه .. مشكور يا فارس
فارس: افا عليج فطامي .. انتي تامرين امر ..
ايمان: احم .. محد فالسياره الا فطيم
فارس: والله هي اللي شكرتني ..
ايمان: زين هي لما شكرتك .. كان بالنيابه عني وعنها .. بس ولا تزعل ادري انك تموت في حسي .. مشكور يا فارس ونستنا ..
فارس: الله يساعدج اختي .. والعفو.. بس لاتعودينها ..
ايمان: بل .. العفو حاف جي بدون فديتج الحلوه الرقيقه العجيبه ايماني ..
فارس: اقول نزلوا كلكم من السياره ولا ادش فيكم الطوفه .. يلا ..
فاطمه: هههههههه ايماني .. صج تعرفين تنرفزين فارس ..
ايمان: هع .. انا ايمان ..
فارس: الا مرايم وين عنكم ؟؟
ايمان: نزلت تتكلم بالجوال ..
فارس: زين يلا خلصوني وراي مشوار ..
ايمان بخبث: على وين ؟؟ مو العصر تقولي مالك خاطر تطلع .. شو اللي غير رايك
فارس ببرأه: بروح عند جاسم المستشفى ..
ايمان وفاطمه طالعوا بعض: المستشفى ..
فارس طالعهم: يلا .. نزلي انتي وياها ..
نزلوا من السياره بسرعه يركضون ويضحكون على اخوهم ..
في هالاثناء مريم كانت تنهي المكالمه مع صديقتها نوره ..
مريم: اوكي حبيبتي .. يلا مع السلامه
نوره: مع السلامه
سكرت من نوره وكانت مستانسه .. واتصلت على ابوها تبشره بالخبر الحلو ..
مريم: ابي العزيز ..
بوفارس: هلا يبه ..
مريم: كيف حالك .. وحال اخي الصغير جاسم ؟؟
بوفارس يضحك على كلام بنته: هههههههه .. الحمدلله تمام
مريم: ههههههههه ... زين بابا كلمت البنت ..
بوفارس: زين وشو قالت ؟؟
مريم: موافقه .. يس .. يـــــــــــس
بوفارس: الله يبشرج بالخير ..
مريم: زين عاد ابي الحلاوه .. مافي شي ببلاش
بوفارس: اطلبي اللي تبينه ..
مريم: يا سلام يعني اتدلع واطلب اي شي ابيه ..
بوفارس: يا عيون بابا انتي .. على هالخبر الحلو لج اللي تبينه ..
مريم وكانت تتمشى في الحوش عند باب الصاله: ممممممم خلني افكر شو اطلب .. عاد باتدلل
بوفارس: كم مريم عندنا .. تدللي ..
مريم: فديت قلبك بابا .. يعني دام السالفه اتدلل ولي اللي ابيه .. لازم افكر عدل .. لان مثل هالفرصه ماتتكر ..
بوفارس مستانس على دلع بنته: زين يبه .. فكري وقولي لي اللي تبينه .. وانا حاضر ..
مريم وتلعب بشعرها: اوكي .. بخليك الحين .. وبعدين بتصل اقولك شو اللي ابيه ..
بوفارس: انشالله يبه .. مع السلامه
مريم: مع السلامه .. سكرت من ابوها وكانت بتدخل البيت وسمعت شخص يناديها .. وميزت الصوت لانه دخل اعماقها من درت بحبه لها ..
خالد: مريم ..
مريم التفتت بتوتر" هاي من متى هني ": نعم خالد ..
خالد" افففف تقهرني لي قالت نعم .. جني اطر منها": شحالج بنت العم ؟
مريم: الحمدلله .. وانت شو اخبارك ؟؟ ولاحضت الحزن بعيونه
خالد ابتسم بحزن .. واستانس لانه سألت عنه: الحمدلله بخير .. وسكت يناظرها ..
مريم سكتت ونزلت راسها .. وتموا فتره ساكتين ..
خالد حب يكسر حاجز الصمت: شو اخبار جاسم؟ ما رحتوا له اليوم ...
مريم رفعت راسها بس ماقدرت تحط عينها بعينه: جاسم تحسن عن قبل .. الحمدلله .. وانشالله بنمر عليه بعد صلاة المغرب ..
خالد: اوصلكم ؟؟
مريم: هاا .. توصلنا .. لا الدريول موجود ..
خالد بهمس: ياليتني الدريول ..
مريم سمعته: شو تقول ..
خالد: اقول بدل ماتروحون مع الدريول .. انقسموا نصين .. نص معاي والنص الثاني مع فارس .. انا مار على فارس عشان بنروح مع بعض .. شو رايج ؟
مريم: مادري عنكم ...
خالد استانس: زين باتصل على فارس الحين
مريم: ليش تتصل بروح اناديه لك ..
خالد: لا لاتنادينه .. " خليني اكحل عيوني بهالشوف "
مريم: اللي تشوفه .. اتصل خالد على فارس .. وقاله اقتراحه .. وفارس وافق
خالد طالع مريم: خلاص بنروح سيارتين .. بس طلبتج يا بنت العم ..
مريم عرفت شو طلب خالد: آمرني ولد عمي ..
خالد"يا فديت الدلع انا ": ابيج تركبين معاي بالسياره ..
مريم انحرجت ونزلت راسها: زين الحين بروح ابدل واصلي .. وانادي لك فارس ..
خالد: يعني موافقه ..
مريم وهي رايحه: اي

خالد" فديت هالطول انا ": نزل فارس لخالد .. وراحوا المسيد .. والبنات مع ام فارس جهزوا وكانوا ينتظرون الشباب ..
في طريقهم وهم طالعين من المسيد ..
فارس: بو وليد .. صج اللي سمعته .. عن علوه اخوك ..
خالد انقلب ويهه .. خاف ان فارس عرف عن سوالف علي البطاليه: اي كلام ؟؟
فارس: انه ضارب الريم ..
خالد تنفس براحه: اي الله يهديه بس ..
فارس: طاح من عيني ..
خالد: وايد تغير من رجع من مصر .. مادري شو صار لمخه ..
فارس: وعمي شو سوا ؟
خالد: تعرف عمك .. الحين معاقبه مايخليه يطلع من البيت .. وحارمه من كل شي.. بس الريم فديتها عجبتني .. ما رضت عليه وصاحت عليه صياح بالرغم من اللي سواه فيها ..
فارس: ماشالله عليها .. الله يكملها بعقلها .. في هاللحظه جات على باله مناف .. سكت فارس وتم يفكر فيها .. تذكر عيونها اللي ذبحته ..
خالد: وين رحت فارس؟؟
فارس: هاا .. معاك .. ما رحت مكان
وصلوا البيت وركبوا السياير .. وانقسموا .. كانت ام فارس مع ايمان في سيارة فارس .. وفاطمه ومريم في سيارة خالد ..
فارس: ايمانو يالأذيه .. روحي معاهم ..
ايمان: احلم .. هع .. مارتاح الا في عربيتك ..
فارس: اسمها سياره مو عربيه ..
ايمان: اللي هو .. بس دامك فيها احب اتواجد حولك وألوع جبدك ..
ام فارس تضحك على ايمان: ههههههههههه ايمانو .. طفرتي باخوج
ايمان: ههااااااااااي
فارس: ان سمعت لج حس باشوتج من العربيه على قولتج
ام فارس: و ليش تشوت بنتي .. يوز عنها .. عاد هاذي ايمان
ايمان: هييييييييي .. فديت ماما والله
فارس: صج فديتج ماما .. بس مالت عليج انتي
ام فارس: بسكم حشره .. يلا فارس يبه .. خل نروح لاخوك
فارس: انشالله امي .. حرك فارس و وراه خالد ..
اما في سيارة خالد .. كان الوضع غير .. فاطمه ومريم كانوا قاعدين ورا
خالد: زين حد يجي جدام .. اللي يشوفني يقول دريول ..
فاطمه: هههههههه .. احلى
خالد: مريم .. زين تعالي جدام
فاطمه: شمعنى مريم ..
خالد" فطوم هاذي مصيبه ": زين تعالي انتي جدام
فاطمه: صج عاد .. الحين تقولي .. خل مريم تقعد
خالد ماصدق: زيم مريم .. يلا تعالي جدام
مريم كانت منحرجه وفاطمه كانت تهمس في اذنها: يلا روحي .. شكلكم ثائي روعه
مريم: مابي ..
خالد وقف على طرف الشارع: يلا مرايم
فاطمه: ويدلعج بعد ..
خالد: يلا .. بنتأخر
فاطمه" حالتك صعبه ولد عمي " ودزت مريم صوب الباب وفتحته ..
مريم: لا لا .. مابي ..
خالد: امشي .. ما راح اكلج يالرقيقه ..
فاطمه: خويلد .. يوز عن اختي لا تتغزل فيها..
خالد ضحك على كلام فطوم: هههههه
مريم ضربت فطيم: فطوم يالدبه ..
خالد كان يراقب مريم وهي نازله وتركب معاه جدام ..
قعدت مريم بتوتر وكانت تفرك ايدينها بعض من القلق ...
خالد: بنت عمي .. قلت لج ماراح اكلج
مريم: زين ليش واقفين؟..
حرك خالد وفاطمه قاعده ورا وميته من الضحك .. وخالد كان فرحان بقرب مريم منه .. وصلوا المستشفى وهم رايحين صوب غرفة جاسم .. مريم كانت بطيح وهي تمشي .. لاشعوريا مسكها خالد وكان خايف عليها .. وهالشي كان وايد واضح عليه .. حتى فاطمه استغربت خوف خالد على مريم ..
خالد: سمالله عليج ابوي ..
مريم من الاحراج والتوتر صاحت
خالد بخوف: مريم شو فيج ... تعورتي ..
فاطمه: مريامي .. شو فيج ؟
مريم: مافيني شي وكانت ماسكه يد خالد بقوه
خالد: عيل ليش تصيحين؟
مريم: مافيني شي .. ومسحت دموعها ..
فاطمه درت ان اختها صاحت من الاحراج
خالد: زين ارتاحي على الكرسي .. بروح اجيب لج ماي .. فطيم قعدي معاها الحين برجع .. لاتخلينها
قعدت مريم وفاطمه معاها .. وفاطمه كانت مستغربه من تصرف خالد ..
فاطمه: مريوم .. شوفي شلون يداريج ؟؟ مريوم خلود يموت فيج ..
مريم وتمسح دموعها: مسكين والله .. وتمت تصيح
فاطمه: ليش تصيحين الحين ؟؟
مريم: خالد معور قلبي .. مسكين يخاف علي ويتقرب مني بس اعامله بجفا .. ودوم اصده .. حرام والله مسكين .. شفتيه شلون كان خايف علي الحين ..
فاطمه: من قدج بعد .. هاي ما عرستوا وخايف عليج جي ويداريج .. عيل لي عرستوا بيسويج يا دهينه لاتنكتين ..
مريم: فطوم .. انا في حاله وانتي في حاله ..
وصل خالد عندهم .. وكان ماسك كوب الماي .. ويتكلم بخوف
خالد: ها مريم .. اشوه الحين . هاج الماي شربي .. في شي يعورج ؟؟
مريم: لا ما يعورني شي .. وشربت الماي ..
فاطمه كانت تشوف عيون خالد وهي تراقب مريم بخوف واهتمام " وحليلك يا خالد .. انت ومريم .. عصافير "
تطمن خالد على مريم .. وراحوا صوب غرفة جاسم .. قبل ما يدخلون الغرفه .. فاطمه شافت صديقتها لطيفه .. وراحت تسلم عليها ..
فاطمه: خالد .. بروح اسلم على صديقتي
خالد: زين .. بس لا تتأخرين
فاطمه: انشالله .. وراحت تسلم على لطيفه صديقة عمرها
لطيفه: هلا والله ..
فاطمه: شو اخبارج لطوف ؟؟
لطيفه: تمام .. عايشين ؟؟ ما رخصوا جاسم اخوج للحين ؟؟
فاطمه: احتمال على نهاية الاسبوع .. بس لطوف شو هالحلاوه .. طالعه قمر .. هاي كله حق من ؟؟
لطيفه: اي قمر .. الله يخليج
فاطمه: الا طالعه قمر .. قمر ..

لطيفه: زين يالدبه .. قولي قمر لين تشبعين ..
فاطمه: زين يا قمر .. انا لازم اروح الحين .. بينا اتصال ..
لطيفه: اكيد حبيبتي .. سلمي على الاهل ..
فاطمه: يوصل .. مع السلامه
ليطفه: مع السلامه ..
راحت فاطمه صوب اهلها .. وهي تمشي منزله راسها .. خبطت في شخص وطاح جوالها على الارض وانكسر
فاطمه انحرجت: جوالي ..
: ........... آسف اختي .. وسكت تم يطالع عيون فاطمه ..
فاطمه طالعته وسرحت بعيونه .. نزل الشخص ياخذ الجوال المتكسر من الارض ..
........... : آسف اختي ... السموحه ..
فاطمه بربكه وخوف: مو مشكله .. ممكن تعطيني الجوال ..
............ : زين ممكن اعوضج عنه .. بس كيف بوصله لج اختي .. والله آسف ..
فاطمه: مو مشكله اخوي .. الا جوال .. عادي
............ " فديت عادي طالعه من فمج ": لا السموحه اختي .. والله منحرج منج
فاطمه مشت عنه ودخلت غرفة جاسم .. وهو تم يطالعها .. " واخيرا قدرت اجذب انتباهج ناحيتي شوي .."

( يا ترى من يكون هالشخص .. ؟ وشو سر جذبه لانتباه فاطمه.. ؟ شو قصته

في المستشفى وبالتحديد في غرقة جاسم .. الاهل متجمعين عند جاسم الا الريم وعلي وبومحمد .. دخلت عليهم فاطمه منخطف لونها .. انتبه عليها توأمها ..
عبدالعزيز: شو فيج فطيم؟ .. منخطف لونج
فاطمه بتوتر: ولا شي ..
عبدالعزيز: قلبي يدق مثلج .. شو فيج؟
فاطمه: اقولك مافيني شي .. اكشف عن قلبك فديتك ..
عبدالعزيز يهمس في اذن توأمه: بقولج شي واحد وانتي ادرى به .. انا وانتي طينه وحده .. يعني لا تحاولين تخشين علي سمعتي يا عسل ..
فاطمه ابتعدت عنه وابتسمت: العب غيرها .. وراحت عند مريم اختها ..
تم عبدالعزيز يناظر توامه فتره .. وبعدها طلع من الغرفه وشاف يوسف واقف في الممر .. راح يسلم عليه
عبدالعزيز: السلام عليك يوسف ..
يوسف مبتسم: عليكم السلام بو سعود .. شحالك ؟
عبدالعزيز: الحمدلله .. وانت علومك؟
يوسف: ما نشكي باس .. الا اشوف الاهل محتشرين بالغرفه . .
عبدالعزيز: اسوي لك درب ..
يوسف"يا ليت والله": لا مو مشكله .. خل الاهل ياخذون راحتهم .. برجع بعد ما يتوكلون
عبدالعزيز: امش نروح الكفتريا .. احس نفسي مخنوق .. وفي خاطري كلام ودي اقوله ..
يوسف بأهتمام: عسى ما شر بو سعود ..
عبدالعزيز وهو يمشي مع يوسف: يوسف .. عندي احساس غريب ناحيتك .. شعور ماعرف كيف اوصفه .. احسك قريب مني ..
يوسف استغرب من كلام عبدالعزيز: قريب مني .. شلون؟
عبدالعزيز قعد على الكرسي: مادري يا يوسف .. من اول يوم شفتك فيه .. وانا احس بهالاحساس ..
يوسف فهم شعور عبدالعزيز اللي ماقدر يفسره . لان عبدالعزيز توأم فاطمه .. ويوسف يموت في فاطمه ..
يوسف: يمكن ارتحت لي ..
عبدالعزيز ببرأه: اي والله ارتحت لك .. احبك فالله ..
يوسف مبتسم: اعتبرني اخوك الكبير .. وانا حاضر لك في اي وقت ..
عبدالعزيز: الله يسلمك يا يوسف ..
تموا يسولفون مع بعض .. ويوسف كان فرحان بكلام عبدالعزيز ..

اما في غرفة جاسم .. الوضع غير .. سوالف وضحك ..
مريم: بابا .. ها شو بتسون على موضوع عزيز .. متى بتروحون للناس؟
بوفارس: على الاسبوع الجاي انشالله .. بس يرخصون اخوج .. باكلم امج عشان تكلم اخوج
مريم: من تكلم فارس؟؟
بوفارس: لا يبه .. عزيز ..
مريم: ليش؟
بوفارس: لازم تكلمه .. تقوله عن العرس ومسؤليته .. وانه حياة جديده وانه مو لعب ..
مريم: وليش انت ما تكلمه ؟؟
بوفارس: باكلمه بس بعد الموافقه الرسميه من اهل البنت ..
مريم: اها .. عيل جي السالفه ..
بوفارس: اي هاي كل السالفه .. وباس مريم على راسها وحضنها .. شافهم خالد ..
خالد"ياحظك يا عمي .. لازم اكلم عمي .. مريم لي انا "
انتبهت فاطمه لنظرات خالد .. نزلت راسها وابتسمت .. تذكرت الشخص اللي خبطت فيه وهي داخله الغرفه ..
فاطمه"ليش قلبي يدق بسرعه لي تذكرته ؟؟ .. شكله مو غريب علي .. شايفته من قبل .. وااي للحين اشم ريحة عطره .. ابتسمت مره ثانيه"
فارس: فطيم .. فطامي .. كان يناديها وهي سرحانه بعالم ثاني ومبتسمه ..
فاطمه: هااا .. هلا هلا فارس ..
فارس: الحلو سرحان بمن ؟؟؟
فاطمه منحرجه: هههههه .. لا افكر في صديقتي اللي شفتها من شوي ..
فارس: منو صديقتج ؟ ليكون اللي دوم تجينا البيت
فاطمه: اللي تجينا البيت .. شو السالفه ؟؟
فارس مبتسم: هههههه لا تخافين .. مو حاطها في بالي ... بس كنت ..
تقاطعه فاطمه: كنت شو ؟؟
فارس: خليني اكمل كلامي مع ويهج
فاطمه: زين كمل .. كمل
فارس: زين طال عمرج .. احمد بن راشد شافها كم مره والولد يبي يكمل دينه ..
فاطمه: والله .. وحليلها لطوف
فارس: اي وحليلها هاذي لطوف .. اسمها حلو
فاطمه وضربته على كتفه: ما يخصك باسمها ..
فارس: خخخخخخخ مو انا اللي باخطبها .. المهم كلميها عشان احمد يكلم عمه زين اختي
فاطمه: اوكي ولا يهمك ..
رن تلفون فارس .. طالع الجوال وابتسم .. كتم الرنه وقام بيطلع ومسكته فاطمه
فاطمه مبتسمه: وين رايح .. ليش ما تتكلم هني ..
فارس طالعها بنظره: اروح وين ما ابي .. ومشى عنها .. فاطمه استغربت من رد فارس .. وتضايقت .. طلع فارس من الغرفه ورجع اتصل بالشخص المتصل له ..
فارس: السلام عليكم
مناف: وعليكم السلام
فارس: شو اخبارج مناف؟
مناف: الحمدلله .. وانت اخبارك؟
فارس: تمام
مناف: حبيت اشكرك على المعروف اللي سويته فينا .. اليوم اخواني راحوا المدرسه وهم شبعانين .. وسويت لهم اكل خذوه معاهم المدرسه .. وعطتهم مصروف .. والله والله كانوا فرحانين ومستانسين .. ما قصرت و ...
قاطعها فارس: شوي شوي .. خلصتي الكلام ..
مناف منحرجه: آسفه .. بس من فرحتي .. الله يفك عنك اي كرب وحزن يا رب يا رب ..
فارس: آمين .. وبعدين انا ما سويت الا الواجب .. وحاضر في اي وقت ..
مناف: جميلك هاذي بتم طول عمري شايلته على راسي .. وما راح انساه لك ..
فارس"يالله .. شلون الفرحه في قلبها .. من مبلغ تافه بالنسبه لي .. فرحها هي واخوانها .. الحمدلله اني فرحتها هي واخوانها"
فارس: اقول مناف .. عندج اخوان وخوات صح؟
مناف: عندي اخوان .. انا البنت الوحيده ..
فارس: كم اعمارهم اخوانج ؟
مناف: فيصل عمره 10 سنوات .. عبود 8 سنوات والصغير نايف 4 سنوات ونسميه البوكيمون ...
فارس: ههههه وحليله .. ليش ؟
مناف: لانه من بعد المرض تغير شكله .. كنا بالمستشفى وفيصل يموت فيه وكان يبي يضحكه ... قاله تحولت من نايف الى نيوف .. ورد عليه عبود وقاله شدعوه بوكيمون .. ومن يومها ومانسميه الا البوكيمون ..
فارس: ههههه الله يخلي لج اخوانج .. بس شو المرض اللي في الصغير ؟
مناف: اخوي يعاني من سوء التغذيه .. وسكتت مخنوقه ..
فارس سكت ما عرف شو يرد عليها .. تموا فتره ساكتين .. فارس كسر حاجز الصمت بينهم
فارس: مناف
مناف: تفضل
فارس: دام فضلج .. انتي من وين جبتي رقمي ؟
مناف منحرجه: هاا .. رقمك؟
فارس: اي

الله يعطيك العافيه
وتقبل مروري

الله يعافيك سمو..

الله يعافيك كاسبر..